ഫ്ലിപ്പ്കാർട്ടിൽ ഐഫോൺ 11 പ്രോ ഓർഡർ ചെയ്ത ഉപയോക്താവിന് ലഭിച്ചത് വ്യാജ ഐഫോൺ

ബെംഗളൂരുവിൽ താമസിക്കുന്ന രജനി കാന്ത് കുഷ്വ എന്നയാൾ ഫ്ലിപ്പ്കാർട്ടിലൂടെ ആപ്പിൾ ഐഫോൺ 11 പ്രോ ഓർഡർ ചെയ്തു. വേഗത്തിലുള്ള ഡെലിവറിക്കായി മുഴുവൻ തുകയും (ഡിസ്കൗണ്ടിന് ശേഷം 93,900 രൂപ) അദ്ദേഹം നൽകുകയും എന്നാൽ അദ്ദേഹം പ്രതീക്ഷിരുന്ന ഐഫോൺ 11 പ്രോ ലഭിക്കുന്നതിന് പകരം ലഭിച്ചതൊരു വ്യാജ ഫോണാണ്.

ഫ്ലിപ്പ്കാർട്ട് ഡെലിവറി ബോയ് കൊണ്ടുകൊടുന്ന ബോക്സ് തുറന്നപ്പോൾ രജനികാന്ത് കണ്ടത് ഐഫോൺ പോലെ തന്നെയുള്ളൊരു ഡിവൈസാണ്. എന്നാൽ അത് ഐഫോൺ അല്ലായിരുന്നു. ട്രിപിൾ റിയർ ക്യാമറയുള്ള മോഡലാണ് ഐഫോൺ 11 പ്രോ. അദ്ദേഹത്തിന് ലഭിച്ച ബോക്സിലെ ഡിവൈസിൽ ട്രിപിൾ ക്യാമറയുടെ ഒരു സ്റ്റിക്കർ മാത്രമാണ് ഉണ്ടായിരുന്നതെന്ന് ഐബി ടൈംസ് റിപ്പോർട്ട് ചെയ്യുന്നു. ഐഒഎസിൽ പ്രവർത്തിക്കുന്ന ഐഫോണിന് പകരം ലഭിച്ചത് ആൻഡ്രോയിഡ് ഒഎസ് ഉള്ള ഒരു ഡിവൈസ് ആയിരുന്നു.

തനിക്ക് കിട്ടിയത് ഒറിജിനൽ ഐഫോൺ അല്ലെന്നും വ്യാജ ഐഫോൺ ആണെന്നും പരാതിപ്പെട്ട രജനികാന്തിന് ഡിവൈസ് മാറ്റി ഒറിജിനൽ ഐഫോൺ തന്നെ നൽകുമെന്ന് ഫ്ലിപ്പ്കാർട്ട് ഉറപ്പ് നൽകിയിട്ടുണ്ട്. ഇതുവരെയും ഡിവൈസ് മാറ്റി കിട്ടിയിട്ടില്ലെന്നാണ് റിപ്പോർട്ടുകൾ. ഗുരുതരമായ പിഴവാണ് ഫ്ലിപ്പ്കാർട്ടിന്‍റെ ഭാഗത്ത് നിന്നും ഉണ്ടിയിരിക്കുന്നത്. ഇ-കൊമേഴ്സ് മേഖലയിൽ ഇത്തരം സംഭവങ്ങൾ വർദ്ധിച്ച് വരുന്നുവെന്നത് ആശങ്ക ഉണ്ടാക്കുന്ന കാര്യമാണ്.

ഒരു ഉപഭോക്താവ് ഫ്ലിപ്കാർട്ടിൽ എന്തെങ്കിലും ഓർഡർ ചെയ്യുന്നതും മറ്റെന്തെങ്കിലും ലഭിക്കുന്നതുമായ ആദ്യ സംഭവമല്ല ഇത്. കണ്ണൂർ സ്വദേശിയായവിഷ്ണു സുരേഷിനും ഇത്തരത്തിലൊരു അനുഭവം ഉണ്ടായിരുന്നു. 27,500 രൂപ വിലവരുന്ന ക്യാമറ ഓർഡർ ചെയ്ത വിഷ്ണുവിന് ലഭിച്ചത് പെട്ടി ടൈൽസ് ആണ്. ടൈലുകളുടെ കഷണങ്ങൾക്ക് പുറമേ ക്യാമറയുടെ മാനുവൽ, വാറന്‍റി കാർഡ് എന്നിവയും ബോക്സിൽ ഉണ്ടായിരുന്നു. ക്യാമറയുടെ ബോക്സിൽ വരുന്ന പേപ്പറുകൾക്കൊപ്പം ടൈൽസ് ലഭിച്ചത് വൻ വിവാദമായിരുന്നു.

ഇതുപോലെ കഴിഞ്ഞ വർഷം മുംബൈ സ്വദേശിയായ ഒരു എഞ്ചിനീയർ ഫ്ലിപ്പ്കാർട്ടിൽ നിന്ന് ഒരു ആപ്പിൾ ഐഫോൺ 8 ഓർഡർ ചെയ്തു. പക്ഷേ അദ്ദേഹത്തിന് ഫ്ലിപ്പ്കാർട്ട് എത്തിച്ച് നൽകിയത് ഒരു സോപ്പ് ബാർ ആണ്. കഴിഞ്ഞ വർഷം നടൻ നഖുലിനും സമാനമായ അനുഭവം ഉണ്ടായിരുന്നു. ഫ്ലിപ്കാർട്ടിൽ നിന്ന് ഒരു പുതിയ ആപ്പിൾ ഐഫോൺ എക്സ്എസ് മാക്സിന് ഓർഡർ നൽകിയ അദ്ദേഹത്തിന് ലഭിച്ചത് ഒരു വ്യാജ ഐഫോണാണ്.