കരുത്തരിൽ കരുത്തനായ സ്‌നാപ്ഡ്രാഗൺ 888 ചിപ്പ്സെറ്റുമായി ഇന്ത്യയിലെത്തുന്ന സ്മാർട്ട്‌ഫോണുകൾ

ക്വാൽകോം സ്‌നാപ്ഡ്രാഗൺ 888 5ജി ചിപ്പ്സെറ്റുമായി ഇന്ത്യയിൽ ആദ്യം പുറത്തിറങ്ങുക അസൂസിന്റെ ഏറ്റവും പുതിയ ഡിവൈസായ അസൂസ് റോഗ്ഫോൺ 5 ആയിരിക്കും. ഇതിന് പിന്നാലെ വൺപ്ലസ് 9, വൺപ്ലസ് 9 പ്രോ സ്മാർട്ട്ഫോണുകളും ഈ ചിപ്പ്സെറ്റുമായി ഇന്ത്യൻ വിപണിയിൽ അവതരിപ്പിക്കും. വിവോ എക്സ്60 സീരിസും വൈകാതെ ഇന്ത്യയിലെത്തും. ഈ ഡിവൈസുകളിലും സമാനമായ ചിപ്പ്സെറ്റ് ഉണ്ടായിരിക്കും. ഓപ്പോ, റിയൽമി, എംഐ എന്നിവയുടെ ഡിവൈസുകളും ഈ ചിപ്പ്സെറ്റുമായി ഇന്ത്യൻ വിപണിയിലെത്തും.

അസൂസ് റോഗ് ഫോൺ 5

ക്വാൽകോം സ്‌നാപ്ഡ്രാഗൺ 888 5ജി എസ്ഒസിയുമായി ഇന്ത്യയിലെത്തുന്ന ആദ്യത്തെ ഡിവൈസ് അസൂസിനറെ പുതിയ ഗെയിമിങ് സ്മാർട്ട്ഫോണായ റോഗ് ഫോൺ 5 ആയിരിക്കും. ഈ ഡിവൈസ് മാർച്ച് 10ന് ഔദ്യോഗികമായി അവതരിപ്പിക്കും. ഈ ഡിവൈസ് റോഗ് ഫോൺ 3യുടെ പിൻഗാമിയാണ്. മുൻഗാമിയെക്കാൾ മികച്ച സവിശേഷതകളുമായിട്ടായിരിക്കും ഈ സ്മാർട്ട്ഫോൺ വിപണിയിൽ എത്തുന്നത്. ഉയർന്ന റിഫ്രഷ് റേറ്റ് ഡിസ്‌പ്ലേ, വേഗതയേറിയ ചാർജിങ് സപ്പോർട്ടുള്ള ബാറ്ററി എന്നിവയും ഈ ഡിവൈസിൽ ഉണ്ടായിരിക്കും.

വൺപ്ലസ് 9, വൺപ്ലസ് 9 പ്രോ

ക്വാൽകോം സ്‌നാപ്ഡ്രാഗൺ 888 5ജി എസ്ഒസി കരുത്ത് നൽകുന്ന വൺപ്ലസിന്റെ പുതിയ ഡിവൈസുകളാണ് വൺപ്ലസ്9, വൺപ്ലസ് 9 പ്രോ എന്നിവ. ഈ ഡിവൈസുകളും മാർച്ചിൽ തന്നെ ലോഞ്ച് ചെയ്യും. വൺപ്ലസ് 8, വൺപ്ലസ് 8 പ്രോ എന്നിവ പോലെ വൺപ്ലസ് 9 സീരിസും പ്രീമിയം ബിൽഡും ഡിസൈനും ഉള്ള സ്റ്റോക്ക് യുഐയുമായി വരുന്ന ഡിവൈസ് ആയിരിക്കും. ആപ്പിൾ, സാംസങ് തുടങ്ങിയ ബ്രാൻഡുകളിൽ നിന്നുള്ള ഫ്ലാഗ്ഷിപ്പ് സ്മാർട്ട്‌ഫോണുകളേക്കാൾ വില കുറഞ്ഞ ഡിവൈസാണ് ഇത്.

വിവോ എക്സ്60 പ്രോ, വിവോ എക്സ്60 പ്രോ+

വിവോ എക്സ് 60 പ്രോ, വിവോ എക്സ് 60 പ്രോ+ എന്നിവയും മാർച്ചിൽ ഇന്ത്യൻ വിപണിയിൽ എത്തിയേക്കും. ക്വാൽകോം സ്നാപ്ഡ്രാഗൺ 888 എസ്ഒസിയുടെ കരുത്തുള്ള ഈ ഡിവൈസ് പ്രീമിയം ഡിവൈസിന്റെ എല്ലാ സവിശേഷതകളുമായിട്ടായിരിക്കും വരുന്നത്. മികച്ച ക്യാമറ എക്സ്പീരിയൻസ്, വെഗൻ ലെതർ പോലുള്ള വസ്തുക്കൾ ഉപയോഗിച്ചുള്ള പ്രീമിയം ഡിസൈൻ എന്നിവ ഈ ഡിവൈസിൽ ഉണ്ടായിരിക്കും.

ഓപ്പോ ഫൈൻഡ് എക്സ്3, ഓപ്പോ ഫൈൻഡ് എക്സ്3 പ്രോ

ഓപ്പോ ഫൈൻഡ് എക്സ്3, ഓപ്പോ ഫൈൻഡ് എക്സ്3 പ്രോ സ്മാർട്ട്ഫോണുകൾ മാർച്ച് അവസാനത്തോടെ ഇന്ത്യൻ വിപണിയിൽ എത്തും. പ്രീമിയം ഗ്ലാസ്-സാൻഡ്‌വിച്ച് ഫിനിഷും ക്യാമറ മൊഡ്യൂളുമുള്ള ഈ ഡിവൈസ് ഇന്ത്യയിലെ പ്രീമിയം ഡിവൈസുകളുടെ വിപണി ലക്ഷ്യമിട്ടാണ് വരുന്നത്.

റിയൽ‌മി ജിടി

ക്വാൽകോം സ്‌നാപ്ഡ്രാഗൺ 888 എസ്ഒസിയുടെ കരുത്തിൽ പ്രവർത്തിക്കുന്ന റിയൽമി ജിടി സ്മാർട്ട്ഫോണിൽ ഉയർന്ന റിഫ്രഷ് റേറ്റ് ഡിസ്‌പ്ലേയാണ് ഉള്ളത്. ഈ ഡിവൈസ് മാർച്ചിൽ ഇന്ത്യൻ വിപണിയിൽ എത്തുമെന്ന് പ്രതീക്ഷിക്കുന്നു. ഈ ഡിവൈസ് ക്വാൽകോം സ്‌നാപ്ഡ്രാഗൺ 888 എസ്ഒസിയുമായി വരുന്ന ഏറ്റവും വില കുറഞ്ഞ സ്മാർട്ട്‌ഫോണുകളിൽ ഒന്നായിരിക്കുമെന്നാണ് സൂചനകൾ.

ഷവോമി എംഐ 11

ക്വാൽകോം സ്‌നാപ്ഡ്രാഗൺ 888 എസ്ഒസിയുള്ള ലോകത്തിലെ ആദ്യത്തെ സ്മാർട്ട്‌ഫോണുകളിലൊന്നാണ് ഷവോമി എംഐ 11. ഈ ഡിവൈസ് ഇതുവരെ ഇന്ത്യയിൽ അവതരിപ്പിച്ചിട്ടില്ല. എംഐ 10 ഇന്ത്യയിൽ ലോഞ്ച് ചെയ്തതിനാൽ തന്നെ എംഐ 11 ഇന്ത്യയിൽ അവതരിപ്പിക്കുമെന്ന് ഉറപ്പാണ്. വൺ‌പ്ലസ് 9, റോഗ് ഫോൺ 5 എന്നിവയ്ക്ക് പിന്നാലെ വിപണിയിലെ മത്സരം കടുപ്പിക്കാനായി എംഐ 11 വിപണിയിലെത്തിയേക്കും.