സാംസങ് ഗാലക്‌സി A31 ഇന്ത്യൻ വിപണിയിലെത്തി; വിലയും സവിശേഷതകളും

ഗാലക്‌സി എ 31 ന്റെ പ്രധാന സവിശേഷത 6.4 ഇഞ്ച് വലിയ എഫ്‌എച്ച്‌ഡി + സൂപ്പർ അമോലെഡ് ഡിസ്‌പ്ലേയാണ്. വാട്ടർ ഡ്രോപ്പ് ഡിസൈനിലുള്ള ഡിസ്പ്ലെയിൽ 20 മെഗാപിക്സൽ സെൽഫി ക്യാമറയും നൽകിയിട്ടുണ്ട്. ഒക്ടാകോർ മീഡിയടെക് ഹെലിയോ ചിപ്‌സെറ്റാണ് ഈ സ്മാർട്ട്ഫോണിന് കരുത്ത് നൽകുന്നത്. പിന്നിൽ ക്വാഡ് ക്യാമറ സെറ്റപ്പാണ് സാംസങ് നൽകിയിരിക്കുന്നത്.

സാംസങ് ഗാലക്‌സി A31: വിലയും ലഭ്യതയും

സാംസങ് ഗാലക്‌സി A31 സ്മാർട്ട്ഫോണിന്റെ 6 ജിബി റാമും 128 ജിബി സ്റ്റോറേജുമുള്ള വേരിയന്റിന്റാണ് ഇപ്പോൾ അവതരിപ്പിച്ചിരിക്കുന്നത്. ഈ വേരിയന്റിന് 21,999 രൂപയാണ് വില. സാംസങ്ങിന്റെ സ്റ്റോറുകൾ, സാംസങ്.കോം, ഫ്ലിപ്പ്കാർട്ട്, ആമസോൺ എന്നിവയുൾപ്പെടെയുള്ള എല്ലാ പ്രധാന ഇ-കൊമേഴ്സ് സൈറ്റുകൾ വഴിയും ഈ ഫോൺ ലഭ്യമാകുമെന്ന് സാംസങ് അറിയിച്ചു. നീല, കറുപ്പ് എന്നിവയടക്കം ഒന്നിലധികം നിറങ്ങളിൽ ഈ സ്മാർട്ട്ഫോൺ ലഭ്യമാകും.

സാംസങ് ഗാലക്‌സി A31: സവിശേഷതകൾ

സാംസങ് ഗാലക്‌സി A31 സ്മാർട്ട്ഫോൺ ഒക്ടാ കോർ പ്രോസസർ മീഡിയടെക് ഹീലിയോ പി 65 ചിപ്‌സെറ്റിന്റെ കരുത്തിലാണ് പ്രവർത്തിക്കുന്നത്. 2.0 ജിഗാഹെർട്‌സ്, 1.7 ജിഗാഹെർട്സ് ഫ്രീക്വൻസിയിൽ ക്ലോക്ക് ചെയ്യുന്നവയാണ് ഇത്. 6 ജിബി റാം 128 ജിബി സ്റ്റോറേജുമാണ് ഫോണിൽ നൽകിയിട്ടുള്ളത്.

സാംസങ് ഗാലക്‌സി A31ന്റെ പ്രധാന സവിശേഷത അതിന്റെ ക്യാമറകളാണ്. പിന്നിൽ ഒരു ക്വാഡ് ക്യാമറ സെറ്റപ്പോടെയാണ് ഈ ഡിവൈസ് വരുന്നത്. ഒരു പ്രൈമറി 48 മെഗാപിക്സൽ ക്യാമറ, 8 മെഗാപിക്സൽ അൾട്രാ വൈഡ് ആംഗിൾ ഷൂട്ടർ, 5 -മെഗാപിക്സൽ മാക്രോ ക്യാമറ, 5 മെഗാപിക്സൽ ഡെപ്ത് സെൻസർ എന്നിവയാണ് ഈ ക്യാമറ സെറ്റപ്പിൽ ഉള്ളത്.

മുൻവശത്ത് സെൽഫികൾക്കായി 20 മെഗാപിക്സൽ ക്യാമറയാണ് നൽകിയിട്ടുള്ളത്. ഡിസ്‌പ്ലേയിലെ വാട്ടർ ഡ്രോപ്പ് നോച്ചിലാണ് ഈ സെൽഫി ക്യാമറ സ്ഥാപിച്ചിരിക്കുന്നത്. ഇത് മികച്ച സെൽഫി ക്യാമറ തന്നെയാണ്. 5,000 എംഎഎച്ച് ബാറ്ററിയാണ് ഡിവൈസിൽ ഉള്ളത്. യുഎസ്ബി ടൈപ്പ്-സി വഴി 15W ഫാസ്റ്റ് ചാർജിംഗ് സപ്പോർട്ടും ഫോണിൽ നൽകിയിട്ടുണ്ട്.

ഉപയോക്താക്കളുടെ സൗകര്യം കണക്കിലെടുത്ത് സാംസങ് പേ, സാംസങ് നോക്സ്, സാംസങ് ഹെൽത്ത് തുടങ്ങിയ ആപ്പുകൾ സാംസങ് ഗാലക്സി എ 31ൽ മുൻകൂട്ടി ഇൻസ്റ്റാൾ ചെയ്തിട്ടുണ്ട്. വരും ദിവസങ്ങളിൽ ഈ ഡിവൈസിന്റെ മറ്റ് സ്റ്റോറജ് വേരിയന്റുകൾ കൂടി പുറത്തിറങ്ങിയേക്കാൻ സാധ്യതയുണ്ട്.