ഇന്ത്യയിൽ വൻ പദ്ധതികളുമായി ആമസോൺ; നിക്ഷേപിച്ചത് 4472 കോടി രൂപ

റെഗുലേറ്ററി ഫയലിംഗ് അനുസരിച്ച് കമ്പനി ആമസോൺ സെല്ലർ സർവീസസിൽ 3,400 കോടി രൂപയാണ് നിക്ഷേപിച്ചത്. ഇന്ത്യയിലെ ആമസോൺ പേയിൽ 900 കോടി രൂപയും രാജ്യത്തെ റീട്ടെയിൽ ബിസിനസിൽ 172.5 കോടി രൂപയുമാണ് കമ്പനി നിക്ഷേപിച്ചിരിക്കുന്നത്. ഇന്ത്യയിലെ കമ്പനിയിലെ മേൽപ്പറഞ്ഞ അനുബന്ധ സ്ഥാപനങ്ങൾക്ക് ശക്തമായി മാർക്കറ്റ് ഇവിടെ സൃഷ്ടിക്കുകയാണ് കമ്പനിയുടെ ലക്ഷ്യമെന്ന് വ്യക്തമാണ്.

ഒക്ടോബർ 14 ന് ആമസോൺ കോർപ്പറേറ്റ് ഹോൾഡിംഗ്സ് ലിമിറ്റഡ് ബോർഡ് 10 രൂപ മുഖവിലയുള്ള 340 കോടി ഓഹരികൾ അനുവദിച്ചിരുന്നു. ഈ പ്രമേയത്തിലൂടെ അവകാശ അടിസ്ഥാനത്തിൽ ആമസോൺ സെല്ലർ സർവീസസ് ലിമിറ്റഡ് 3,400 കോടി രൂപയാണ് സമാഹരിച്ചതെന്ന് ചെന്നൈ ആസ്ഥാനമായുള്ള ബിസിനസ് ഇന്റലിജൻസ് പ്ലാറ്റ്‌ഫോമായ പേപ്പർ വിസി വ്യക്തമാക്കിയതായി വാർത്താ ഏജൻസി ഉദ്ധരിക്കുന്നു.

ഒക്ടോബർ 17 ന് ഹോൾഡിംഗ് സ്ഥാപനം 10രൂപ മുഖവിലയുള്ള 17.25 കോടി ഓഹരികൾ അനുവദിക്കുകയും 172.5 കോടി രൂപ ന്യൂഡൽഹി ആസ്ഥാനമായുള്ള ആമസോൺ റീട്ടെയിൽ ഇന്ത്യ ലിമിറ്റഡിന് നൽകുകയും ചെയ്തിരുന്നു. ഇതാദ്യമായല്ല ആമസോൺ ഇന്ത്യയിൽ നിക്ഷേപം നടത്തുന്നത്. ഫ്ലിപ്കാർട്ടിനോട് കടുത്ത പോരാട്ടം നടത്താൻ ഇന്ത്യൻ വിപണിയിൽ 5 ബില്യൺ ഡോളർ പമ്പ് ചെയ്യാനൊരുങ്ങുന്നതായി കമ്പനി നേരത്തെ പ്രഖ്യാപിച്ചിരുന്നു.

വാൾമാർട്ടിൻറെ സപ്പോർട്ടിൽ ഫ്ലിപ്കാർട്ട് അടുത്തിടെ ദീപാവലി വിൽപ്പന സമയത്ത് അതിന്റെ സപ്ലൈ ചെയിൻ മാനേജുമെന്റ്, ഇൻഫ്രാസ്ട്രക്ചർ, മാർക്കറ്റിംഗ് എന്നിവയിൽ ദശലക്ഷക്കണക്കിന് ഡോളർ നിക്ഷേപിച്ചിരുന്നു. 2019ൻറെ മൂന്നാം പാദത്തിൽ അറ്റവിൽപ്പന 24 ശതമാനം ഉയർന്ന് 70.0 ബില്യൺ ഡോളറിലെത്തിയെന്ന് ആമസോൺ അടുത്തിടെ പ്രഖ്യാപിച്ചിരുന്നു. കഴിഞ്ഞ വർഷം ഇതേ കാലയളവിൽ 56.6 ബില്യൺ ഡോളറായിരുന്നു ആമസോണിൻറെ അറ്റവില്പന.

എന്തായാലും ഈ കാലയളവിൽ കമ്പനിയുടെ അറ്റവരുമാനം 2.1 ബില്യൺ ഡോളറായി കുറഞ്ഞുവെന്ന് കമ്പനി വ്യക്തമാക്കി. കണക്കുകൾ വെളിപ്പെടുത്തുമ്പോൾ ആമസോണിന്റെ സ്ഥാപകനും സിഇഒയും പറയുന്നത് രണ്ട് ദിവസത്തിൽ നിന്ന് ഒരു ദിവസത്തിലേക്കുള്ള പ്രൈമിൻറെ മാറ്റം ഉപയോക്താക്കൾ ഇഷ്ടപ്പെടുന്നു ഈ വർഷം സൌജന്യ വൺ ഡേ ഡെലിവറി ഉപയോഗിച്ച് ഉപയോക്താക്കൾ കോടിക്കണക്കിന് സാധനങ്ങൾ ഓർഡർ ചെയ്തിട്ടുണ്ട്. ഇത് ഒരു വലിയ നിക്ഷേപമാണ് ഉപയോക്താക്കളെ സംബന്ധിച്ചും ദീർഘകാലാടിസ്ഥാനത്തിൽ നോക്കുമ്പോൾ നല്ല തീരുമാനമായിരുന്നു അത്.