289 രൂപയുടെ പുതിയ പ്ലാനുമായി എയർടെൽ, 79 രൂപ പ്ലാനിൽ സീ5 സബ്ക്രിപ്ഷനും ലഭ്യമാക്കും

149 രൂപയ്ക്ക് മുകളിലുള്ള കോംബോ പ്ലാനിനൊപ്പം നൽകിയിരുന്ന സീ5 സബ്ക്രിപ്ഷൻ ഇനി മുതൽ 79 രൂപ പ്ലാനിലൂടെയും ലഭിക്കും. 30 ദിവസത്തേക്കാണ് സീ5 സബ്ക്രിപ്ഷൻ നൽകുന്നത്. ഇതിനൊപ്പം തന്നെ കമ്പനി പുതുതായി 289 രൂപ പ്ലാനും അവതരിപ്പിച്ചു. 28 ദിവസത്തെ വാലിഡിറ്റിയുള്ള പ്ലാനാണ് ഇത്. ഡാറ്റ, കോളിംഗ്, എസ്എംഎസ് ആനുകൂല്യങ്ങൾക്കൊപ്പം സൌജന്യ സീ5 സബ്സ്ക്രിപ്ഷനും ഈ പ്ലാനിലൂടെ ലഭിക്കും.

എയർടെൽ 289 രൂപ പ്ലാൻ

എയർടെല്ലിന്റെ പുതിയ 289 രൂപ പ്രീപെയ്ഡ് പ്ലാൻ എല്ലാ നെറ്റ്‌വർക്കിലേക്കും അൺലിമിറ്റഡ് കോളിംഗ്, പ്രതിദിനം 1.5 ജിബി ഡാറ്റ, 28 ദിവസത്തേക്ക് എസ്എംഎസ് ആനുകൂല്യങ്ങൾ എന്നിവയാണ് നൽകുന്നത്. ഈ ആനുകൂല്യങ്ങൾക്കൊപ്പം മുഴുവൻ സീ5 കാറ്റലോഗ്, എയർടെൽ എക്സ്സ്ട്രീം പ്രീമിയം സബ്സ്ക്രിപ്ഷൻ, ഫ്രീ ഹെലോട്യൂൺസ്, വിങ്ക് മ്യൂസിക്, ഷാ അക്കാദമിയിൽ നിന്നും ഒരു വർഷത്തേക്ക് സൌജന്യ ഓൺലൈൻ കോഴ്സുകൾ, ഫാസ്റ്റ് ടാഗിൽ 150 രൂപ ക്യാഷ്ബാക്ക് എന്നീ ആനുകൂല്യങ്ങളും ഈ പ്ലാനിലൂടെ എയർടെൽ നൽകുന്നു.

289 രൂപയുടെ റീചാർജ് പ്ലാൻ 249 രൂപ പ്ലാനിന്റെ അതേ ആനുകൂല്യങ്ങൾ തന്നെയാണ് നൽകുന്നത്. അതുകൊണ്ട് തന്നെ എന്തിനാണ് എയർടെൽ ഈ പുതിയ പ്ലാൻ ആരംഭിച്ചതെന്ന് വ്യക്തമല്ല. പുതുതായി ആരംഭിച്ച 289 രൂപ പ്ലാൻ വന്നതിനാൽ 249 രൂപ പ്ലാനിനൊപ്പം നൽകുന്ന സൌജന്യ സീ5 സബ്സ്ക്രിപ്ഷൻ ആനുകൂല്യം കമ്പനി അവസാനിപ്പിച്ചേക്കും. എയർടെല്ലിന് 249 മുതൽ 400 രൂപ വരെ വിലയുള്ള പ്രീപെയ്ഡ് പ്ലാനുകളുടെ ഒരു വലിയ നിരതന്നെ ഉണ്ട്. ഈ നിരയിലേക്കാണ് പുതിയ പ്ലാനും ചേരുന്നത്.

സ്മാർട്ട്‌ഫോണുകളിൽ സ്ട്രീമിങ് കണ്ട്ന്റ് കാണുന്നവരുടെ എണ്ണം വൻതോതിൽ വർദ്ധിക്കുന്നതിനാൽ എയർടെല്ലിന്റെ പുതിയ പ്രീപെയ്ഡ് പായ്ക്കുകൾ ഉപഭോക്താക്കൾക്ക് പ്രത്യേക സബ്സ്ക്രിപ്ഷൻ ചാർജുകൾ നൽകാതെ തന്നെ സീ5ലുള്ള മികച്ച കണ്ടന്റുകൾ ആക്സസ് ചെയ്യാൻ സഹായിക്കുന്നുവെന്നും എയർടെൽ 4 ജി ഉപയോക്താക്കൾക്കെല്ലാം ഈ ആനുകൂല്യം പ്രത്യേക റിചാർജുകളിലൂടെ ആസ്വദിക്കാൻ സാധിക്കുമെന്നും ഭാരതി എയർടെല്ലിന്റെ ചീഫ് മാർക്കറ്റിംഗ് ഓഫീസർ ശശ്വത് ശർമ പറഞ്ഞു.

എയർടെൽ 79 രൂപ പ്രീപെയ്ഡ് പ്ലാനിലും ഇപ്പോൾ സീ5 കണ്ടന്റ് സൌജന്യമായി നൽകുന്നു. 79 രൂപ ടോപ്പ് അപ്പ് 30 ദിവസത്തേക്കാണ് സീ5 കണ്ടന്റുകൾ സൌജന്യമായി നൽകുന്നത്. എയർടെൽ താങ്ക് ആപ്പിലെ ഡിജിറ്റൽ സ്റ്റോർ സെക്ഷൻ വഴി എല്ലാ എയർടെൽ ഉപഭോക്താക്കൾക്കും ഈ ടോപ്പ്-അപ്പ് ലഭ്യമാകുമെന്ന് എയർടെൽ പത്രക്കുറിപ്പിൽ അറിയിച്ചു. പുതിയ 289 രൂപ പ്ലാനും 79 രൂപ പ്ലാനും ഇന്ത്യയിലുടനീളമുള്ള എല്ലാ എയർടെൽ റീട്ടെയിൽ സ്റ്റോറുകൾ വഴിയും ലഭിക്കും.