സാംസങ് ഗാലക്സി എ73 5ജി സ്മാർട്ട്ഫോണിന്റെ ആദ്യ വിൽപ്പന ഇന്ന്; വിലയും ഓഫറുകളും

സാംസങ് ഗാലക്സി എ73 5ജി: വില, ഓഫറുകൾ

സാംസങ് ഗാലക്സി എ73 5ജി സ്മാർട്ട്ഫോണിന്റെ 8 ജിബി റാമും 128 ജിബി സ്റ്റോറേജുമുള്ള മോഡലിന് 41,999 രൂപയാണ് വില. 8 ജിബി റാമും 256 ജിബി സ്റ്റോറേജുമുള്ള വേരിയന്റിന് 44,999 രൂപ വിലയുണ്ട്. ഓസം ഗ്രേ, ഓസം മിന്റ്, ഓസം വൈറ്റ് എന്നീ മൂന്ന് കളർ ഓപ്‌ഷനുകളിൽ സ്മാർട്ട്‌ഫോൺ ലഭ്യമാകും. ഇന്ന് വൈകുന്നേരം 6 മണി മുതലാണ് ഈ ഡിവൈസിന്റെ വിൽപ്പന ആരംഭിക്കുന്നത്. സാംസങ് ഗാലക്സി എ73 5ജി സ്മാർട്ട്ഫോണിന് ആദ്യ വിൽപ്പനയിലൂടെ ലഭിക്കുന്ന ഓഫറുകൾ സാംസങ് ഇതുവരെ വെളിപ്പെടുത്തിയിട്ടില്ല. കമ്പനിയുടെ റീട്ടെയിൽ ചാനലുകളിൽ ലഭ്യമാകുന്ന എക്‌സ്‌ക്ലൂസീവ് ഓഫറുകൾ അറിയാൻ 6 മണിക്ക് സാംസങ് ലൈവ് ഇവന്റ് കണ്ടാൽ മതി.

സാംസങ് ഗാലക്സി എ73 5ജി സ്മാർട്ട്ഫോൺ മുൻകൂട്ടി ബുക്ക് ചെയ്ത ഉപഭോക്താക്കൾക്ക് 3000 രൂപ ഇൻസ്റ്റന്റ് ക്യാഷ്ബാക്ക് ലഭിക്കുമെന്ന് കഴിഞ്ഞ ആഴ്ച സാംസങ് വെളിപ്പെടുത്തിയിരുന്നു. സാംസങ് ഫിനാൻസ്+, ഐസിഐസിഐ ബാങ്ക് കാർഡുകൾ, എസ്ബിഐ ക്രെഡിറ്റ് കാർഡുകൾ എന്നിവ വഴിയുള്ള വാങ്ങലുകൾക്കാണ് ഈ ഇൻസ്റ്റന്റ് ക്യാഷ്ബാക്ക് ലഭിക്കുന്നത്. സ്‌മാർട്ട്‌ഫോൺ പ്രീ ബുക്ക് ചെയ്‌ത ഉപഭോക്താക്കൾക്ക് ഒരു ജോടി സാംസങ് ഗാലക്‌സി ബഡ്‌സ് ലൈവ് ട്രൂ വയർലെസ് ഇയർബഡ്സ് വെറു 499 രൂപയ്ക്ക് വാങ്ങാം. ഈ ഇയർബഡ്സിന്റെ യഥാർത്ഥ വില 6,990 രൂപയാണ്.

സാംസങ് ഗാലക്സി എ73 5ജി: സവിശേഷതകൾ

6.7 ഇഞ്ച് ഫുൾ-എച്ച്‌ഡി+ (1,080x2,400 പിക്‌സൽ) സൂപ്പർ അമോലെഡ് ഡിസ്‌പ്ലേയുമായിട്ടാണ് സാംസങ് ഗാലക്സി എ73 5ജി സ്മാർട്ട്ഫോൺ വരുന്നത്. ഈ ഡിസ്പ്ലെയിൽ 120 ഹെർട്‌സ് റിഫ്രഷ് റേറ്റും ഗൊറില്ല ഗ്ലാസ് 5 പ്രോട്ടക്ഷനും നൽകിയിട്ടുണ്ട്. ക്വാൽകോം സ്നാപ്ഡ്രാഗൺ 778G എസ്ഒസിയുടെ കരുത്തിലാണ് ഈ ഡിവൈസ് പ്രവർത്തിക്കുന്നത്. 8 ജിബി റാമുമായിട്ടാണ് ഈ ചിപ്പ്സെറ്റ് ജോടിയാക്കിയിരിക്കുന്നത്. ഉപയോഗിക്കാത്ത ഇൻബിൽറ്റ് സ്റ്റോറേജ് ഉപയോഗിച്ച് റാം എക്സ്പാൻഡ് ചെയ്യാനുള്ള സംവിധാനവും ഈ ഡിവൈസിൽ ഉണ്ട്.

സാംസങ് ഗാലക്സി എ73 5ജി സ്മാർട്ട്ഫോണിൽ ഡ്യുവൽ സിം (നാനോ) സപ്പോർട്ടും കമ്പനി നൽകിയിട്ടുണ്ട്. ആൻഡ്രോയിഡ് 12 ബേസ്ഡ് വൺയുഐ 4.1-ലാണ് സ്മാർട്ട്ഫോൺ പ്രവർത്തിക്കുന്നത്. സാംസങ് നാല് വർഷത്തെ ആൻഡ്രോയിഡ് ഓപ്പറേറ്റിംഗ് സിസ്റ്റം അപ്‌ഡേറ്റുകളും അഞ്ച് വർഷത്തെ സുരക്ഷാ അപ്‌ഡേറ്റുകളും ഈ ഡിവൈസിൽ നൽകുമെന്ന് വ്യക്തമാക്കിയിട്ടുണ്ട്.

നാല് പിൻ ക്യാമറകളുമായിട്ടാണ് സാംസങ് ഗാലക്സി എ73 5ജി വരുന്നത്. എഫ്/1.8 അപ്പേർച്ചർ ലെൻസുള്ള 108-മെഗാപിക്സൽ പ്രൈമറി ക്യാമറ സെൻസർ, എഫ്/2.2 അപ്പേർച്ചർ ലെൻസുള്ള 12-മെഗാപിക്സൽ അൾട്രാ-വൈഡ് ആംഗിൾ ക്യാമറ. എഫ്/2.4 അപ്പേർച്ചർ ലെൻസുകളുള്ള രണ്ട് 5-മെഗാപിക്സൽ ഡെപ്ത്, മാക്രോ ക്യാമറകളുമാണ് ഈ ക്വാഡ് റിയർ ക്യാമറ സെറ്റപ്പിൽ നൽകിയിട്ടുള്ളത്. സെൽഫികൾക്കും വീഡിയോ കോളുകൾക്കുമായി 32 മെഗാപിക്സൽ ഫ്രണ്ട് ക്യാമറയും ഈ ഡിവൈസിലുണ്ട്.

സാംസങ് ഗാലക്സി എ73 5ജി സ്മാർട്ട്ഫോണിൽ 256 ജിബി വരെ ഇൻബിൽറ്റ് സ്റ്റോറേജാണ് നൽകിയിട്ടുള്ളത്. ഇത് മൈക്രോ എസ്ഡി കാർഡ് സ്ലോട്ട് വഴി എക്സ്പാൻഡ് ചെയ്യാൻ കഴിയും. ഈ സ്ലോട്ട് വഴി 1 ടിബി വരെ സ്റ്റോറേജാണ് എക്സ്പാൻഡ് ചെയ്യാൻ സാധിക്കുന്നത്. 25W ഫാസ്റ്റ് ചാർജിങ് സപ്പോർട്ടുള്ള 5,000mAh ബാറ്ററിയും ഡിവൈസിൽ നൽകിയിട്ടുണ്ട്. ഫോണിനൊപ്പം ചാർജർ ലഭിക്കുകയില്ല എന്ന കാര്യം ശ്രദ്ധിക്കുക. നമ്മൾ ചാർജർ പ്രത്യേകം വാങ്ങേണ്ടി വരും.