സാംസങ് ഗാലക്‌സി എ12 സ്മാർട്ട്ഫോൺ വൈകാതെ വിപണിയിൽ എത്തും

സാംസങിന്റെ റഷ്യയിലെ ഔദ്യോഗിക വെബ്‌സൈറ്റിലാണ് സാംസങ് ഗാലക്‌സി എ12 എന്ന സ്മാർട്ട്ഫോൺ ലിസ്റ്റ് ചെയ്തതാതിയി കണ്ടെത്തിയത്. SM125F / DSN മോഡൽ നമ്പറോടെയാണ് ഈ ഡിവൈസ് ലിസ്റ്റ് ചെയ്തിരിക്കുന്നത്. സമാന മോഡൽ നമ്പർ മുമ്പ് ഒന്നിലധികം ഓൺലൈൻ പ്ലാറ്റ്ഫോമുകൾ വഴി ടിപ്പ് ചെയ്തിരുന്നു. കമ്പനിയുടെ വെബ്‌സൈറ്റിൽ ഈ സ്മാർട്ട്ഫോൺ കണ്ടെത്തിയതായി റിപ്പോർട്ട് ചെയ്തത് 91 മൊബൈൽസ് ആണ്.

സാംസങ് ഗാലക്‌സി എ12 സ്മാർട്ട്ഫോണിന്റെ സവിശേഷതകൾ കമ്പനിയുടെ ഔദ്യോഗിക വെബ്സൈറ്റിലെ ലിസ്റ്റിങിൽ വെളിപ്പെടുത്തിയിട്ടില്ല. എന്തായാലും ഈ സ്മാർട്ട്ഫോണുമായി ബന്ധപ്പെട്ട കാര്യങ്ങൾ ഓൺലൈനിൽ ചർച്ചയാകുന്നത് ആദ്യമായല്ല. നേരത്തെ ഡിവൈസുമായി ബന്ധപ്പെട്ട നിരവധി ലീക്ക് റിപ്പോർട്ടുകൾ പുറത്ത് വന്നിരുന്നു. ഡിവൈസിന്റെ പ്രധാന സവിശേഷതകൾ വെളിപ്പെടുത്തുന്നതായിരുന്നു ഈ റിപ്പോർട്ടുകൾ. ജനപ്രിയ മൊബൈൽ ബെഞ്ച്മാർക്ക് വെബ്‌സൈറ്റായ ഗീക്ക്ബെഞ്ചിലും ഈ ഡിവൈസ് കണ്ടെത്തിയിരുന്നു.

മീഡിയാടെക് ഹീലിയോ പി35 പ്രോസസറാണ് സാംസങ് ഗാലക്‌സി എ12 സ്മാർട്ട്ഫോണിന് കരുത്ത് നൽകുക എന്നാണ് റിപ്പോർട്ടുകൾ. ഈ എൻട്രി ലെവൽ ഒക്ടാ കോർ പ്രോസസറിന് 2.3GHz ബേസ് ഫ്രീക്വൻസി ഉണ്ടായിരിക്കും. ഗീക്ക്ബെഞ്ച് ഡാറ്റാബേസ് അനുസരിച്ച് ഈ ചിപ്സെറ്റിനൊപ്പം 3 ജിബി റാമും ഉണ്ടെന്നാണ് റിപ്പോർട്ടുകൾ. ഈ ഡിവൈസ് പ്രവർത്തിക്കുന്നത് ആൻഡ്രോയിഡ് 10 ഒഎസിലായിരിക്കുമെന്നും ഇതിനൊപ്പം ഒരു കസ്റ്റം വൺ യുഐ സ്കിൻ ഉണ്ടായിരിക്കുമെന്നും റിപ്പോർട്ട് സൂചിപ്പിക്കുന്നു.

ലീക്ക് റിപ്പോർട്ടുകൾ അനുസരിച്ച് സാംസങ് ഗാലക്‌സി എ12 സ്മാർട്ട്ഫോൺ ട്രിപ്പിൾ ലെൻസ് പിൻ ക്യാമറ സെറ്റപ്പുമായിട്ടായിരിക്കും പുറത്തിറങ്ങുന്നത്. ഈ സ്മാർട്ട്ഫോണിന്റെ മുൻഗാമിയിലും ഇതേ ക്യാമറ സെറ്റപ്പാണ് ഉണ്ടായിരുന്നത്. ട്രിപ്പിൾ ക്യാമറ സെറ്റപ്പിലെ ക്യാമറകളെ സംബന്ധിച്ച വിവരങ്ങളൊന്നും ഇതുവരെ വ്യക്തമായിട്ടില്ല. പ്രൈമറി ലെൻസിനൊപ്പം ഡെപ്ത്, മാക്രോ സെൻസറുമായിട്ടായിരിക്കും ഈ സ്മാർട്ട്ഫോൺ പുറത്തിറങ്ങുക എന്നാണ് പ്രതീക്ഷിക്കുന്നത്.

എൽസിഡി ഡിസ്പ്ലേ പാനലുമായിട്ടായിരിക്കും സാംസങ് ഗാലക്‌സി എ12 സ്മാർട്ട്ഫോൺ വിപണിയിലെത്തുക. ഈ ഡിസ്പ്ലെ പാനലിൽ സെൽഫി ക്യാമറയ്ക്കായി പഞ്ച്-ഹോളും ഉണ്ടായിരിക്കും. ഡിവൈസിന്റെ ഹാർഡ്‌വെയറുമായി ബന്ധപ്പെട്ട കൂടുതൽ വിശദാംശങ്ങൾ വരും ആഴ്ചകളിൽ വ്യക്തമാകും. അധികം വൈകാതെ തന്നെ ഈ സ്മാർട്ട്ഫോൺ വിപണിയിലെത്തും. ഇന്ത്യയിൽ ആദ്യഘട്ടത്തിൽ തന്നെ ഡിവൈസ് ലോഞ്ച് ചെയ്യുമോ എന്ന കാര്യം വ്യക്തമല്ല.