കാഴ്ച്ചക്കുറവുള്ളവർക്ക് വഴി പറഞ്ഞുകൊടുക്കാൻ ഗൂഗിൾ മാപ്പിൽ പുതിയ സംവിധാനം

കാഴ്ചക്കുറവുള്ളവർക്ക് നടന്നുപോവുമ്പോൾ ലക്ഷ്യസ്ഥാനത്ത് എത്താൻ വോയിസ് ഗൈഡൻസ് സവിശേഷത സഹായിക്കുന്നു. ഉപയോക്താക്കൾ ശരിയായ വഴിയിലാണ് പോവുന്നതെങ്കിൽ അക്കാര്യം പോലും ഈ സംവിധാനം നിരന്തരം ഓർമ്മപ്പെടുത്തിരിക്കും. തിരക്കുള്ള ഇടങ്ങളിൽ റോഡ് മുറിച്ച് കടക്കുമ്പോൾ കൃത്യമായ മുന്നറിയിപ്പുകൾ നൽകുകയും വിശദമായ വോയ്‌സ് നാവിഗേഷൻ ഉപയോഗിച്ച് ഉപയോക്താവ് അടുത്തതായി തിരിയേണ്ട് എത്ര ദൂരെയാണെന്ന് പറഞ്ഞുകൊണ്ടേയിരിക്കുന്ന സംവിധാനമാണ് ഗൂഗിൾ ഒരുക്കിയിരിക്കുന്നത്.

ലോക കാഴ്ച ദിനം കൂടിയായ ഇന്നലെ ഗൂഗിൾ പ്രസിദ്ധീകരിച്ച ഒരു ബ്ലോഗിൽ വോയിസ് ഗൈഡൻസ് സവിശേഷതയെക്കുറിച്ച് അറിയേണ്ടതെല്ലാം വിശദീകരിച്ചിട്ടുണ്ട്. കൃത്യമായ അപ്‌ഡേറ്റുകൾക്കൊപ്പം തന്നെ ഉപയോക്താവ് തെറ്റായ വഴിയിലൂടെ സഞ്ചരിച്ചാൽ മാപ്പ്സ് ഓട്ടോമാറ്റിക്കായി റീ റൂട്ട് ചെയ്യുന്നു. ഈ അവസരത്തിൽ ആദ്യം കാണിച്ച റൂട്ടിൽ നിന്നും വഴിതിരിയുകയാണ് എന്ന് ഉപയോക്താവിനെ അറിയിക്കാനായി ഡിവൈസ് ഒരു വോയിസ് അലേർട്ടും നൽകും.

ഇതുപോലുള്ള അപ്‌ഡേറ്റുകൾ കാഴ്ചയില്ലാത്ത ഒരു വ്യക്തിയെ ഒരു സ്ഥലത്ത് നിന്ന് മറ്റൊരു സ്ഥലത്തേക്ക് എത്തിക്കുക മാത്രമല്ല അവർക്ക് ഒറ്റയ്ക്ക് യാത്ര ചെയ്യുമ്പോൾ കൂടുതൽ ആത്മവിശ്വാസവും സഹായവും ലഭ്യമാക്കുക കൂടിയാണ് ചെയ്യുന്നതെന്ന് ബിസിനസ്സ് അനലിസ്റ്റായ കാഴ്ചയില്ലാത്ത വകാന സുഗിയാമ എഴുതിയ പോസ്റ്റിൽ പറയുന്നു. ഈ വോയിസ് ഗൈഡൻസ് സവിശേഷത നിർമ്മിക്കുന്നതിനും പരിശോധിക്കുന്നതിനുമായി ഗൂഗിൾ മാപ്പ്സിനൊപ്പം ചേർന്ന് പ്രവർത്തിച്ച ആളുകൂടിയാണ് സുഗിയാമ.

ഗൂഗിൾ മാപ്‌സിലെ വിശദമായ വോയിസ് ഗൈഡൻസ് ഉപയോഗിച്ച് യാത്ര ചെയ്യുമ്പോൾ സാധാരണ ഉണ്ടാകുന്ന സമ്മർദ്ദമില്ലാതെ തന്നെ ലക്ഷ്യ സ്ഥാനത്തിലെത്താൻ സാധിക്കും അതുകൊണ്ട് യാത്രയ്ക്കിടയിൽ തന്നെ മറ്റ് കാര്യങ്ങളിൽ മനസിനെ കൊണ്ടുപോവാനും സാധിക്കും. കാഴ്ചയുള്ളവർക്ക് ഈ കാര്യം വലിയ സംഭവമായി തോന്നില്ല പക്ഷേ കാഴ്ച്ചകുറവുള്ള ആളുകൾക്ക് ഇത് മികച്ച അനുഭവമായിരിക്കും കൂടാതെ പുതിയതും പരിചിതമല്ലാത്തതുമായ സ്ഥലങ്ങളിൽ യാത്ര ചെയ്യാൻ ഈ ഡിവൈസ് സഹായിക്കും എന്നും സുഗിയാമ കൂട്ടിച്ചേർത്തു.

വാക്കിങ് നാവിഗേഷനുകൾക്കായുള്ള വിശദമായ വോയ്‌സ് ഗൈഡൻസ് ഇന്നലെ മുതൽ ആൻഡ്രോയിഡ് iOS പ്ലാറ്റ്ഫോമുകളിൽ ലഭ്യമായി തുടങ്ങി. ഈ സവിശേഷത ആക്ടിവേറ്റ് ചെയ്യാൻ നിങ്ങളുടെ ഗൂഗിൾ മാപ്സ് സെറ്റിങ്സിലേക്ക്പോയി നാവിഗേഷൻ തിരഞ്ഞെടുക്കുക. വാക്കിംഗ് ഓപ്ഷനുകൾ എന്നതിന് താഴെ ഡിറ്റൈൽഡ് വോയിസ് ഗൈഡൻസ് ആക്ടിവേറ്റ് ചെയ്യുന്നതിനുള്ള ഓപ്ഷൻ കാണാം. ഇതിലൂടെ നിങ്ങൾക്ക് ഡീറ്റൈൽഡ് വോയിസ് ഗൈഡൻസ് ആക്ടിവേറ്റ് ചെയ്യാം.

നിലവിൽ യു‌എസിൽ‌ ഇംഗ്ലീഷിലും ജപ്പാനിൽ ജാപ്പനീസ് ഭാഷയിലും ഈ ഫീച്ചർ ലഭ്യമാണ്. കൂടതൽ ഭാഷകളിൽ ഈ സംവിധാനം വൈകാതെ ലഭ്യമാകുമെന്നാണ് റിപ്പോർട്ടുകൾ. കാഴ്ച്ചയില്ലാത്തവരെ സംബന്ധിച്ച് ഏറെ ഉപകാരപ്രദമാകുന്ന ഫീച്ചറാണ് ഗൂഗിൾ ഇപ്പോൾ പുറത്തിറക്കിയിരിക്കുന്നത്.