ഷവോമി റെഡ്മി നോട്ട് 10 പുറത്തിറങ്ങുക സ്‌നാപ്ഡ്രാഗൺ 750 SoCയുടെ കരുത്തോടെ

Published: Friday, September 25, 2020, 16:20 [IST]

ഷവോമി റെഡ്മി നോട്ട് 9 സീരീസ് ഈ വർഷം ആദ്യമാണ് പുറത്തിറങ്ങിയത്. ചില ഓൺലൈൻ റിപ്പോർട്ടുകൾ അനുസരിച്ച് റെഡ്മി നോട്ട് 9ന്റെ അടുത്ത തലമുറയായ നോട്ട് 10 ഡിവൈസുകൾ വികസിപ്പിച്ചുകൊണ്ടിരിക്കുന്ന തിരക്കിലാണ് കമ്പനിയിപ്പോൾ. പുതിയ ക്വാൽകോം സ്‌നാപ്ഡ്രാഗൺ പ്രോസസറോടെയായിരിക്കും ഈ സ്മാർട്ട്ഫോൺ പുറത്തിറങ്ങുകയെന്നാണ് റിപ്പോർട്ടുകൾ. വൈകാതെ ഈ ഡിവൈസ് പുറത്തിറങ്ങുമെന്നും റിപ്പോർട്ടുകൾ സൂചിപ്പിക്കുന്നു.

റെഡ്മി നോട്ട് 10: പ്രതീക്ഷിക്കുന്ന സവിശേഷതകൾ

റെഡ്മി നോട്ട് 10 സ്മാർട്ട്ഫോൺ അധികം വൈകാതെ തന്നെ വിപണിയിലെത്തിക്കാനുള്ള ശ്രമത്തിലാണ് ഷവോമി എന്നാണ് റിപ്പോർട്ടുകൾ. ഇതിനിടെ ഡിവൈസിൽ പുതിയ ക്വാൽകോം സ്‌നാപ്ഡ്രാഗൺ 750 ചിപ്‌സെറ്റായിരിക്കും ഈ ഡിവൈസിൽ ഉണ്ടാവുകയെന്ന് ചില ലീക്ക് റിപ്പോർട്ടുകൾ സൂചിപ്പിക്കുന്നു. ഈ റിപ്പോർട്ട് ശരിയാണെങ്കിൽ ഈ ചിപ്‌സെറ്റുമായി പുറത്തിറങ്ങുന്ന ആദ്യത്തെ ഷവോമി സ്മാർട്ട്‌ഫോണായിരിക്കും റെഡ്മി നോട്ട് 10. ഇതേ പ്രോസസറുമായി ഗാലക്‌സി എ42 5ജി പുറത്തിറക്കാനിരിക്കുകയാണ്.

റെഡ്മി നോട്ട് 10 സ്മാർട്ട്ഫോൺ എപ്പോഴായിരിക്കും പുറത്തിറങ്ങുകയെന്നോ മറ്റ് വിവരങ്ങളോ ഷവോമി ഇതുവരെ വെളിപ്പെടുത്തിയിട്ടില്ല. ഈ ഡിവൈസിന്റെ പ്രോസസറുമായി ബന്ധപ്പെട്ട സൂചനകളും കമ്പനി നൽകിയിട്ടില്ല. അതുകൊണ്ട് തന്നെ ഈ ലീക്ക് റിപ്പോർട്ട് എത്രത്തോളം ശരിയായിരിക്കുമെന്നും വ്യക്തമല്ല. മോഡൽ നമ്പർ M2007J17C ഉള്ള എംഐ 10ടി ചൈനയിൽ റെഡ്മി നോട്ട് 10 ആയി എത്തുമെന്നും സൂചനകളുണ്ട്.

ഈ ഹാൻഡ്‌സെറ്റ് ഇതിനകം തന്നെ യുഎസിലെ എഫ്‌സിസി, ഇന്ത്യയിലെ ബിഐഎസ് (ബ്യൂറോ ഓഫ് ഇന്ത്യൻ സ്റ്റാൻഡേർഡ്സ്) എന്നിവ ഉൾപ്പെടെ നിരവധി സർട്ടിഫിക്കേഷനുകൾ നേടിയിട്ടുണ്ട്. ഇന്ത്യൻ വിപണിയിലും ഈ ഡിവൈസ് വൈകാതെ പുറത്തിറങ്ങുമെന്ന സൂചനയാണിത്. സ്മാർട്ട്‌ഫോൺ 4,820 എംഎഎച്ച് ബാറ്ററിയുമായിട്ടായിരിക്കും പുറത്തിറങ്ങുകയെന്നും റിപ്പോർട്ടുകളുണ്ട്. ഡിവൈസിന്റെ ക്യാമറ, ഡിസ്‌പ്ലേ പോലുള്ള മറ്റ് കാര്യങ്ങളെക്കുറിച്ച് ഇതുവരെ വിവരങ്ങളൊന്നും ലഭ്യമായിട്ടില്ല.

ഇന്ത്യയിലും ചൈനയിലും റെഡ്മി നോട്ട് 10 എപ്പോൾ അവതരിപ്പിക്കുമെന്ന് ഷവോമി ഇതുവരെ സൂചനകളൊന്നും നൽകിയിട്ടില്ലെങ്കിലും ഈ ഡിവൈസ് ഒക്ടോബറിൽ എത്തുമെന്നാണ് ചില റിപ്പോർട്ടുൾ സൂചിപ്പിക്കുന്നത്. പുറത്തിറങ്ങാനിരിക്കുന്ന ഈ ഹാൻഡ്‌സെറ്റിനെക്കുറിച്ച് വരും ദിവസങ്ങളിൽ കൂടുതൽ റിപ്പോർട്ടുകൾ പുറത്ത് വരുമെന്നാണ് പ്രതീക്ഷിക്കുന്നത്. കൂടുതൽ ഹാർഡ്വെയർ വിവരങ്ങളും ലോഞ്ച് തിയ്യതിയും വരും ദിവസങ്ങളിൽ അറിഞ്ഞേക്കും.

കഴിഞ്ഞ മാർച്ചിലാണ് ഇന്ത്യൻ വിപണിയിൽ റെഡ്മി നോട്ട് 9 സീരിസ് സ്മാർട്ട്ഫോണുകൾ പുറത്തിറങ്ങാനാരംഭിച്ചത്, റെഡ്മി നോട്ട് 9 പ്രോ, നോട്ട് 9 പ്രോ മാക്സ് എന്നീ സ്മാർട്ട്ഫോണുകളാണ് ഈ സീരിസിൽ നിന്നും ആദ്യം വിപണിയിലെത്തിയത്. പിന്നീട് നിരവധി സ്മാർട്ട്ഫോണുകൾ സീരിസിൽ പുറത്തിറക്കി. പ്രോ, മാക്സ് വേരിയന്റുകൾ ഈ അടുത്താണ് ഓപ്പൺ സെയിലിലൂടെ ലഭ്യമാക്കിയത്. ഇതുവരെ ഈ സ്മാർട്ട്ഫോണുകൾ ഇന്ത്യയിൽ ഫ്ലാഷ് സെയിലിലൂടെ മാത്രമേ ലഭ്യമായിരുന്നുള്ളു.