Vivo V25 Pro: വിവോ വി25 പ്രോ സ്മാർട്ട്ഫോണിന്റെ ആദ്യ വിൽപ്പന ഓഗസ്റ്റ് 25 മുതൽ

വിവോ വി25 പ്രോ സ്മാർട്ട്ഫോൺ പുതിയ ബയോണിക് കൂളിങ് സിസ്റ്റവുമായി വരുന്നു. മുൻഗാമിക്ക് സമാനമായി, ഈ പുതിയ വിവോ സ്മാർട്ട്‌ഫോണും സെയിലിംഗ് ബ്ലൂ വേരിയന്റിൽ നിറം മാറുന്ന ഫ്ലോറൈറ്റ് എജി ഗ്ലാസ് ഡിസൈനുമായിട്ടാണ് വരുന്നത്. പ്രകാശം ഈ ഡിസൈനിലേക്ക് പതിച്ചാൽ അത് ആകാശനീലയിൽ നിന്ന് സമുദ്രനീലയായി മാറുന്നു. വിവോ വി25 പ്രോ സ്മാർട്ട്ഫോണിന്റെ വിലയും സവിശേഷതകളും വിശദമായി നോക്കാം.

വിവോ വി25 പ്രോ: ഇന്ത്യയിലെ വില

വിവോ വി25 പ്രോ ഇന്ത്യയിൽ സെയിലിംഗ് ബ്ലൂ, പ്യുവർ ബ്ലാക്ക് കളർ ഓപ്ഷനുകളിലാണ് അവതരിപ്പിച്ചിരിക്കുന്നത്. ഈ ഡിവൈസ് രണ്ട് സ്റ്റോറേജ് കോൺഫിഗറേഷനുകളിലാണ് വരുന്നത്. 8 ജിബി റാമും 128 ജിബി സ്റ്റോറേജുമുള്ള ഈ ഡിവൈസിന്റെ ബേസ് വേരിയന്റിന് 35999 രൂപയാണ് വില. 12 ജിബി റാമും 256 ജിബി സ്റ്റോറേജുമുള്ള വേരിയന്റിന് 39,999 രൂപയാണ് വില. ഇന്നലെ മുതൽ ഈ ഡിവൈസ് പ്രീ-ഓർഡറിന് ലഭ്യമായിരുന്നു. ഓഗസ്റ്റ് 25 മുതൽ ഫ്ലിപ്പ്കാർട്ട്, വിവോ.കോം, ഓഫ്‌ലൈൻ സ്റ്റോറുകൾ എന്നിവ വഴി ഈ ഡിവൈസ് ലഭ്യമാകും.

വിവോ വി25 പ്രോ സ്മാർട്ട്ഫോൺ വാങ്ങുന്ന ആളുകൾക്ക് ആകർഷകമായ ഓഫറുകളും ഡിസ്കൌണ്ടുകളും കമ്പനി പ്രഖ്യാപിച്ചിട്ടുണ്ട്. ഈ ഡിവൈസ് പ്രീ ബുക്ക് ചെയ്യുന്നവർക്ക് എച്ച്‌ഡിഎഫ്‌സി ബാങ്ക് ക്രെഡിറ്റ്, ഡെബിറ്റ് കാർഡുകൾ ഉപയോഗിച്ചാൽ 3,500 രൂപ കിഴിവ് ലഭിക്കും. ഈ കിഴിവോടെ വിവോ വി25 പ്രോ സ്മാർട്ട്ഫോണിന്റെ ബേസ് വേരിയന്റ് 32,499 രൂപയ്ക്ക് സ്വന്തമാക്കാം. 3,000 രൂപ വരെ അധിക എക്‌സ്‌ചേഞ്ച് ബോണസും ഡിവൈസ് വാങ്ങുന്ന ആളുകൾക്ക് ലഭിക്കും.

വിവോ വി25 പ്രോ: സവിശേഷതകൾ

വിവോ വി25 പ്രോ സ്മാർട്ട്ഫോണിൽ 2376 x 1080 പിക്സൽ റെസല്യൂഷനും 19.8:9 അസ്പാക്ട് റേഷിയോവും ഉള്ള 6.56 ഇഞ്ച് FHD+ അമോലെഡ് ഡിസ്‌പ്ലേയുമായിട്ടാണ് വരുന്നത്. 120Hz റിഫ്രഷ് റേറ്റും 300Hz ടച്ച് സാമ്പിൾ റേറ്റുമുള്ള HDR10+ പാനലാണ് ഈ ഡിസ്പ്ലെ. 8 ജിബി/ 12 ജിബി റാമുള്ള ഡിവൈസിൽ, 128 ജിബി /256 ജിബി സ്റ്റോറേജ് സ്പേസും വിവോ നൽകിയിട്ടുണ്ട്. ഒക്ടാ-കോർ മീഡിയടെക് ഡൈമൻസിറ്റി 1300 എസ്ഒസിയുടെ കരുത്തിലാണ് ഈ ഡിവൈസ് പ്രവർത്തിക്കുന്നത്.

വിവോ വി25 പ്രോ സ്മാർട്ട്ഫോൺ ആൻഡ്രോയിഡ് 12ലാണ് പ്രവർത്തിക്കുന്നത്. ഈ ഡിവൈസിൽ മൂന്ന് പിൻക്യാമറകളാണ് ഉള്ളത്. ഇതിൽ എഫ്/1.89 അപ്പേർച്ചറും ഒഐഎസും ഉള്ള 64 എംപി പ്രൈമറി സെൻസറാണ് നൽകിയിട്ടുള്ളത്. എഫ്/2.4 ആൾട്രാ വൈഡ് ലെൻസുള്ള 8 എംപി സെക്കൻഡറി ലെൻസും ഡിവൈസിലുണ്ട്. മൂന്നാമത്തെ ക്യാമറ എഫ്/2.2 അപ്പർച്ചറുള്ള 2 എംപി മാക്രോ ലെൻസ് ക്യാമറയാണ്. 60എഫ്പിഎസിൽ 4കെ വീഡിയോ റെക്കോർഡിങ് സപ്പോർട്ട് വരെ ഈ ക്യാമറയ്ക്ക് ഉണ്ട്.

സെൽഫികൾക്കും വീഡിയോ കോളുകൾക്കുമായി വിവോ വി25 പ്രോ സ്മാർട്ട്ഫോണിൽ 32 എംപി ക്യാമറയാണുള്ളത്. ഇൻ-ഡിസ്‌പ്ലേ ഫിംഗർപ്രിന്റ് സെൻസർ, യുഎസ്ബി ടൈപ്പ്-സി പോർട്ട്, 32എംപി സെൽഫി ക്യാമറ സെൻസർ, ഡ്യുവൽ സിം സപ്പോർട്ട്, 66W ഫ്ലാഷ്‌ചാർജ് ഫാസ്റ്റ് ചാർജിങ് സപ്പോർട്ടുള്ള 4830mAh ബാറ്ററി എന്നിവയാണ് വിവോ വി25 പ്രോയുടെ മറ്റ് സവിശേഷതകൾ.