ഇ-റുപ്പി ഡിജിറ്റൽ പേയ്‌മെന്റ് പ്ലാറ്റ്ഫോം ഇന്ന് അവതരിപ്പിക്കും

ഇ-റുപ്പി ഡിജിറ്റൽ പേയ്‌മെന്റ് ആപ്പ് നാഷണൽ പേയ്‌മെന്റ് കോർപ്പറേഷൻ ഓഫ് ഇന്ത്യ അതിന്റെ യുപിഐ പ്ലാറ്റ്‌ഫോമിൽ വികസിപ്പിച്ചെടുത്തതാണ്. ധനകാര്യ സേവന വകുപ്പ്, ആരോഗ്യം & കുടുംബ ക്ഷേമം, ദേശീയ ആരോഗ്യ അതോറിറ്റി എന്നിവയുടെ സഹകരണത്തോടൊണ് ഈ പ്ലാറ്റ്ഫോം വികസിപ്പിച്ചിരിക്കുന്നത്. യുപിഐ അടിസ്ഥാനമാക്കി പ്രവർത്തിക്കുന്ന പ്ലാറ്റ്ഫോമുകളിൽ നിന്ന് വ്യത്യസ്തമായി ആകർഷകമായ നിരവധി സവിശേഷതകളുമായിട്ടായിരിക്കും ഈ പ്ലാറ്റ്ഫോം വരുന്നത്.

എന്താണ് ഇ-റുപ്പി?

പണം കൈമാറാനുള്ള ക്യാഷ്ലസ് കോൺടാക്ലസ് പ്ലാറ്റ്‌ഫോം എന്ന പേരിലാണ് ഇ-റുപ്പി അവതരിപ്പിക്കുന്നത്. ഗുണഭോക്താക്കളുടെ മൊബൈലിലേക്ക് കൈമാറുന്ന ക്യുആർ കോഡോ എസ്എംഎസ് സ്ട്രിങോ അടിസ്ഥാനമാക്കിയുള്ള ഇ-വൗച്ചറാണ് ഇത്. തടസ്സമില്ലാത്ത വൺടൈം പേയ്‌മെന്റ് സംവിധാനം ഇതിലൂടെ സാധ്യമാകുന്നു. ഇത്തരത്തിൽ ലഭിക്കുന്ന വൌച്ചർ ഡിജിറ്റൽ പേയ്‌മെന്റ് ആപ്പ് അല്ലെങ്കിൽ ഇന്റർനെറ്റ് ബാങ്കിംഗ് ആക്‌സസ് ഇല്ലാതെ ഉപയോക്താക്കൾക്ക് റിഡീം ചെയ്യാൻ കഴിയും.

വരാനിരിക്കുന്ന ഇ-റുപ്പി ഡിജിറ്റൽ പേയ്‌മെന്റ് പ്ലാറ്റ്ഫോം ഗുണഭോക്താക്കളെയും സേവനദാതാക്കളെയും ഫിസിക്കൽ ഇന്റർഫേസ് ഇല്ലാതെ ഡിജിറ്റൽ രീതിയിൽ ബന്ധിപ്പിക്കുന്നുവെന്ന് ഔദ്യോഗിക പത്രക്കുറിപ്പിൽ പറയുന്നു. ഇടപാട് പൂർത്തിയായതിനുശേഷം മാത്രമേ സേവന ദാതാവിന് പണമടയ്ക്കാൻ കഴിയൂ എന്നതാണ് പ്ലാറ്റ്ഫോമിന്റെ മറ്റൊരു സവിശേഷത. ഇടനിലക്കാരില്ലാതെ സമയബന്ധിതമായി പണമടയ്ക്കുന്നത് ഉറപ്പാക്കാൻ ഇ-റുപ്പി പ്ലാറ്റ്ഫോമിന് സാധിക്കുന്നുവെന്നാണ് പത്രക്കുറിപ്പിൽ പറയുന്നത്.

ക്ഷേമ സേവനങ്ങൾ യാതെരു പ്രശ്നവും ഇല്ലാതെ ആളുകളിൽ എത്തിക്കുന്ന വിപ്ലവകരമായ സംരംഭമാണ് ഇ-റുപ്പി എന്ന് പ്രധാനമന്ത്രി മോദി ട്വിറ്ററിൽ കുറിച്ചു. മാതൃ -ശിശു ക്ഷേമ പദ്ധതികൾ, ക്ഷയരോഗ നിർമാർജന പരിപാടികൾ, ആയുഷ്മാൻ ഭാരത് പ്രധാനമന്ത്രി ജൻ ആരോഗ്യ യോജന, വളം സബ്സിഡികൾ തുടങ്ങിയ മരുന്നുകളും പോഷകാഹാര പിന്തുണയും നൽകുന്ന പദ്ധതികൾക്കു കീഴിൽ സേവനങ്ങൾ നൽകാനും ഇ-റുപ്പി ഉപയോഗിക്കാം. ഡിജിറ്റൽ വൗച്ചറുകൾ ജീവനക്കാരുടെ ക്ഷേമത്തിന്റെയും കോർപ്പറേറ്റ് സാമൂഹിക ഉത്തരവാദിത്ത പരിപാടികളുടെയും ഭാഗമായി പ്രയോജനപ്പെടുത്താൻ കഴിയുമെന്നും പത്രക്കുറിപ്പിൽ പറയുന്നു.