ബിഎസ്എൻഎൽ പ്രീപെയ്ഡ് പ്ലാനുകളുടെ ആനുകൂല്യങ്ങൾ വെട്ടികുറച്ചു

നിലവിലെ മാർക്കറ്റ് വിലകൾ അനുസരിച്ച് എആർപിയു 200 രൂപയാക്കി ഉയർത്താൻ വളരെ ബുദ്ധിമുട്ടാണ്. അതുകൊണ്ടാണ് ഓപ്പറേറ്റർമാർ താരിഫ് വർധനയിലേക്ക് നീങ്ങുന്നത്. പ്ലാനുകളുടെ വില വർദ്ധിപ്പിക്കുകയോ അവരുടെ നിലവിലുള്ള പ്ലാനുകളുടെ ആനുകൂല്യങ്ങൾ കുറച്ച് പഴയ വിലയ്ക്ക് നൽകിയോ ആണ് എആർപിയു വർധിപ്പിക്കാൻ ശ്രമിക്കുന്നത്. മറ്റ് ടെലിക്കോം കമ്പനികൾ താരിഫ് നിരക്ക് ഉയർത്തുമ്പോൾ ബിഎസ്എൻഎൽ ആനുകൂല്യങ്ങളിൽ ചെറിയ മാറ്റങ്ങൾ വരുത്തി പരോക്ഷമായാണ് താരിഫ് വർദ്ധനവ് നടപ്പാക്കിയത്.

ബിഎസ്എൻഎൽ മൂന്ന് താരിഫ് വൌച്ചറുകളിലാണ് മാറ്റം വരുത്തിയിരിക്കുന്നത്. 49 രൂപ, 75 രൂപ, 94 രൂപ നിരക്കുകളിൽ ലഭിക്കുന്ന താരിഫ് വൌച്ചറുകൾക്കാണ് മാറ്റം. ഇത് കൂടാതെ നാല് പ്ലാൻ വൌച്ചറുകളിലും മാറ്റം വരുത്തിയിട്ടുണ്ട്. 106 രൂപ, 107 രൂപ, 197 രൂപ, 397 രൂപ പ്ലാൻ വൗച്ചറുകളുടെ ആനുകൂല്യങ്ങളാണ് കുറച്ചിരിക്കുന്നത്. സർക്കാർ ഉടമസ്ഥതയിൽ ഉള്ള ടെലികോം കമ്പനി തങ്ങളുടെ പ്ലാനുകളിൽ വരുത്തിയ മാറ്റങ്ങൾ പ്രാബല്യത്തിൽ വന്നുകഴിഞ്ഞു.

ബിഎസ്എൻഎല്ലിന്റെ 49 രൂപ എസ്ടിവി ഉപയോക്താക്കൾക്ക് 28 ദിവസത്തെ വാലിഡിറ്റിയാണ് നൽകിയിരുന്നത്. ഈ പ്ലാൻ ഇനിമുതൽ 24 ദിവസം മാത്രം വാലിഡിറ്റിയേ നൽകുകയുള്ളു. അതുപോലെ 60 ദിവസത്തെ വാലിഡിറ്റി നൽകിയിരുന്ന 75 രൂപ എസ്ടിവി ഇനി മുതൽ 50 ദിവസത്തെ വാലിഡിറ്റി മാത്രമേ നൽകുകയുള്ളു. 10 ദിവസത്തെ വാലിഡിറ്റി കാലയളവാണ് വെട്ടികുറച്ചിരിക്കുന്നത്.

ഉപഭോക്താക്കളിൽ നിന്നുള്ള വരുമാനം വർധിപ്പിക്കാനായി പ്ലാനുകളിൽ എയർടെല്ലും അടുത്തിടെ മാറ്റങ്ങൾ വരുത്തിയിരുന്നു. ഇന്ത്യയിലെ രണ്ടാമത്തെ വലിയ ടെലിക്കോം ഓപ്പറേറ്ററായ ഭാരതി എയർടെൽ ഇന്ത്യയിലുടനീളം ജനപ്രീതി നേടിയ 49 രൂപയുടെ പ്രീപെയ്ഡ് പ്ലാൻ നീക്കം ചെയ്തു. ഇപ്പോൾ ഉപഭോക്താക്കൾക്ക് അൺലിമിറ്റഡ് വോയ്‌സ് കോളിങ്, ഡാറ്റ സേവനങ്ങൾ എന്നിവയ്ക്കായി ആശ്രയിക്കാവുന്ന എയർടെൽ പ്ലാനിന് 79 രൂപയെങ്കിലും നൽകേണ്ടി വരും.

വിദഗ്ധരുടെ അഭിപ്രായത്തിൽ, ബിഎസ്എൻഎൽ വരും ദിവസങ്ങളിൽ പ്രീപെയ്ഡ് പ്ലാനുകളുടെ താരിഫ് വർദ്ധിപ്പിക്കാനുള്ള സാധ്യത വളരെ കൂടുതൽ ആണ്. കടുത്ത സാമ്പത്തിക പ്രതസന്ധിയിൽ ഉള്ള ബിഎസ്എൻഎല്ലിന് താരിഫ് നിരക്കുകൾ ചെറുതായെങ്കിലും വർധിപ്പിക്കാതെ പിടിച്ചു നിൽക്കാൻ സാധിക്കില്ല. ഇന്ത്യയിൽ എല്ലായിടത്തും 4ജി എത്തിക്കാനുള്ള ബിഎസ്എൻഎല്ലിന്റെ ശ്രമങ്ങളും പല തടസങ്ങൾ നേരിടുന്നുണ്ട്. അതേ സമയം കേരളം അടക്കമുള്ള ചില സ്ഥലങ്ങളിലെ 4ജി നെറ്റ്വർക്ക് പുതുക്കുകയും മികച്ച സേവനം നൽകുകയും ചെയ്യാൻ ബിഎസ്എൻഎല്ലിന് സാധിക്കുന്നുമുണ്ട്.