മറ്റൊരു ഷവോമി വിസ്മയം; ഷവോമി 11ഐ, 11ഐ ഹൈപ്പർചാർജ് സ്മാർട്ട്ഫോണുകൾ ഇന്ത്യയിലെത്തി, വില 24,999 രൂപ മുതൽ

Published: Thursday, January 6, 2022, 13:38 [IST]

കുറഞ്ഞ വിലയ്ക്ക് കിടിലൻ സവിശേഷതകളുള്ള സ്മാർട്ട്ഫോണുകൾ പുറത്തിറക്കുന്ന ഷവോമി ഇന്ത്യൻ വിപണിയെ ഷവോമി ഒരിക്കൽ കൂടി ഞെട്ടിച്ചിരിക്കുന്നു. ഷവോമി 11ഐ, 11ഐ ഹൈപ്പർചാർജ് എന്നീ രണ്ട് സ്മാർട്ട്ഫോണുകളാണ് ഇപ്പോൾ കമ്പനി അവതരിപ്പിച്ചിരിക്കുന്നത്. 24,999 രൂപ മുതൽ വില ആരംഭിക്കുന്ന ഈ ഡിവൈസുകളിൽ ഡൈമൻസിറ്റി 920 എസ്ഒസി ചിപ്പ്സെറ്റ്, 120W ഫാസ്റ്റ് ചാർജിങ് സപ്പോർട്ട് തുടങ്ങിയ മികച്ച സവിശേഷതകൾ ഉണ്ട്. ഈ വർഷം ഷവോമി ഇന്ത്യയിൽ എത്തിക്കുന്ന ആദ്യ സ്മാർട്ട്ഫോണുകളാണ് ഇവ. എംഐ 11ഐ സ്മാർട്ട്ഫോണിന്റെ പിൻഗാമികളായിട്ടാണ് ഷവോമി 11ഐ, 11ഐ ഹൈപ്പർചാർജ് എന്നിവ രാജ്യത്ത് എത്തുന്നത്.

ഷവോമി 11ഐ, 11ഐ ഹൈപ്പർചാർജ്: വിലയും ലഭ്യതയും

ഷവോമി 11ഐ സ്മാർട്ട്ഫോണിന്റെ 6 ജിബി റാമും 128 ജിബി സ്റ്റോറേജുമുള്ള ബേസ് വേരിയന്റിന് ഇന്ത്യയിൽ 24,999 രൂപയാണ് വില. 8 ജിബി റാമും 128 ജിബി സ്റ്റോറേജുമുള്ള മോഡലിന് 26,999 രൂപ വിലയുണ്ട്. പുതുവർഷ ഓഫറിന്റെ ഭാഗമായി ഷവോമി ഈ സ്മാർട്ട്ഫോണുകൾക്ക് 1500 രൂപ കിഴിവ് നൽകുന്നു. ഇതിലൂടെ ബേസ് മോഡൽ 23499 രൂപയ്ക്കും ഹൈ എൻഡ് മോഡൽ 25499 രൂപയ്ക്കും ലഭ്യമാകും. ഉപഭോക്താക്കൾക്ക് എസ്ബിഐ കാർഡുകൾ ഉപയോഗിച്ച് ഈ ഡിവൈസുകൾ വാങ്ങിയാൽ 2,000 രൂപ കിഴിവും ലഭിക്കും. ഷവോമി 11ഐ ഹൈപ്പർചാർജ് ഫോണിന്റെ 6 ജിബി റാം 128 ജിബി സ്റ്റോറേജ് വേരിയന്റിന് 26,999 രൂപയും 8 ജിബി റാമും 128 ജിബി സ്റ്റോറേജ് വേരിയന്റിന് 28,999 രൂപയുമാണ് വില. ഓഫറുകൾ ഈ ഡിവൈസിനും ബാധകമാണ്.

ഷവോമി 11ഐ ഹൈപ്പർചാർജ്: സവിശേഷതകൾ

ഷവോമി 11ഐ ഹൈപ്പർചാർജ് സ്മാർട്ട്ഫോണിൽ 6.67-ഇഞ്ച് ഫുൾ-എച്ച്‌ഡി+ (1,080x2,400 പിക്സൽസ്) സൂപ്പർ അമോലെഡ് ഡിസ്‌പ്ലേയാണ് ഉള്ളത്. 20:9 അസ്പാക്ട് റേഷിയോവും 120Hz റിഫ്രഷ് റേറ്റുമുള്ള മികച്ച ഡിസ്പ്ലെയാണ് ഇത്. ഈ ഡിസ്‌പ്ലേയ്ക്ക് 360Hz ടച്ച് സാംപ്ലിംഗ് റേറ്റ്, 395പിപിഐ പിക്‌സൽ ഡെൻസിറ്റി 1,200 നീറ്റ്സ് വരെ പീക്ക് ബ്രൈറ്റ്നസ് എന്നിവയുണ്ട്. മീഡിയടെക് ഡൈമൻസിറ്റി 920 എസ്ഒസിയുടെ കരുത്തിലാണ് ഈ ഡിവൈസ് പ്രവർത്തിക്കുന്നത്. ആൻഡ്രോയിഡ് 11 ബേസ്ഡ് എംഐയുഐ 12.5ആണ് ഡിവൈസിന്റെ ഒഎസ്. 8 ജിബി വരെ റാമും 128 ജിബി വരെ സ്റ്റോറേജുമുള്ള ഡിവൈസിൽ 1 ടിബി വരെ സ്റ്റോറേജ് എക്സ്പാൻഡ് ചെയ്യാനുള്ള മൈക്രോ എസ്ഡി കാർഡ് സപ്പോർട്ടും ഉണ്ട്.

മൂന്ന് പിൻക്യാമറകളുമായിട്ടാണ് ഷവോമി 11ഐ ഹൈപ്പർചാർജ് വരുന്നത്. 108-മെഗാപിക്സൽ പ്രൈമറി സാംസങ് HM2 സെൻസറും എഫ്/1.89 ലെൻസുമുള്ള ഈ ട്രിപ്പിൾ റിയർ ക്യാമറ സെറ്റപ്പിൽ 8-മെഗാപിക്സൽ അൾട്രാ-വൈഡ് ഷൂട്ടറും 2-മെഗാപിക്സൽ മാക്രോ ഷൂട്ടറുമാണ് ഉള്ളത്. ഡിവൈസിന്റെ മുൻവശത്ത് സെൽഫികൾക്കും വീഡിയോ കോളുകൾക്കുമായി എഫ്/2.45 ലെൻസുള്ള 16-മെഗാപിക്സൽ സെൽഫി ക്യാമറ സെൻസറും നൽകിയിട്ടുണ്ട്. 120W ഫാസ്റ്റ് ചാർജിംഗിനെ പിന്തുണയ്ക്കുന്ന 4,500mAh ഡ്യുവൽ-സെൽ ലിഥിയം പോളിമർ ബാറ്ററിയാണ് ഫോൺ പായ്ക്ക് ചെയ്യുന്നത്. ഈ ഫാസ്റ്റ് ചാർജിങ് തന്നെയാണ് ഈ ഡിവൈസിന്റെ ഏറ്റവും വലിയ സവിശേഷത. ഇതിന് 0 ശതമാനത്തിൽ നിന്ന് 100 ശതമാനം ചാർജ് ആകാൻ വെറും 15 മിനുറ്റ് മതി.

5ജി, 4ജി എൽടിഇ വൈഫൈ 6, ബ്ലൂടൂത്ത് വി5.2, ജിപിഎസ്/ എ-ജിപിഎസ്, യുഎസ്ബി ടൈപ്പ്-സി പോർട്ട്, 3.5 എംഎം ഹെഡ്‌ഫോൺ ജാക്ക് എന്നിവയാണ് ഷവോമി 11ഐ ഹൈപ്പർചാർജ് സ്മാർട്ട്ഫോണിലുള്ള കണക്റ്റിവിറ്റി ഓപ്ഷനുകൾ. ആക്സിലറോമീറ്റർ, ആംബിയന്റ് ലൈറ്റ് സെൻസർ, ഗൈറോസ്കോപ്പ്, മാഗ്നെറ്റോമീറ്റർ, പ്രോക്സിമിറ്റി സെൻസർ എന്നിവയും സൈഡ് മൗണ്ടഡ് ഫിംഗർപ്രിന്റ് സെൻസറും ഡിവൈസിൽ ഉണ്ട്. ഡോൾബി അറ്റ്‌മോസിന്റെയും ഹൈ-റെസ് ഓഡിയോ സർട്ടിഫിക്കേൻ സപ്പോർട്ടും ഉള്ള ഡ്യുവൽ സ്പീക്കറുമായാണ്ഈ ഡിവൈസ് വരുന്നത്.

ഷവോമി 11ഐ 5ജി: സവിശേഷതകൾ

ഷവോമി 11ഐ 5ജി സ്മാർട്ട്ഫോൺ ബാറ്ററിയും ഫാസ്റ്റ് ചാർജിങ് സപ്പോർട്ടും ഒഴികെയുള്ള മറ്റെല്ലാ കാര്യങ്ങളിലും ഷവോമി 11ഐ ഹൈപ്പർചാർജ് 5ജി സ്മാർട്ട്ഫോണിന് സമാനമാണ്. ഷവോമി 11ഐ 5ജി ഫോണിൽ 67W ചാർജിങ് സപ്പോർട്ട് ആണ് ഉള്ളത്. ഈ ഡിവൈസിൽ 5,160mAh ബാറ്ററിയാണ് പായ്ക്ക് ചെയ്തിരിക്കുന്നത്. ഈ ഡിവൈസ് റെഡ്മി നോട്ട് 11 പ്രോയുടെ റീ-ബ്രാൻഡഡ് പതിപ്പ് പോലെയാണ് തോന്നുന്നത്.