വിവോ എക്സ്60 സീരീസിനൊപ്പം വിവോ എക്സ് 50 പ്രോ+ സ്മാർട്ട്ഫോണും ഇന്ത്യൻ വിപണിയിലെത്തും

2020 ജൂണിൽ ചൈനയിൽ മറ്റ് രണ്ട് വിവോ എക്സ് 50 സീരീസ് ഫോണുകൾക്കൊപ്പ തന്നെ വിവോ എക്സ് 50 പ്രോ + പുറത്തിറക്കിയെങ്കിലും ഇന്ത്യയിൽ വിവോ എക്സ് 50 പ്രോ+ അവതരിപ്പിച്ചിരുന്നില്ല. 2020 ഡിസംബറിൽ ചൈനയിൽ ലോഞ്ച് ചെയ്ത വിവോ എക്സ് 60 സീരീസിനൊപ്പം മാർച്ച് അവസാനമോ ഏപ്രിൽ ആരംഭത്തിലോ പ്രോ+ വേരിയൻറ് ഇന്ത്യൻ വിപണിയിലെത്തുമെന്ന് 91 മൊബൈൽസ് റിപ്പോർട്ട് ചെയ്തു. ചൈനയിൽ വിവോ എക്സ് 60 സീരീസ് ലോഞ്ചിൽ വിവോ എക്സ് 60 പ്രോ + ഉണ്ടായിരുന്നില്ല. പിന്നീട് ജനുവരിയിലാണ് ഈ ഡിവൈസ് അവതരിപ്പിച്ചത്.

ചൈനയിലെ വിവോ എക്സ്60 സീരിസിന്റെ ലോഞ്ചിൽ നിന്നും വിവോ എക്സ് 60 പ്രോ+ മാറ്റി വച്ചിരുന്നതിനാൽ തന്നെ ഇന്ത്യയിലും ഈ ഡിവൈസ് വൈകിയായിരിക്കും അവതരിപ്പിക്കുന്നത്.വിവോ എക്സ് 60, വിവോ എക്സ് 60 പ്രോ, വിവോ എക്സ് 50 പ്രോ + എന്നീ ഡിവൈസുകളായിരിക്കും അടുത്ത ലോഞ്ച് ഇവന്റിലൂടെ ഇന്ത്യൻ വിപണിയിൽ അവതരിപ്പിക്കുന്നത്. വിവോ എക്സ് 60 സീരീസ് ലോഞ്ചുമായി ബന്ധപ്പെട്ട കാര്യങ്ങൾ ഇതുവരെ വിവോ ഔദ്യോഗികമായി വെളിപ്പെടുത്തിയിട്ടില്ല.

വിവോ എക്സ് 50 പ്രോ+: സവിശേഷതകൾ

വിവോ എക്സ് 50 പ്രോ+ സ്മാർട്ട്ഫോണിന് കരുത്ത് നൽകുന്നത് സ്നാപ്ഡ്രാഗൺ 865 എസ്ഒസിയാണ്. വിവോ എക്സ്50 സീരിസിലെ മറ്റ് രണ്ട് വേരിയന്റുകളും സ്നാപ്ഡ്രാഗൺ 765ജി എസ്ഒസിയുമായിട്ടാണ് വിപണിയിൽ എത്തിയത്. അതുകൊണ്ട് തന്നെ മറ്റ് ഡിവൈസുകളെ അപേക്ഷിച്ച് കരുത്തുള്ള ഡിവൈസാണ് വിവോ എക്സ് 50 പ്രോ+. 6.56 ഇഞ്ച് ഡിസ്പ്ലെയാണ് ഈ ഡിവൈസിൽ ഉള്ളത്. ഈ ഡിസ്പ്ലെയിൽ 120 ഹെർട്സ് റിഫ്രഷ് റേറ്റാണ് ഉള്ളത്. ഇത് മികച്ചൊരു ഡിസ്പ്ലെയാണ്. ഗെയിമിങ് അടക്കമുള്ള കാര്യങ്ങളിൽ മികച്ച അനുഭവം നൽകുന്ന ഡിവൈസാണ് ഇത്.

വിവോ എക്സ് 50 പ്രോ+ സ്മാർട്ട്ഫോണിൽ നാല് പിൻ ക്യാമറകളാണ് ഉള്ളത്. ഈ ക്വാഡ് ക്യാമറ സെറ്റപ്പിലെ പ്രൈമറി ക്യാമറ 50 മെഗാപിക്സലാണ്. 32 മെഗാപിക്സൽ സെക്കൻഡറി സെൻസർ, രണ്ട് 13 മെഗാപിക്സൽ സെൻസറുകൾ എന്നിവയും ഡിവൈസിൽ ഉണ്ട്. ഡിവൈസിന്റെ മുൻവശത്ത് സെൽഫികൾക്കും വീഡിയോകൾക്കുമായി 32 മെഗാപിക്സൽ ക്യാമറയാണ് ഉള്ളത്. എഫ് / 2.45 അപ്പേർച്ചറുള്ള ഈ ക്യാമറ ഹോൾ-പഞ്ച് കട്ട്ഔട്ടിലാണ് നൽകിയിട്ടുള്ളത്. 44W ഫാസ്റ്റ് ചാർജിങ് സപ്പോർട്ടുള്ള 4,350mAh ബാറ്ററിയാണ് വിവോ എക്സ് 50 പ്രോ+ സ്മാർട്ട്ഫോണിലുള്ളത്.