സ്മാർട്ട്ഫോണുകളിലെ ഫിങ്കർപ്രിന്റ് അൺലോക്ക് സുരക്ഷിതമല്ല; അറിയേണ്ടതെല്ലാം

ഫിംഗർപ്രിന്റ് ഐഡന്റിഫിക്കേഷൻ ഇപ്പോൾ വളരെയേറെ പരിചിതമായ ഒരു സാങ്കേതികവിദ്യയായി മാറിയിരിക്കുന്നു. എല്ലാ പുതിയ സ്മാർട്ട്‌ഫോണുകളിലും ടാബ്ലറ്റുകളിലും ഇപ്പോഴിതാ ലാപ്‌ടോപ്പുകളിലും ഫിങ്കർപ്രിന്റ് അൺലോക്ക് സംവിധാനം വന്നുകഴിഞ്ഞു. നമ്മൾ വളരെ സുരക്ഷിതമെന്നാണ് ഈ ഫിങ്കർപ്രിന്റെ സെക്യൂരിറ്റിയെ കാണാറുള്ളത്. അത്രമാത്രം സുരക്ഷിതമല്ല ഈ സംവിധാനം.

സ്മാർട്ട്‌ഫോണുകളുടെയും ലാപ്‌ടോപ്പിന്റെയും ഏറ്റവും വില കൂടിയ ഫ്ലാഗ്ഷിപ്പ് മോഡലുകളിൽ ഉള്ള ഫിങ്കർപ്രിന്റെ സംവിധാനം പോലും വിശ്വസിനീയമല്ലെന്ന് തലോസ് സെക്യൂരിറ്റി ഗ്രൂപ്പ് എന്ന ഗവേഷക സംഘം പ്രസിദ്ധീകരിച്ച റിപ്പോർട്ടിൽ പറയുന്നു. ഈ പരീക്ഷണത്തിനായി ഗവേഷകർക്ക് 2000 ഡോളറിന്റെ ബജറ്റാണ് ഉണ്ടായിരുന്നത്. പരീക്ഷണത്തിനായി ഗവേഷകർ ആപ്പിൾ, സാംസങ്, മൈക്രോസോഫ്റ്റ് എന്നിവയിൽ നിന്ന് ഡിവൈസുകൾ വാങ്ങുകയും ചെയ്തിട്ടുണ്ട്.

വ്യാജ ഫിംഗർപ്രിന്റുകൾ ഉപയോഗിച്ച് ഡിവൈസുകൾ അൺലോക്ക് ചെയ്യാം

വ്യാജ വിരലടയാളം ഉപയോഗിച്ച് ഡിവൈസുകൾ അൺലോക്കുചെയ്യാനുള്ള മൊത്തം ഇരുപത് ശ്രമങ്ങളെ അടിസ്ഥാനമാക്കിയാണ് പഠനത്തിനായുള്ള പരിശോധന നടന്നത്. ഇതിന്റെ ഫലങ്ങൾ അതിശയിപ്പിക്കുന്നതായിരുന്നു. ഫിംഗർപ്രിന്റ് സ്കാനർ 80 ശതമാനം ടെസ്റ്റുകളിലും വ്യാജ ഫിങ്കർപ്രിന്റുകൾ കൊണ്ട് അൺലോക്ക് ചെയ്യാൻ സാധിച്ചിട്ടുണ്ട്. ഇത് ഡിവൈസുകളുടെ സുരക്ഷയെ സംബന്ധിക്കുന്ന വലിയൊരു പ്രശ്നം തന്നെയാണ്.

ഫിംഗർപ്രിന്റ് ഐഡന്റിഫിക്കേഷൻ സംവിധാനം എങ്ങനെ വ്യാജ വിരലടയാളം ഉണ്ടാക്കി അൺലോക്ക് ചെയ്യാമെന്ന് ഹാക്കർമാർക്കും മറ്റും കൃത്യമായ അറിവ് ലഭിച്ചാൽ അത് വലിയ സുരക്ഷാ പ്രശ്നം തന്നെ സൃഷ്ടിക്കും. ഡിവൈസുകൾ നിർമ്മിക്കുന്ന കമ്പനികൾ ഇത് ശ്രദ്ധിക്കുകയും വേഗത്തിൽ പരിഹാരം കാണുകയും വേണം. 80 ശതമാനം എന്നത് വളരെ ഉയർന്ന പ്രോബബിലിറ്റിയാണ്.

ഫിങ്കർപ്രിന്റ് അൺലോക്കിന്റെ പ്രശ്നങ്ങൾ തുറന്ന് കാട്ടുന്നതിനൊപ്പം തന്നെ പഠനത്തിൽ ശ്രദ്ധേയമായ ഒരു കാര്യം കൂടി കണ്ടുപിടിച്ചിട്ടുണ്ട്. വ്യാജ വിരലടയാളം ഉപയോഗിച്ച് തുറക്കാൻ ഏറ്റവും എളുപ്പമുള്ളത് പാഡ്‌ലോക്കുകളുള്ള ഡിവൈസുകളാണ്. ഫിംഗർപ്രിന്റ് ലോക്ക് വ്യാജമായി ഉണ്ടാക്കി വളരെ എളുപ്പത്തിൽ അൺലോക്ക് ചെയ്യാൻ സാധിക്കുന്ന ഡിവൈസുകളാണ് സാംസങ് ഗാലക്‌സി എസ് 10, മാക്ബുക്ക് പ്രോ 2018, ഐഫോൺ 8 എന്നിവ. 90 ശതമാനത്തിലധികം സാധ്യതയാണ് പഠനത്തിൽ ഈ ഡിവൈസുകൾക്ക് ഉള്ളത്.

ഡിവൈസുകളുടെ ഫിംഗർപ്രിന്റ് സ്കാനറുകൾ നിർമ്മിച്ച രീതിയിലെ മാറ്റങ്ങളാണ് ഓരോന്നിന്റെയും സ്കാനറുകൾ വ്യാജവിരലടയാളം ഉപയോഗിച്ച് അൺലോക്ക് ചെയ്യാനുള്ള സാധ്യത വർദ്ധിപ്പിക്കുന്നത്. അതേസമയം ഫിംഗർപ്രിന്റ് സുരക്ഷാ കൃത്രിമമായുള്ള വിരലടയാളം ഉപയോഗിച്ച് അൺലോക്ക് ചെയ്യാനുള്ള സാധ്യതയുടെ പട്ടികയിൽ ഏറ്റവും അവസാനത്തെ ഡിവൈസ് സാംസങ് ഗാലക്‌സി എ 70യാണ്. ഈ ഡിവൈസ് അൺലോക്ക് ചെയ്യാൻ പൂജ്യം ശതമാനം സാധ്യത മാത്രമേ ഉള്ളുവെന്നാണ് പഠനം തെളിയിക്കുന്നത്. ഒരു സാങ്കേതികവിദ്യയും സുരക്ഷിതമല്ലെന്നാണ് ഈ പഠന റിപ്പോർട്ടിൽ നിന്നും മനസിലാക്കേണ്ടത്.