ടെക്നോ സ്പാർക്ക് ഗോ 2021 സ്മാർട്ട്ഫോൺ ജൂലൈ 1ന് ഇന്ത്യൻ വിപണിയിലെത്തും

കഴിഞ്ഞ വർഷം ജൂലൈ 21ന് ഇന്ത്യയിൽ ലോഞ്ച് ചെയ്ത സ്പാർക്ക് ഗോയുടെ പിൻഗാമിയായിട്ടായിരിക്കും ടെക്നോ സ്പാർക്ക് ഗോ 2021 പുറത്തിറങ്ങുന്നത്. ഡിവൈസിന്റ ലോഞ്ച് തിയ്യതിയും ഓൺലൈൻ വിപണിയിലെ ലഭ്യതയും ആമസോൺ വഴിയാണ് ടെക്നോ വെളിപ്പെടുത്തിയിരിക്കുന്നത്. പുറത്തിറക്കാനിരിക്കുന്ന ബജറ്റ് ഫോണായ ടെക്നോ സ്പാർക്ക് ഗോ 2021ന്റെ പ്രധാന സവിശേഷതകൾ വെളിപ്പെടുത്തുന്ന ഒരു മൈക്രോ സൈറ്റും ആമസോണിൽ ഉണ്ട്.

ടെക്നോ സ്പാർക്ക് ഗോ 2021ന്റെ ആമസോൺ ലിസ്റ്റിങ് ഈ ഡിവൈസിന്റെ വിലയെ കുറിച്ച് സൂചനകൾ ഒന്നും തന്നെ നൽകുന്നില്ല. ഡിസൈൻ, പ്രധാന സവിശേഷതകൾ എന്നിവ ലിസ്റ്റിങ് വെളിപ്പെടുത്തുന്നു. ഇവ രണ്ടം പരിശോധിക്കുമ്പോൾ ഇത് ഒരു എൻ‌ട്രി ലെവൽ സ്മാർട്ട്‌ഫോണായിരിക്കുമെന്ന് ഉറപ്പാണ്. ആമസോൺ മൈക്രോസൈറ്റിൽ നൽകിയിട്ടുള്ള ചിത്രത്തിൽ ടെക്സ്ചർ ചെയ്ത പാറ്റേണുകളുള്ള ഗ്രേഡിയന്റ് റിയർ പാനൽ ആയിരിക്കും ഉണ്ടായിരിക്കുക എന്ന് വെളിപ്പെടുത്തുന്നു. പിൻ പാനലിൽ മുകളിൽ ഇടത് വശത്ത് ലംബമായി രണ്ട് ക്യാമറകളും ഉണ്ടായിരിക്കും.

ഡിവൈസിന്റെ പിൻവശത്ത് ഫിംഗർപ്രിന്റ് സ്കാനറും ടെക്നോ നൽകിയിട്ടുണ്ട്. കറുപ്പ്, നീല, ഡ്യുവൽ-ടോൺ (നീല-ഓറഞ്ച്) ഷേഡുകൾ എന്നിങ്ങനെ മൂന്ന് വ്യത്യസ്ത കളർ ഓപ്ഷനുകളിൽ ഈ ഡിവൈസ് ലഭ്യമാകുമെന്ന് ആമസോൺ ലിസ്റ്റിംഗ് വെളിപ്പെടുത്തുന്നു. ടെക്നോ സ്പാർക്ക് ഗോ 2021ന്റെ പ്രൊഡക്ട് പേജിൽ ചുറ്റിലും കട്ടിയുള്ള ബെസലുകളുള്ള ഒരു വാട്ടർ ഡ്രോപ്പ് നോച്ച് ഡിസ്പ്ലേയുള്ള ഡിവൈസാണ് കാണുന്നത്. ചില സവിശേഷതകൾ മാത്രമേ മൈക്രോ സൈറ്റിൽ നൽകിയിട്ടുള്ളു.

ടെക്നോ സ്പാർക്ക് ഗോ 2021 സ്മാർട്ട്ഫോണിൽ 6.52 ഇഞ്ച് സ്റ്റാൻഡേർഡ് എച്ച്ഡി + പാനലായിരിക്കും ഉണ്ടാവുക. ഇതിൽ ഡ്യൂവൽ ക്യാമറ സെറ്റപ്പും ഉണ്ടായിരിക്കും. പ്രൈമറി ക്യാമറ 13 എംപി ആയിരിക്കുമെന്നാണ് സൂചന. 8 എംപി സെൽഫി ക്യാമറയും ഡിവൈസിൽ ഉണ്ടായിരിക്കും. ഡിവൈസിലെ പ്രോസസറിന്റെ വിശദാംശങ്ങൾ‌ വെളിപ്പെടുത്തിയിട്ടില്ല. ഇത് ഒരു ലോ-എൻഡ് മീഡിയടെക് അല്ലെങ്കിൽ‌ സ്‌നാപ്ഡ്രാഗൺ‌ എസ്ഒസി ആയിരിക്കുമെന്നാണ് സൂചനകൾ.

സ്റ്റാൻഡേർഡ് 4ജി നെറ്റ്‌വർക്ക് സപ്പോർട്ടുള്ള ഡിവൈസിൽ 5,000 എംഎഎച്ച് ബാറ്ററിയായിരിക്കും ഉണ്ടാവുക എന്നാണ് ആമസോൺ ലിസ്റ്റിങ് നൽകുന്ന സൂചന. ഇതുവരെ ഫാസ്റ്റ് ചാർജിങ് സപ്പോർട്ടിന്റെ കാര്യം വെളിപ്പെടുത്തിയിട്ടില്ല. ഇത് ഒരു എൻ‌ട്രി ലെവൽ സ്മാർട്ട്‌ഫോണാണ് എന്നതിനാൽ സാധാരണ കാണാറുള്ള 10W ചാർജിങ് സപ്പോർട്ട് തന്നെയായിരിക്കും ഈ ഡിവൈസിലും ഉണ്ടാവുന്നത്. 10,000 രൂപ വില വിഭാഗത്തിൽ ആയിരിക്കും ഈ ഡിവൈസ് പുറത്തിറങ്ങുക എന്നാണ് സൂചനകൾ. ഇത് റിയൽമി സി സീരിസ് അടക്കമുളള ഡിവൈസുകളോട് മത്സരിക്കും.