സോണി എക്സ്പീരിയ പ്രോ ഫ്ലാഗ്ഷിപ്പ് സ്മാർട്ട്ഫോൺ ലോഞ്ച് ചെയ്തു; വിലയും സവിശേഷതകളും

5ജി സപ്പോർട്ടുള്ള ആൻഡ്രോയിഡ് സ്മാർട്ട്‌ഫോണാണ് സോണി എക്സ്പീരിയ പ്രോ. ഇതിന്റെ ഏറ്റവും വലിയ സവിശേഷത എച്ച്ഡിഎംഐ ഔട്ട്‌പുട്ടാണ്. ഈ എച്ച്ഡിഎംഐ ഔട്ട്പുട്ടിലൂടെ സോണിയുടെ ചില മിറർലെസ്-ക്യാമറകളിൽ ഈ സ്മാർട്ട്ഫോൺ ഒരു എക്സ്റ്റേണൽ ക്യാമറ മോണിറ്ററായി ഉപയോഗിക്കാൻ കഴിയും. 5ജി കണക്റ്റിവിറ്റി ഉള്ളതിനാൽ തന്നെ മിറർലെസ്സ് ക്യാമറയിൽ നിന്ന് നേരിട്ട് കണ്ടന്റ് സ്ട്രീം ചെയ്യാൻ എക്സ്പീരിയ പ്രോ സ്മാർട്ട്ഫോണിലൂടെ സാധിക്കും.

സോണി എക്സ്പീരിയ 1 II ലെ പ്രീമിയം ഗ്ലാസ്-മെറ്റൽ ഫിനിഷിൽ നിന്ന് വ്യത്യസ്തമായി സോണി എക്സ്പീരിയ പ്രോയ്ക്ക് ഒരു പ്ലാസ്റ്റിക് പോളികാർബണേറ്റ് ബോഡിയാണ് കമ്പനി നൽകിയിട്ടുള്ളത്. ഇത് പ്രീമിയം സോണി ക്യാമറകളോട് സാമ്യത പുലർത്തുന്നതാണ്. പ്ലാസ്റ്റിക് ബോഡിയായതിനാൽ തന്നെ എക്സ്പീരിയ 1 II മായി താരതമ്യപ്പെടുത്തുമ്പോൾ സോണി എക്സ്പീരിയ പ്രോ ഒരു പരുക്കൻ സ്മാർട്ട്‌ഫോണാണ്.

സവിശേഷതകൾ

സോണി എക്സ്പീരിയ 1 II സ്മാർട്ട്ഫോണിന്റെ പല സവിശേഷതകളും അതുപോലെ തന്നെ എക്സ്പീരിയ പ്രോ സ്മാർട്ട്ഫോണിൽ നൽകിയിട്ടുണ്ട്. എക്സ്പീരിയ പ്രോയിൽ 6.5 ഇഞ്ച് ഒലെഡ് ഡിസ്പ്ലേയാണ് ഉള്ളത്. ഈ ഡിസ്പ്ലെ 4കെ റെസല്യൂഷനുള്ളതാണ് (3840 x 1644). ഡിവൈസിന് കരുത്ത് നൽകുന്നത് കഴിഞ്ഞ വർഷം പുറത്തിറങ്ങിയ ക്വാൽകോം സ്‌നാപ്ഡ്രാഗൺ 865 എസ്ഒസിയണ്. ഇത് മികച്ച പ്രോസസറാണ്. എക്സ്റ്റേണൽ ക്യാമറയുമായി ബന്ധിപ്പിക്കുന്ന മിനി എച്ച്ഡിഎംഐ പോർട്ടുമായി വരുന്ന ഡിവൈസിൽ ചാർജിങിനായി യുഎസ്ബി ടൈപ്പ്-സി പോർട്ടും നൽകിയിട്ടുണ്ട്.

4,000 എംഎഎച്ച് ബാറ്ററിയാണ് എക്സ്പീരിയ പ്രോ സ്മാർട്ട്ഫോണിൽ ഉള്ളത്. ഈ ബാറ്ററി വേഗത്തിൽ ചാർജ് ചെയ്യാനായി ഫാസ്റ്റ് ചാർജിങും നൽകിയിട്ടുണ്ട്. സബ് -6 ജിഗാഹെർട്സ്, എംഎം വേവ് 5ജി സപ്പോർട്ട് ചെയ്യുന്ന ഡിവൈസിൽ 5ജി സിഗ്നൽ റിസപ്ഷൻ മെച്ചപ്പെടുത്തുന്നതിനായി ഫോർ-വേ എംഎം വേവ് ആന്റിന അറേയും നൽകിയിട്ടുണ്ട്. ഇത് മികച്ച ഡൌൺലോഡ്, അപ്‌ലോഡ് സ്പീഡ് നൽകുന്നുണ്ട്.

സോണി എക്സ്പീരിയ പ്രോ; വില

1,200 ഡോളർ വിലയുള്ള സോണി എക്സ്പീരിയ 1 II സ്മാർട്ട്ഫോണിനെക്കാൾ ഇരട്ടി വിലയുള്ള ഡിവൈസാണ് എക്സ്പീരിയ പ്രോ സ്മാർട്ട്‌ഫോൺ. 2,499.99 ഡോളറാണ് ഈ ഡിവൈസിന്റെ വില. പ്രൊഫഷണൽ ഉപയോക്താക്കൾക്കുള്ളതാണ് എക്സ്പീരിയ പ്രോയെന്നാണ് സോണി പറയുന്നത്. പ്രീമിയം സോണി സ്മാർട്ട്ഫോൺ ആവശ്യമുള്ളവർക്ക് എക്സ്പീരിയ 1 II വാങ്ങുന്നതാണ് നല്ലത്. ഇന്ത്യയിൽ എക്സ്പീരിയ പ്രോ അവതരിപ്പിക്കാനുള്ള സാധ്യത വളരെ കുറവാണ്.