അൺലിമിറ്റഡ് ഡാറ്റ, കോളിങ് ആനുകൂല്യങ്ങളുമായി ബി‌എസ്‌എൻ‌എൽ 398 രൂപ പ്രീപെയ്ഡ് പ്ലാൻ

അൺലിമിറ്റഡ് ആയി ഇന്റർനെറ്റ് ഉപയോഗിക്കാനും 398 രൂപ പ്ലാനിലൂടെ സാധിക്കും. ജിയോ മറ്റ് നെറ്റ്വർക്കുകളിലേക്ക് കോളുകൾ വിളിക്കുന്നതിന് പണം ഈടാക്കുന്നത് അവസാനിപ്പിച്ചതിന് പിന്നാലെയാണ് ബിഎസ്എൻഎൽ പുതിയ പ്ലാൻ പ്രഖ്യാപിച്ചത്. എയർടെൽ, വോഡഫോൺ ഐഡിയ (Vi), റിലയൻസ് ജിയോ എന്നിവയുൾപ്പെടെയുള്ള ടെലിക്കോം കമ്പനികളുടെ പ്ലാനുകളൊന്നും ഇത്തരമൊരു അൺലിമിറ്റഡ് ഓഫർ നൽകുന്നില്ല എന്നത് ശ്രദ്ധേയമാണ്.

ബി‌എസ്‌എൻ‌എൽ 398 രൂപ വൗച്ചർ

ബി‌എസ്‌എൻ‌എല്ലിന്റെ 398 രൂപ പ്രീപെയ്ഡ് വൗച്ചർ ഉപയോക്താക്കൾക്ക് അൺലിമിറ്റഡ് ഡാറ്റയും വോയ്‌സ് കോളിങ് ആനുകൂല്യങ്ങളും നൽകുമെന്നാണ് വിവരങ്ങൾ. ഈ പ്ലാനിന്റെ വാലിഡിറ്റി 30 ദിവസമായിരിക്കും. ഈ 30 ദിവസത്തിനുള്ളിൽ ഉപയോക്താവിന് യാതൊരു വിധ എഫ്യുപി ലിമിറ്റും ഇല്ലാതെ അൺലിമിറ്റഡ് കോളുകൾ വിളിക്കാനും ഇന്റർനെറ്റ് ഉപയോഗിക്കാനും സാധിക്കും. വോയ്‌സ് കോളിംഗിനും ഡാറ്റ ആനുകൂല്യങ്ങൾക്കും പുറമേ ഉപയോക്താക്കൾക്ക് ദിവസവും 100 എസ്എംഎസുകളും ഈ പ്ലാൻ നൽകുന്നുണ്ട്.

റോമിംഗ്, ദില്ലി, മുംബൈ ഉൾപ്പെടെയുള്ള മഹാനഗർ ടെലിഫോൺ നിഗം ​​ലിമിറ്റഡ് (എംടിഎൻഎൽ) നെറ്റ്‌വർക്കിലേക്ക് അൺലിമിറ്റഡ് വോയ്‌സ് കോളിങ്, എസ്എംഎസ് ആനുകൂല്യങ്ങളും 398 രൂ പ്ലാനിലൂടെ ലഭിക്കും. ഇന്ത്യ്ക്ക് അകത്തുള്ള എല്ലാ നെറ്റ്വർക്കിലേക്കും ബിഎസ്എൻഎല്ലിന്റെ പുതിയ പ്ലാൻ സൌജന്യ കോളുകൾ നൽകുന്നു. ഐഎസ്ടി സൌജന്യമായി ലഭിക്കില്ല. ഈ പ്ലാൻ ഉപയോഗിച്ച് വാണിജ്യാടിസ്ഥാനത്തിലോ പരസ്യത്തിനോ ആയി കോളുകൾ ചെയ്യുന്നവർക്കെതിരെ ബിഎസ്എൻഎൽ നടപടി സ്വീകരിക്കും.

398 രൂപ വൗച്ചർ ഉപയോക്താക്കൾക്ക് 2021 ജനുവരി 10 മുതൽ ലഭ്യമാകും. രാജ്യത്തെ എല്ലാ ടെലികോം സർക്കിളുകളിലും ഈ പ്ലാൻ ലഭിക്കും. ബിഎസ്എൻഎല്ലിന്റെ ഈ പുതിയ പ്ലാൻ മറ്റ് ടെലികോം ഓപ്പറേറ്റർമാർക്ക് കടുത്ത മത്സരം നൽകുന്നതാണ്. മറ്റൊരു ടെലിക്കോം കമ്പനികളും അൺലിമിറ്റഡ് ഡാറ്റ ആനുകൂല്യം നൽകുന്നില്ല. എന്നാൽ എല്ലാ സ്വകാര്യ കമ്പനികളും മികച്ച ഇൻ-ക്ലാസ് 4 ജി സേവനങ്ങൾ നൽകുമ്പോൾ ബിഎസ്എൻഎൽ ഭൂരിപക്ഷം സ്ഥലങ്ങളിലും 3ജിയാണ് നൽകുന്നത്.

ഉപയോക്താക്കൾക്ക് അൺലിമിറ്റഡ് വോയ്‌സ് കോളിങ്, അൺലിമിറ്റഡ് ഡാറ്റ എന്നീ ആനുകൂല്യങ്ങൾ നൽകുന്ന ബിഎസ്എൻഎൽ കുറഞ്ഞ വേഗതയാണ് നൽകുന്നത് എന്നത് ഒരു പോരായ്മയാണ്. കേരളത്തിൽ ബിഎസ്എൻഎൽ 4ജി ലഭിക്കുന്നു എന്നതുകൊണ്ട് 398 രൂപ പ്ലാൻ കേരളത്തിലെ ഉപയോക്താക്കൾക്ക് ഏറെ ലാഭകരമായിരിക്കും. ഒരു മാസത്തേക്ക് 400 രൂപയോളം ചിലവഴിക്കേണ്ടി വരുന്ന പ്ലാൻ ആണെങ്കിലും അൺലിമിറ്റഡ് ഡാറ്റ എന്നത് ആരെയും ആകർഷിക്കുന്ന ആനുകൂല്യമാണ്.