ലോക്ക്ഡൌണിനിടെ പേര് മാറ്റി ബി‌എസ്‌എൻ‌എല്ലും വോഡഫോൺ ഐഡിയയും

ബി‌എസ്‌എൻ‌എൽ അതിന്റെ നെറ്റ്‌വർക്ക് നെയിം ബി‌എസ്‌എൻ‌എൽ മൊബൈൽ എന്നത് മാറ്റി ‘ബി‌എസ്‌എൻ‌എൽ സ്റ്റേ അറ്റ് ഹോം' എന്നാക്കി. അതുപോലെ, COVID-19 നെക്കുറിച്ച് അവബോധം സൃഷ്ടിക്കുന്നതിന് വോഡഫോൺ ഐഡിയ അവരുടെ നെറ്റ്‌വർക്ക് നെയിം മാറ്റി ‘വോഡഫോൺ-ബി സേഫ്' എന്നാക്കി മാറ്റി. ഇത് മാത്രമല്ല, എല്ലാ ടെലികോം ഓപ്പറേറ്റർമാരോടും അവരുടെ ഡീഫോൾട്ട് കോളർ ട്യൂണുകൾ 30 സെക്കൻഡ് കൊറോണ വൈറസ് പ്രിവൻഷൻ കോളർ ട്യൂണായി മാറ്റാൻ ടെലികമ്മ്യൂണിക്കേഷൻ വകുപ്പ് നിർദ്ദേശിച്ചിട്ടുണ്ട്.

നെറ്റ്‌വർക്ക് പേര് മാറ്റിയതുമായി ബന്ധപ്പെട്ട് വോഡഫോണിന് ഉപയോക്താക്കളുടെ ഭാഗത്ത് നിന്നും വിവിധ ട്വീറ്റുകൾ ലഭിച്ചു. ടെൽകോയുടെ നീക്കത്തെ ചില ആളുകൾ അഭിനന്ദിക്കുമ്പോൾ വോഡഫോൺ കൊണ്ടുവന്ന മാറ്റം ചില ഉപയോക്താക്കൾക്ക് ഇഷ്ടമായില്ല. എജിആർ കുടിശ്ശികയും മറ്റും വോഡാഫോണിന്റെ സാമ്പത്തിക നില മോശമാക്കിയ അവസ്ഥയിൽ നെറ്റ്വർക്ക് ടവർ പ്രശ്‌നങ്ങളും കമ്പനി അഭിമുഖികരിക്കുന്നുണ്ട്. ഇതും ആളുകളുടെ വിമർശനത്തിന് കാരണമായി.

സൌജന്യ ടോക്ക് ടൈമുമായി ബിഎസ്എൻഎൽ

കൊറോണ വൈറസിനെക്കുറിച്ച് ഉപയോക്താക്കളിൽ അവബോധം സൃഷ്ടിക്കാൻ സർക്കാർ ഉടമസ്ഥതയിലുള്ള ബി‌എസ്‌എൻ‌എൽ കഠിനമായി ശ്രമിക്കുന്നു. ഓപ്പറേറ്ററുടെ പേര് മാറ്റുന്നതിനു പുറമേ ബി‌എസ്‌എൻ‌എൽ അതിന്റെ പ്രീപെയ്ഡ് പ്ലാനുകളുടെ വാലിഡിറ്റി 2020 ഏപ്രിൽ 20 വരെ നീട്ടീ നൽകാൻ ആരംഭിച്ചു. ഇതിനൊപ്പം ബിഎസ്എൻഎൽ വരിക്കാർക്ക് 10 രൂപ സൌജന്യ ടോക്ക് ടൈമും വാഗ്ദാനം ചെയ്യുന്നു. സീറോ ബാലൻസ് ഉള്ള അക്കൌണ്ടുകളിലേക്കാണ് ഇത് ലഭിക്കുക.

ബി‌എസ്‌എൻ‌എൽ പ്രീപെയ്ഡ് ഉപയോക്താക്കൾക്ക് ടോക്ക് ടൈം തീർന്നുപോയാലും അത്യാവശ്യ ഘട്ടത്തിൽ അവരുടെ സുഹൃത്തുക്കളുമായി കഴിയും. കമ്പനിയുടെ ഈ നീക്കം പ്രാഥമികമായി 21 ദിവസത്തെ ലോക്ക്ഡൗൺ കാലയളവ് കാരണം ആശയവിനിമയ പ്രശ്നങ്ങൾ നേരിടുന്ന അതിഥി തൊഴിലാളികളെയും താഴ്ന്ന വരുമാനക്കാരായ ആളുകളെയും സഹായിക്കും. ബി‌എസ്‌എൻ‌എല്ലിന് സമാനമായി ഭാരതി എയർടെൽ, വോഡഫോൺ ഐഡിയ എന്നിവയും അവരുടെ പ്രീപെയ്ഡ് പ്ലാനുകളുടെ വാലിഡിറ്റി വർദ്ധിപ്പിക്കുകയും സൌജന്യ ടോക്ക് ടൈം നൽകുകയും ചെയ്യുന്നുണ്ട്

വോഡഫോൺ ഐഡിയയുടെ പുതിയ പ്രീപെയ്ഡ് പ്ലാൻ

വോഡഫോൺ ഐഡിയ അടുത്തിടെ 95 രൂപയുടെ പുതിയ ഓൾ‌റൌണ്ടർ പ്രീപെയ്ഡ് റീചാർജ് പുറത്തിറക്കി. ഇത് കോളിംഗ് ആനുകൂല്യങ്ങൾക്കൊപ്പം അതിവേഗ ഇന്റർനെറ്റ് ഡാറ്റയും നൽകും. 56 ദിവസത്തെ വാലിഡിറ്റിയാണ് ഈ പ്ലാനിനുള്ളത്. ഈ കാലയളവിലേക്കായി 200 എംബി ഡാറ്റ പ്ലാനിലൂടെ ലഭിക്കും. ലഭിക്കുന്ന ഡാറ്റ കുറവാണെന്ന് തോന്നാമെങ്കിലും പ്ലാനിന്റെ മുഖ്യ ആകർഷണം 74 രൂപയും ടോക്ക് ടൈമും ഇതിലൂടെ ലഭിക്കും എന്നതാണ്.

തിരഞ്ഞെടുത്ത ടെലികോം സർക്കിളുകളായ ചെന്നൈ, കർണാടക, മധ്യപ്രദേശ്, മുംബൈ, കേരളം, തമിഴ്നാട് എന്നിവിടങ്ങളിൽ ഈ പ്രീപെയ്ഡ് പ്ലാൻ ലഭ്യമാകും. ഈ പുതിയ ഓൾ റൌണ്ടർ പായ്ക്ക് ഉപയോഗിച്ച് ഇരട്ടി സർവ്വീസ് വാലിഡിറ്റി നേടാൻ വോഡഫോൺ ഐഡിയ ഉപയോക്താക്കൾക്ക് സാധിക്കും. ലോക്ക്ഡൌൺ കാലത്ത് ഏറെ ആകർഷകമായ പ്ലാൻ തന്നെയാണ് ഇത്.