സാംസങ് ആരാധകർക്ക് അവേശമായി ഗാലക്സി Z ഫ്ലിപ് 5 വരുന്നു; അറിയേണ്ടതെല്ലാം

സാസംങ് ആരാധകർ ഏറെ കാത്തിരിക്കുന്ന ​ഗാലക്സി Z ഫ്ലിപ് 5 ന്റെ ലോഞ്ചിം​ഗ് തിയതി പ്രഖ്യാപിച്ചു. ജൂലൈ 26 ന് പുതിയ ഫോൺ അവതരിപ്പിക്കും എന്നാണ് കമ്പനി അറിയിച്ചിരിക്കുന്നത്. ദക്ഷിണ കൊറിയയിലെ സിയോളിൽ വെച്ചുനടക്കുന്ന ചടങ്ങിൽ ആയിരിക്കും സാസംങ് തങ്ങളുടെ പുതിയ ഫോൺ അവതരിപ്പിക്കുക.

സിയോളിൽ വെച്ചുനടത്തുന്ന ആദ്യത്തെ അൺപാക്കിം​ഗ് ഇവന്റ് ആയിരിക്കും ഇത്. ചടങ്ങിൽ ഗാലക്സി Z ഫ്ലിപ് 5 എന്ന് വിളിക്കുന്ന ഗാലക്സി Z ഫോൾഡ് 5, ഗാലക്സി ടാബ് എസ്- സീരീസ്, ഗാലക്സി വാച്ച് 6 എന്നിവയും അവതരിപ്പിക്കുമെന്നാണ് പ്രതീക്ഷിക്കുന്നത്. ലോഞ്ച് നടന്നാൽ അധികം വൈകാതെ തന്നെ ഈ ഉത്പന്നങ്ങൾ എല്ലാം തന്നെ ഇന്ത്യയിലും എത്തുമെന്നാണ് പ്രതീക്ഷിക്കുന്നത്.

ഗാലക്സി Z ഫ്ലിപ് 5ന്റെ ഔദ്യോ​ഗിക പോസ്റ്റർ പുറത്തിറങ്ങിയതോടെ സാസംങ് ആരാധകർ എല്ലാം ഏറെ ആകാംഷയിലാണ്. മടക്കി ഉപയോഗിക്കാവുന്ന ഫോണിന്റെ ഡീസൈൻ തന്നെയാണ് ഏറ്റവും ആകർഷണം. മുൻ മോഡലുകളേക്കാൾ നവീകരിച്ച പതിപ്പ് ആയിരിക്കും ഗാലക്സി Z ഫ്ലിപ് 5ന്റേത്. അതേ സമയം ചില ആപ്പുകൾ പ്രവർത്തിക്കാനായി അഡീഷണൽ ആയി ഒരു ലാർജ് ഡിസ്പ്ലേ വേണമെന്ന് ചിലർ നിർദേശിച്ചിരുന്നു.

അടുത്തിടെ, സമാനമായ വൈഡ് എക്സ്റ്റേണൽ സ്‌ക്രീനോടുകൂടി മോട്ടറോള Razr 40 അൾട്രാ എന്ന ഫോൺ അവതരിപ്പിച്ചിരുന്നു. നേരത്തെ ​ഗാലക്സിയുടേതായി പുറത്തിറങ്ങിയ ഫോൾഡബിൾ ഫോണുകളേക്കാൾ മികച്ച ഡിസൈനും ഡസ്റ്റ് പ്രൂഫ് സാങ്കേതിക വിദ്യവും Z ഫ്ലിപ് 5ൽ ഉണ്ടാകുമെന്ന് ഔദ്യോ​ഗികമല്ലാത്ത ചില റിപ്പോർട്ടുകൾ സൂചിപ്പിക്കുന്നുണ്ട്. കഴിഞ്ഞ ദിവസമാണ് ഫോണിന്റെ ഔദ്യോ​ഗിക പോസ്റ്റർ സാസംങ് പുറത്തുവിട്ടത്.

MOST READ:ത്രെഡ്സ് സ്വകാര്യതയ്ക്ക് ഭീഷണിയോ? നിർണായക വിവരങ്ങൾ ചോർത്തുന്നുവെന്ന് റിപ്പോർട്ട്

മെറ്റൽ ഫ്രെയിമിൽ ആയിരിക്കും ഫോൺ ഒരുങ്ങുന്നത് എന്ന സൂചനയാണ് പോസ്റ്റർ തരുന്നത്. സാസംങിന്റെ ഫോൾഡബിൾ ഉപകരണങ്ങളിലെല്ലാം Qualcomm-ന്റെ ഏറ്റവും പുതിയ സ്‌നാപ്ഡ്രാഗൺ ചിപ്‌സെറ്റ് ആണ് കണ്ടുവരുന്നത് എന്നാൽ Z ഫ്ലിപ് 5ൽ Snapdragon 8 Gen 2 SoC അല്ലെങ്കിൽ Snapdragon 8+ Gen 2 SoC ആയിരിക്കും എന്നാണ് കമ്പനി നൽകുന്ന സൂചന.

ഫോണിന്റെ ക്യാമറ ഡിപ്പാർട്ട്‌മെന്റിലും കാര്യമായ മാറ്റങ്ങൾ പ്രതീക്ഷിക്കാവുന്നതാണ്. ഗാലക്സി S 23 അൾട്രായിൽ ഉപയോ​ഗിക്കുന്ന 200-മെഗാപിക്സൽ 1/1.3-ഇഞ്ച് ഐസോസെൽ HP2 ക്യാമറ സെൻസർ ഉണ്ടാകും എന്ന് ചില സൂചനകൾ ഉണ്ട്. അങ്ങനെയെങ്കിൽ മികച്ച ക്യാമറ അനുഭവം തന്നെയായിരിക്കും Z ഫ്ലിപ് 5 ഉപഭോക്താക്കൾക്ക് നൽകുക. ഫോണിന് ഇന്ത്യൻ മാർക്കറ്റിൽ ഒരു ലക്ഷത്തിന് മുകളിൽ ആയിരിക്കും വില.

അതേ സമയം ചടങ്ങിൽ പുറത്തിറക്കാൻ സാധ്യതയുള്ള സാംസങ് സ്മാർട്ട് വാച്ചുകളെക്കുറിച്ചും ചില റിപ്പോർട്ടുകൾ പുറത്തുവന്നിട്ടുണ്ട്. സാംസങ് വാച്ച് 6 സീരീസിലെ വാച്ച് 6, വാച്ച് 6 ക്ലാസിക്ക് എന്നീ സ്മാർട്ട് വാച്ചുകൾ ആയിരിക്കും അവതരിപ്പിക്കുക. പഴയ വാച്ച് സീരീസിന് സമാനമായി വ്യത്യസ്ത വലുപ്പങ്ങളിൽ ആയിരിക്കും പുതിയ വാച്ചുകളും ലഭ്യമാകുക. ഈ വർഷം തന്നെ ഒരു ഗാലക്‌സി വാച്ച് പ്രോ മോഡൽ പുറത്തിറക്കുമെന്നും റിപ്പോർട്ടുകൾ ഉണ്ട്.

ഉപഭോക്താക്കളെ ആകർഷിക്കുന്നതിനായി വാച്ചിൽ പുതിയ ആരോഗ്യ ഫീച്ചറുകൾ ചേർക്കുമെന്നും ഇതിനായി ഗൂഗിളുമായുള്ള സാംസങിന്റെ പങ്കാളിത്തം തുടർന്നേക്കും എന്നും പ്രതീക്ഷിക്കുന്നു. വാച്ച് 6 40 എംഎം ബ്ലൂടൂത്ത് വേരിയന്റിന്റെ വില ഏകദോശം 28,700 രൂപയും വാച്ച് 6 ക്ലാസിക്കിന്റെ 43 എംഎം ബ്ലൂടൂത്ത് വേരിയന്റിന്റെ വില ഏകദേശം 37,700 രൂപയും ആയിരിക്കും.