വിവോ വൈ12ജി സ്മാർട്ട്ഫോൺ ഇന്ത്യൻ വിപണിയിൽ അവതരിപ്പിച്ചു, വില 10,990 രൂപ

വിവോ വൈ12ജി: വില

വിവോ വൈ12ജി സ്മാർട്ട്ഫോൺ ഇന്ത്യയിൽ ഒറ്റ വേരിയന്റിൽ മാത്രമേ ലഭ്യമാവുകയുള്ളു. 3 ജിബി റാമും 32 ജിബി ഇന്റേണൽ സ്റ്റോറേജുമുള്ള ഈ മോഡലിന് 10,990 രൂപയാണ് വില. ഡിവൈസിന്റെ മറ്റ് സ്റ്റോറേജ് വേരിയന്റുകൾ ഇന്ത്യയിൽ അവതരിപ്പിക്കുമോ എന്ന കാര്യംല വ്യക്തമല്ല. ഈ ഡിവൈസ് രണ്ട് കളർ വേരിയന്റുകളിൽ ലഭ്യമാണ്. ഗ്ലേസിയർ ബ്ലൂ, ഫാന്റം ബ്ലാക്ക് എന്നിവയാണ് ഈ നിറങ്ങൾ. ഈ സ്മാർട്ട്ഫോൺ ഇതിനകം തന്നെ കമ്പനിയുടെ വെബ്സൈറ്റിൽ ലഭ്യമാണ്.

വിവോ വൈ12ജി സ്മാർട്ട്ഫോണിൽ 6.51 ഇഞ്ച് ഹാലോ ഫുൾവ്യൂ ഡിസ്പ്ലേയാണ് കമ്പനി നൽകിയിട്ടുള്ളത്. ഈ ഡിസ്പ്ലെയുടെ മുകളിൽ മധ്യഭാഗത്തായി സെൽഫി ക്യാമറ സ്ഥാപിക്കാൻ ഒരു ടിയർ ഡ്രോപ്പ് സ്റ്റൈൽ നോച്ചും നൽകിയിട്ടുണ്ട്. ക്വാൽകോം സ്‌നാപ്ഡ്രാഗൺ 439 എസ്ഒസിയുടെ കരുത്തിലാണ് ഈ സ്മാർട്ട്ഫോൺ പ്രവർത്തിക്കുന്നത്. സ്മാർട്ട്ഫോണിൽ 3 ജിബി റാമും 32 ജിബി ഇന്റേണൽ സ്റ്റോറേജും വിവോ നൽകിയിട്ടുണ്ട്. മൈക്രോ എസ്ഡി കാർഡ് ഉപയോഗിച്ച് സ്റ്റോറേജ് 256 ജിബി വരെ എക്സ്പാൻഡ് ചെയ്യാൻ കഴിയും.

രണ്ട് പിൻക്യാമറകളാണ് വിവോ വൈ12ജി സ്മാർട്ട്ഫോണിൽ ഉള്ളത്. 13 എംപി പ്രൈമറി ലെൻസും 2 എംപി ഡെപ്ത് സെൻസറുമാണ് ഈ ക്യാമറകൾ. ഈ ഡ്യുവൽ ക്യാമറ സെറ്റപ്പിനൊപ്പം എൽഇഡി ഫ്ലാഷും നൽകിയിട്ടുണ്ട്. മുൻവശത്ത് സെൽഫികൾക്കും വീഡിയോ കോളുകൾക്കുമായി 8 എംപി സെൽഫി സെൻസറാണ് നൽകിയിട്ടുള്ളത്. ഈ വില വിഭാഗത്തിൽ ക്വാഡ് ക്യാമറ സെറ്റപ്പുള്ള സ്മാർട്ട്ഫോണുകൾ പോലും ലഭ്യമാകുന്ന അവസരത്തിൽ ഈ ഡിവൈസ് രണ്ട് ക്യാമറകളുമായി വരുന്നു എന്നത് ഒരു പോരായ്മ തന്നെയാണ്.

വിവോ വൈ12ജി സ്മാർട്ട്ഫോണിൽ 5,000 എംഎഎച്ച് ബാറ്ററിയാണ് ഉള്ളത്. 10W സ്റ്റാൻഡേർഡ് ചാർജിങ് സപ്പോർട്ടാണ് ഇതിൽ നൽകിയിട്ടുള്ളത്. 4ജി സപ്പോർട്ട് ചെയ്യുന്ന ഈ ഡിവൈസിൽ കൂടുതൽ സുരക്ഷയ്ക്കായി സൈഡ്-മൗണ്ടഡ് ഫിംഗർപ്രിന്റ് സെൻസറും നൽകിയിട്ടുണ്ട്. സ്മാർട്ട്‌ഫോൺ ഫെയ്‌സ് അൺലോക്ക് സപ്പോർട്ട് ചെയ്യുന്നു. ആൻഡ്രോയിഡ് 11 ബേസ്ഡ് ഫൺടച്ച് ഒഎസിലാണ് ഈ സ്മാർട്ട്ഫോൺ പ്രവർത്തിക്കുന്നത്. സ്റ്റാൻഡേർഡ് കണക്ടിവിറ്റി ഓപ്ഷനുകൾ എല്ലാം ഈ ഡിവൈസിൽ നൽകിയിട്ടുണ്ട്.

വിലയും സവിശേഷതകളും കണക്കിലെടുക്കുമ്പോൾ ഈ സ്മാർട്ട്ഫോൺ ഇന്ത്യൻ വിപണിയിൽ വലിയ വിജയം കാണാൻ സാധ്യതയില്ല. ഈ വില വിഭാഗത്തിൽ ഇതിനെക്കാൾ മികച്ച സ്മാർട്ട്ഫോണുകൾ ലഭ്യമാണ്. അതുകൊണ്ട് തന്നെ 10,000 രൂപയിൽ താഴെ വിലയുള്ള വിഭാഗത്തിലേക്ക് ഈ ഡിവൈസിനെ മാറ്റാതെ വിവോയ്ക്ക് മറ്റ് ഓപ്ഷനുകൾ ഇല്ല. റെഡ്മി, റിയൽമി തുടങ്ങിയ ചൈനീസ് കമ്പനികൾ വിവോ വൈ12ജി സ്മാർട്ട്ഫോണിനറെ അതേ വിലയിൽ നൽകുന്ന സ്മാർട്ട്ഫോണുകൾ സവിശേഷതകളുടെ കാര്യത്തിൽ ഈ ഡിവൈസിനെ വളരെ പിന്നിലാക്കുന്നവയാണ്.