സാംസങ് ഗാലക്‌സി A31 സ്മാർട്ട്ഫോണിന് വില കുറച്ചു, ഒപ്പം 1,000 രൂപ ക്യാഷ്ബാക്ക് ഓഫറും

സാംസങ് ഗാലക്‌സി A31: പുതുക്കിയ വില

ഇന്ത്യയിൽ സാംസങ് ഗാലക്‌സി A31 സ്മാർട്ട്ഫോണിന്റെ 6 ജിബി റാം + 128 ജിബി സ്റ്റോറേജ് വേരിയന്റിന് 21,999 രൂപയായിരുന്നു വില. 1,000 രൂപ വില കുറച്ചതോടെ ഈ ഡിവൈസ് ഇപ്പോൾ 20,999 രൂപയ്ക്ക് സ്വന്തമാക്കാൻ സാധിക്കും. ആമസോൺ ഇന്ത്യ, സാംസങ് ഇന്ത്യ വെബ്സൈറ്റികളിലും ഔദ്യോഗിക ഓഫ്‌ലൈൻ ചാനലുകളിലും ഈ ഡിവൈസ് ലഭ്യമാണ്. പ്രിസം ക്രഷ് ബ്ലാക്ക്, പ്രിസം ക്രഷ് ബ്ലൂ, പ്രിസം ക്രഷ് വൈറ്റ് എന്നീ കളർ ഓപ്ഷനുകളിൽ ഇത് വരുന്നു. ഈ ഡിവൈസ് ഫ്ലിപ്പ്കാർട്ടിലുടെയും ലഭ്യമാണെങ്കിലും പുതക്കിയ വില ഫ്ലിപ്പ്കാർട്ടിൽ അപ്ഡേറ്റ് ചെയ്തിട്ടില്ല.

ഗാലക്‌സി A31 വാങ്ങുന്ന ഉപയോക്താക്കൾ ഐസിഐസിഐ ബാങ്ക് ക്രെഡിറ്റ് കാർഡ് (ഇഎംഐ ഇടപാടുകൾ) ഉപയോഗിക്കുകയാണെങ്കിൽ 1000 ക്യാഷ്ബാക്ക് ലഭിക്കുമെന്ന് സാംസങ് അറിയിച്ചു. ഈ ഓഫർ ഓഫ്‌ലൈൻ ചാനലുകളിലും ലഭ്യമാവുമോ എന്ന കാര്യത്തിൽ വ്യക്തതയില്ല. സാംസങ് ഇന്ത്യ സൈറ്റും ആമസോണും നോ-കോസ്റ്റ് ഇഎംഐ ഓപ്ഷൻ നൽകുന്നുണ്ട്. ആമസോൺ പ്രൈം അംഗങ്ങൾക്ക് ആമസോൺ പേ ഐസിഐസിഐ ബാങ്ക് ക്രെഡിറ്റ് കാർഡ് എന്നിവ ഉപയോഗിച്ചാൽ അഞ്ച് ശതമാനം ഇളവും ലഭിക്കും.

സാംസങ് ഗാലക്‌സി A31: സവിശേഷതകൾ

സാംസങ് ഗാലക്‌സി A31 സ്മാർട്ട്ഫോൺ ഒക്ടാ കോർ പ്രോസസർ മീഡിയടെക് ഹീലിയോ പി 65 ചിപ്‌സെറ്റിന്റെ കരുത്തിലാണ് പ്രവർത്തിക്കുന്നത്. 2.0 ജിഗാഹെർട്‌സ്, 1.7 ജിഗാഹെർട്സ് ഫ്രീക്വൻസിയിൽ ക്ലോക്ക് ചെയ്യുന്നവയാണ് ഇത്. 6 ജിബി റാം 128 ജിബി സ്റ്റോറേജുമാണ് ഫോണിൽ നൽകിയിട്ടുള്ളത്. സാംസങ് ഗാലക്‌സി A31ന്റെ പ്രധാന സവിശേഷത അതിന്റെ ക്യാമറകളാണ്. പിന്നിൽ ഒരു ക്വാഡ് ക്യാമറ സെറ്റപ്പോടെയാണ് ഈ ഡിവൈസ് വരുന്നത്.

ഡിവൈസിലുള്ള ക്വാഡ് ക്യാമറ സെറ്റപ്പിൽ 48 മെഗാപിക്സൽ പ്രൈമറി ക്യാമറ, 8 മെഗാപിക്സൽ അൾട്രാ വൈഡ് ആംഗിൾ ഷൂട്ടർ, 5 -മെഗാപിക്സൽ മാക്രോ ക്യാമറ, 5 മെഗാപിക്സൽ ഡെപ്ത് സെൻസർ എന്നിവയാണ് കമ്പനി നൽകിയിട്ടുള്ളത്. മുൻവശത്ത് സെൽഫികൾക്കായി 20 മെഗാപിക്സൽ ക്യാമറയാണ് നൽകിയിട്ടുള്ളത്. ഡിസ്‌പ്ലേയിലെ വാട്ടർ ഡ്രോപ്പ് നോച്ചിലാണ് ഈ സെൽഫി ക്യാമറ സ്ഥാപിച്ചിരിക്കുന്നത്. ഇത് മികച്ച ക്വാളിറ്റിയുള്ള സെൽഫികൾ എടുക്കാൻ സഹായിക്കുന്ന ക്യാമറയാണ്.

5,000 എംഎഎച്ച് ബാറ്ററിയാണ് ഡിവൈസിൽ ഉള്ളത്. യുഎസ്ബി ടൈപ്പ്-സി പോർട്ട്, 15W ഫാസ്റ്റ് ചാർജിംഗ് സപ്പോർട്ട് എന്നിവയും ഫോണിലുണ്ട്. ഉപയോക്താക്കളുടെ സൗകര്യം കണക്കിലെടുത്ത് സാംസങ് പേ, സാംസങ് നോക്സ്, സാംസങ് ഹെൽത്ത് തുടങ്ങിയ ആപ്പുകൾ സാംസങ് ഗാലക്സി എ 31ൽ മുൻകൂട്ടി ഇൻസ്റ്റാൾ ചെയ്തിട്ടുണ്ട്. വരും ദിവസങ്ങളിൽ ഈ ഡിവൈസിന്റെ മറ്റ് സ്റ്റോറജ് വേരിയന്റുകൾ കൂടി പുറത്തിറങ്ങിയേക്കാൻ സാധ്യതയുണ്ടെന്ന് നേരത്തെ റിപ്പോർട്ടുകൾ ഉണ്ടായിരുന്നെങ്കിലും ഇതുവരെയായി മറ്റ് സ്റ്റോറേജ് മോഡലുകൾ പുറത്തിറക്കുന്നതിനെ സംബന്ധിച്ച് കമ്പനി ഔദ്യോഗിക വിവരങ്ങളൊന്നും പുറത്ത് വിട്ടിട്ടില്ല.