Samsung Galaxy M21: 6000 എംഎഎച്ച് ബാറ്ററിയുമായി സാംസങ് ഗാലക്‌സി എം 21 അവതരിപ്പിച്ചു: വില 12,999 രൂപ

ഗാലക്‌സി എം31 6000 എംഎഎച്ച് ബാറ്ററിയുടെ കരുത്തോടെയാണ് പുറത്തിറങ്ങിയത്. ഇന്ത്യയിലെ ബാറ്ററി ചാമ്പ്യൻ എന്നും ഈ സ്മാർട്ട്ഫോണിനെ വിശേഷിപ്പിക്കുന്നു. ഗാലക്സി എം 21 ആമസോൺ വഴി വാങ്ങാൻ ലഭ്യമാകും. ആദ്യ വിൽപ്പന മാർച്ച് 23 ന് ഉച്ചയ്ക്ക് 12 മണിക്ക് നടക്കും. ഇന്ത്യൻ വിപണിയിൽ കുറഞ്ഞ വിലയിൽ മികച്ച സവിശേഷതകൾ ലഭ്യമാക്കുക എന്ന ചൈനീസ് കമ്പനികളുടെ തന്ത്രത്തെ നേരിടുന്നതിൽ സുപ്രധാന നീക്കമാണ് ഈ ഫോണിലൂടെ സാംസങ് നടത്തുന്നത്.

സാംസങ് ഗാലക്സി എം 21: സവിശേഷതകൾ

ദക്ഷിണ കൊറിയൻ സ്മാർട്ട്‌ഫോൺ ഭീമനായ സാംസങ് ‘എം' സീരിസിൽ അവതരിപ്പിച്ച ഏറ്റവും പുതിയ ഫോണാണ് ഗാലക്‌സി എം 21. മുൻവശത്ത് 6.4 ഇഞ്ച് സമോൾഡ് ഫുൾ എച്ച്ഡി + ഇൻഫിനിറ്റി-യു സ്‌ക്രീൻ ഫോണിലുണ്ട്. സ്‌ക്രീൻ-ടു-ബോഡി റേഷിയോ 91% ആണെന്ന് സാംസങ് അവകാശപ്പെടുന്നു. മുകളിൽ കോർണിംഗ് ഗോറില്ല ഗ്ലാസ് 3 പരിരക്ഷയുണ്ട്. എച്ച്ഡി വീഡിയോകൾ സ്ട്രീമിംഗ് ചെയ്യുന്നതിന് ഗാലക്സി എം 21 ന് വൈഡ്വിൻ എൽ 1 സർട്ടിഫിക്കേഷൻ ഉണ്ടെന്ന് ആമസോൺ ഇന്ത്യ വെബ്‌സൈറ്റിൽ നിന്ന് വ്യക്തമാണ്.

4 ജിബി / 6 ജിബി റാമും 64 ജിബി / 128 ജിബി ഇന്റേണൽ സ്റ്റോറേജുമായി വരുന്ന ഗാലക്‌സി എം 21 ന് ഇൻഹൌസ് എക്‌സിനോസ് 9611 ചിപ്‌സെറ്റ് ഉണ്ട്. 512 ജിബി വരെ സ്റ്റോറേജ് വികസിപ്പിക്കാനായി മൈക്രോ എസ്ഡി കാർഡ് സ്ലോട്ടും നൽകുന്നുണ്ട്. ക്യാമറകളെ സംബന്ധിച്ചിടത്തോളം ഗാലക്‌സി എം 21 ഒരു പ്രൈമറി 48 എംപി സാംസങ് ഐസോസെൽ ജിഎം 1 സെൻസറോടെയാണ് വരുന്നത്.

ക്യാമറ

48 എംപി പ്രൈമറി സെൻസറിനൊപ്പം 8 എംപി അൾട്രാ-വൈഡ് ആംഗിൾ ഷൂട്ടറും 5 എംപി ഡെപ്ത് സെൻസറും ഉപയോഗിച്ച് പ്രവർത്തിക്കുന്ന ക്യാമറ സെറ്റപ്പാണ് ഫോണിലുള്ളത്. മുൻവശത്ത് 20 എംപി സെൽഫി ക്യാമറയാണ് ഈ ഫോണിന് നൽകിയിരിക്കുന്നത്. 48 എംപി ക്യാമറയുള്ള മറ്റ് ഡിവൈസുകൾക്ക് സമാനമായി ഗാലക്സി എം 21 ന് ക്യാമറ മോഡും ഉണ്ട്. ഇത് 48 എംപി ഷോട്ടുകൾ പകർത്താൻ ഉപയോക്താക്കളെ അനുവദിക്കുന്നു.

കണക്റ്റിവിറ്റി

ഗാലക്‌സി എം 21 ലെ കണക്റ്റിവിറ്റി ഓപ്ഷനുകളിൽ 4 ജി വോൾട്ട്, വൈ-ഫൈ 802.11 ബി / ജി / എൻ, ബ്ലൂടൂത്ത് 5.0, ജിപിഎസ്, യുഎസ്ബി ടൈപ്പ്-സി പോർട്ട് എന്നിവ ഉൾപ്പെടുന്നു. ആൻഡ്രോയിഡ് 10 അധിഷ്‌ഠിത വൺയുഐ 2.0ലാണ് ഫോൺ പ്രവർത്തിക്കുന്നത്. ഇത് കൂടാതെ 6000 എംഎഎച്ച് ബാറ്ററിയും 15W ഫാസ്റ്റ് ചാർജിംഗ് സപ്പോർട്ടും ഫോണിലുണ്ട്. ഗാലക്‌സി എം 21 49 മണിക്കൂർ ടോക്ക് ടൈമും 22 മണിക്കൂർ തുടർച്ചയായ ഇന്റർനെറ്റ് ഉപയോഗവും (വൈ-ഫൈ / എൽടിഇ) നൽകുമെന്ന് സാംസങ് പറയുന്നു. ഫിംഗർപ്രിന്റ് സ്കാനർ പിൻവശത്ത് സ്ഥാപിച്ചിരിക്കുന്നു.

സാംസങ് ഗാലക്‌സി എം 21: വിലയും ലഭ്യതയും

ആമസോൺ ഇന്ത്യ ലിസ്റ്റിംഗിലൂടെ നോക്കിയാൽ ഗാലക്‌സി എം 21 നിലവിൽ 4 ജിബി + 64 ജിബി വേരിയന്റാണ് ലഭ്യമായിട്ടുള്ളത്. ഇതിന് 12,999 രൂപയാണ് വില കാണിച്ചിരിക്കുന്നത്. എന്നിരുന്നാലും, 6 ജിബി + 128 ജിബി സ്റ്റോറേജ് മോഡലിലും ഈ ഡിവൈസ് വൈകാതെ ലഭ്യമാകുമെന്ന് സാംസങ് സ്ഥിരീകരിച്ചു. ഗാലക്‌സി എം 21 ന്റെ ആദ്യ വിൽപ്പന മാർച്ച് 23 ന് പകൽ 12 മണിക്ക് ആമസോൺ വഴി നടക്കും.