എയർടെല്ലിൽ രണ്ട് ബില്യൺ ഡോളർ നിക്ഷേപിക്കാനൊരുങ്ങി ആമസോൺ

ചർച്ചകൾ വിജകരമായി പൂർത്തിയാക്കിയാൽ ഭാരതി എയർടെല്ലിന്റെ നിലവിലെ വിപണി മൂല്യത്തെ അടിസ്ഥാനമാക്കി ഏകദേശം 5 ശതമാനം ഓഹരി ആമസോൺ സ്വന്തമാക്കുമെന്ന് റിപ്പോർട്ടുകൾ സൂചിപ്പിക്കുന്നു. നിലവിൽ 300 ദശലക്ഷത്തിലധികം വരിക്കാരുള്ള ഇന്ത്യയിലെ മൂന്നാമത്തെ വലിയ ടെലികോം കമ്പനിയാണ് എയർടെൽ. കഴിഞ്ഞ കുറച്ച് മാസങ്ങളായി കടുത്ത സാമ്പത്തിക പ്രതിസന്ധിയാണ് എയർടെൽ നേരിടുന്നത്.

എയർടെല്ലിന്റെ ടെലികോം എതിരാളിയായ ജിയോയുടെ ഉടമസ്ഥതരായ റിലയൻസ് ഇൻഡസ്ട്രീസിന്റെ ഡിജിറ്റൽ വിഭാഗത്തിന്റെ ഷെയറുകൾ ആഗോള കമ്പനികൾ സ്വന്തമാക്കുന്ന സമയത്താണ് ആമസോണും ഭാരതി എയർടെല്ലും തമ്മിലുള്ള ചർച്ചകൾ നടക്കുന്നത് എന്നതാണ് ശ്രദ്ധേയം. ഫേയ്‌സ്ബുക്ക്, കെകെആർ എന്നീ കമ്പനികളിൽ നിന്ന് റിലയൻസിന്റെ ഡിജിറ്റൽ യൂണിറ്റ് കഴിഞ്ഞ ആഴ്ചകളിൽ 10 ബില്യൺ ഡോളറാണ് സമാഹരിച്ചത്.

ഭാരതി എയർടെല്ലും ആമസോണും തമ്മിലുള്ള ചർച്ചകൾ പ്രാരംഭ ഘട്ടത്തിലാണ്. കരാർ നിബന്ധനകൾ ഇരു കമ്പനികളും അംഗീകരിച്ചാൽ മാത്രമേ മറ്റുള്ള നടപടിക്രമങ്ങളിലേക്ക് കടക്കുകയുള്ളു. റിപ്പോർട്ടുകൾ പ്രകാരം ഇക്കാര്യത്തിൽ ആമസോണിന്റെ ഭാഗത്ത് നിന്നും വ്യക്തത ഉണ്ടായിട്ടില്ല. എല്ലാ ഡിജിറ്റൽ പ്ലാറ്റ്ഫോമുകളുടെയും ഉൽപ്പന്നങ്ങൾ, ഉള്ളടക്കം, സേവനങ്ങൾ എന്നിവ ഉപഭോക്താക്കളിലേക്ക് എത്തിക്കാൻ വേണ്ടിയുള്ള പ്രവർത്തനങ്ങൾ മാത്രമാണ് നടത്തുന്നത് എന്നും അതിനപ്പുറത്തേക്ക് കരാറുകളൊന്നും ഇല്ലെന്നും എയർടെൽ അധികൃതർ പറഞ്ഞതായി ലൈവ് മിന്റ് റിപ്പോർട്ട് ചെയ്തു.

1.3 ബില്യൺ ജനങ്ങളുള്ള ഇന്ത്യയിൽ വർദ്ധിച്ചുവരുന്ന ഇന്റർനെറ്റ്, സ്മാർട്ട്‌ഫോൺ ഉപഭോഗം കണക്കിലെടുത്തുകൊണ്ട് ആമസോൺ അടുത്ത കാലത്തായി വോയ്‌സ് ആക്റ്റിവേറ്റഡ് സ്പീക്കറുകൾ, വീഡിയോ സ്ട്രീമിംഗ്, ക്ലൗഡ് സ്റ്റോറേജ് എന്നിവ ലഭ്യമാക്കിയിരുന്നു. ഇന്ത്യൻ വിപണിയുടെ സ്വഭാവം തിരിച്ചറിഞ്ഞ് ടെലിക്കോം വ്യവസായത്തിന്റെ പ്രധാന്യം കണക്കിലെടുത്താണ് അന്താരാഷ്ട്ര കമ്പനികൾ ഇന്ത്യയിലെ ടെലിക്കോം കമ്പനികളുടെ ഓഹരികൾ സ്വന്തമാക്കാനൊരുങ്ങുന്നത്. എയർടെൽ, ആമസോൺ കരാറുമായി ബന്ധപ്പെട്ട ഔദ്യോഗിക വിവരങ്ങൾ അടുത്ത ദിവസങ്ങളിൽ പുറത്ത് വരും.