Redmi Note 8 Price: ഷവോമി റെഡ്മി നോട്ട് 8ന്റെ വില വർദ്ധിപ്പിച്ചു

റെഡ്മി നോട്ട് 8 പ്രോയ്‌ക്കൊപ്പം ഇന്ത്യയിൽ 9,999 രൂപ വിലയിലാണ് റെഡ്മി നോട്ട് 8ന്റെ ബേസ് വേരിയന്റ് പുറത്തിറക്കിയത്. ഇപ്പോൾ 10,499 രൂപയിലേക്ക് വില ഉയർത്തിയ റെഡ്മി നോട്ട് 8ന്റെ പ്രധാന സവിശേഷതകൾ സ്നാപ്ഡ്രാഗൺ 665 SoC, 48 എംപി ക്വാഡ് ക്യാമറ സജ്ജീകരണം, MIUI 11, 18W ഫാസ്റ്റ് ചാർജറുള്ള 4000mAh ബാറ്ററി എന്നിവയാണ്. മുൻകൂട്ടി അറിയിക്കാതെയാണ് വില വർദ്ധനവ് ഉണ്ടായത് എന്ന കാര്യവും ശ്രദ്ധേയമാണ്.

ഇന്ത്യയിൽ റെഡ്മി നോട്ട് 8 വില 500 രൂപ ഉയർത്തി

ഇന്ത്യയിൽ സാധാരണയായി സ്മാർട്ട്‌ഫോണുകളുടെ വിലവർധിപ്പിക്കുന്ന കമ്പനിയല്ല ഷവോമി. എംഐ എ3, റെഡ്മി കെ 30, റെഡ്മി കെ 20 പ്രോ തുടങ്ങിയ ഡിവൈസുകളുടെ വില സ്ഥിരമായി കുറയ്ക്കുമെന്ന് ബ്രാൻഡ് അടുത്തിടെ പ്രഖ്യാപിച്ചിരുന്നു. പക്ഷേ നേരത്തെ പ്രഖ്യാപിക്കാതെ റെഡ്മി നോട്ട് 8ന്റെ വിലവർദ്ധിപ്പിച്ചത് പതിവിന് വിപരീതമായ കാര്യമാണ്.

റെഡ്മി നോട്ട് 8ന്റെ അടിസ്ഥാന വേരിയന്റിന്റെ പുതിയ വിലയായ 10,499 രൂപ ഇതിനകം ആമസോൺ ഇന്ത്യയിലും എംഐ.കോമിലും പ്രാബല്യത്തിൽ വന്നു. ഓഫ്‌ലൈൻ സ്റ്റോറുകളിൽ ഡിവൈസ് ഇതിനകം തന്നെ 10,499 രൂപയ്ക്കാണ് വിൽക്കുന്നത്. 6 ജിബി റാമും 128 ജിബി ഇന്റേണൽ സ്റ്റോറേജുമുള്ള നോട്ട് 8 ന്റെ ഹൈ എൻഡ് മോഡൽ ഇപ്പോഴും 12,999 രൂപയ്ക്ക് ലഭ്യമാണ്. റെഡ്മി നോട്ട് 8 നൊപ്പം ലോഞ്ച് ചെയ്ത റെഡ്മി നോട്ട് 8 പ്രോയ്ക്കും വിലവർദ്ധിച്ചിട്ടില്ല.

ഷവോമി റെഡ്മി നോട്ട് 8: സവിശേഷതകൾ

വിവോ യു 20, റിയൽ‌മി 3 പ്രോ, ഷവോമിയുടെ തന്നെ എംഐ എ3 എന്നിവയെ വെല്ലുവിളിക്കുന്ന റെഡ്മി നോട്ട് 8 വളരെ നല്ല ബജറ്റ് സ്മാർട്ട്‌ഫോണാണ്. കോർണിംഗ് ഗോറില്ല ഗ്ലാസ് 5 പ്രോട്ടക്ഷനും ഡോട്ട് നോച്ചും ഉള്ള 6.3 ഇഞ്ച് ഫുൾ എച്ച്ഡി + ഐപിഎസ് എൽസിഡി സ്‌ക്രീനാണ് ഫോണിലുള്ളത്.

ക്വാൽകോം സ്‌നാപ്ഡ്രാഗൺ 665 SoC പ്രോസസറാണ് ഫോണിന് കരുത്ത് നൽകുന്നത്. 4 ജിബി / 6 ജിബി റാമും 64 ജിബി / 128 ജിബി ഓൺബോർഡ് സ്റ്റോറേജും ഈ സ്മാർട്ട്ഫോണിൽ ഉണ്ട്. സ്റ്റോറേജ് വികസിപ്പിക്കാൻ പ്രത്യേക മൈക്രോ എസ്ഡി കാർഡ് സ്ലോട്ടും ഹാൻഡ്‌സെറ്റിലുണ്ട്.

റെഡ്മി നോട്ട് 8 ലെ ക്യാമറകളിൽ 48 എംപി സാംസങ് ഐസോസെൽ ജിഎം 1 സെൻസർ ഉൾപ്പെടുത്തിയിട്ടുണ്ട്. 8 എംപി അൾട്രാവൈഡ് ആംഗിൾ സെൻസർ, 2 എംപി ഡെപ്ത് സെൻസർ, 2 എംപി മാക്രോ സെൻസർ എന്നിവയുമായാണ് ഫോൺ പുറത്തിറക്കിയിരിക്കുന്നത്. യുഎസ്ബി ടൈപ്പ്-സി പോർട്ട് നൽകിയിട്ടുള്ള ഫോണിന് 4000 എംഎഎച്ച് ബാറ്ററിയാണ് ഉള്ളത്. റീട്ടെയിൽ ബോക്സിനുള്ളിൽ 18W ഫാസ്റ്റ് ചാർജറും ഷവോമി നൽകുന്നുണ്ട്.

ചൈനയിൽ പടർന്ന് പിടിക്കുന്ന കൊറോണ വൈറസിന്റെ പശ്ചാത്തലത്തിലാണ് ഷവോമി റെഡ്മി നോട്ട് 8ന്റെ വില വർദ്ധിപ്പിച്ചതെന്നും റിപ്പോർട്ടുകളുണ്ട്. കൊറോണ കാരണം ഷവോമിയുടെ നിർമ്മാണ വിതരണ ശൃങ്കല താറുമാറായിരിക്കുകയാണ്. ഈ അവസ്ഥ തുടർന്നാൽ മറ്റ് ചൈനീസ് നിർമ്മിത ഫോണുകൾക്കും വില വർദ്ധിക്കാൻ സാധ്യതയുണ്ട്.