ഡിസംബറിൽ നിരവധി ജിമെയിൽ അക്കൗണ്ടുകൾ നീക്കം ചെയ്യുമെന്ന് ​ഗൂ​ഗിൾ; നിങ്ങളുടെ അക്കൗണ്ട് സുരക്ഷിതമാണോ?

വലിയ അളവിൽ ജിമെയിൽ അക്കൗണ്ടുകൾ ഇല്ലാതാക്കാൻ തയ്യാറെടുത്ത് ​ഗൂ​ഗിൾ. ഈ വർഷം ഡിസംബർ മാസത്തോടെ ദശലക്ഷക്കണക്കിന് ജിമെയിൽ അക്കൗണ്ടുകൾ ഇല്ലാതാക്കും എന്നാണ് ​ഗൂ​ഗിൾ‌ അറിയിച്ചിരിക്കുന്നത്. അടുത്തിടെയാണ് ​ഗൂ​ഗിൾ ഈ വാർത്ത പുറത്ത് വിട്ടത്. അടുത്ത മാസം മുതൽ തന്നെ ഇതിന്റെ നടപടികൾ ആരംഭിക്കുമെന്നും കമ്പനി അറിയിച്ചു.

പതിവായി ഉപയോ​ഗിക്കാത്ത ജിമെയിൽ അക്കൗണ്ടുകൾ ഇല്ലാതെയാക്കാനാണ് ​ഗൂ​ഗിൾ ശ്രമിക്കുന്നത്. പുറത്ത് വിട്ട റിപ്പോർട്ട് പ്രകാരം രണ്ട് വർഷത്തോളം നിഷ്ക്രിയമായി തുടരുന്ന അക്കൗണ്ടുകൾ എല്ലാം ഇല്ലാതെയാക്കും എന്നാണ് ​ഗൂ​ഗിൾ അറിയിച്ചിരിക്കുന്നത്. ഇത് സംബന്ധിച്ച് ഉപഭോക്താക്കൾക്ക് മുന്നറിയിപ്പ് നൽകിയതിന് ശേഷമായിരിക്കും നടപടികൾ ആരംഭിക്കു എന്നും ​ഗൂ​ഗിൾ പറയുന്നു. സജീവമായി പ്രവർത്തിക്കുന്ന അക്കൗണ്ടുകൾക്ക് ഒന്നും സംഭവിക്കില്ലെന്നും റിപ്പോർട്ടിൽ പറയുന്നു.

ഇത്തരത്തിൽ നിഷ്ക്രിയമായി കിടക്കുന്ന അക്കൗണ്ടുകൾ വലിയ രീതിയിൽ സൈബർ ഭീഷണി നേരിടുന്ന സാഹചര്യത്തിലാണ് ഈ അക്കൗണ്ടുകൾ ഇല്ലാതെയാക്കാൻ ​ഗൂ​ഗിൾ ശ്രമിക്കുന്നത്. പുതിയ നടപടി ഉപഭോക്താക്കളുടെ സുരക്ഷ വർധിപ്പിക്കാൻ സഹായിക്കും എന്നും ​ഗൂ​ഗിൾ പറയുന്നു. ​ജിമെയിൽ അക്കൗണ്ട് പ്രവർത്തിപ്പിച്ചില്ലെങ്കിലും ​ഗൂ​ഗിൾ ഡോക്സ്, ​ഗൂ​ഗിൾ ഡ്രൈവ്, ​ഗൂ​ഗിൾ മീറ്റ്, ​ഗൂ​ഗിൾ ഫോട്ടോസ് എന്നിവ ഉപയോ​ഗിക്കുന്നവരുടെ അക്കൗണ്ട് സുരക്ഷിതമായിരിക്കും എന്നും കമ്പനി അറിയിച്ചു.

ഒരു അക്കൗണ്ട് ഇല്ലാതാക്കും മുമ്പ് ഈ അക്കൗണ്ടിന്റെ ഉടമസ്ഥനെ ഒന്നിൽ കൂടുതൽ തവണ അറിയിച്ചതിന് ശേഷമായിരിക്കും ഈ അക്കൗണ്ടിന് എതിരെ നടപടി സ്വീകരിക്കു. നിങ്ങൾക്ക് അക്കൗണ്ട് ആവിശ്യമാണെങ്കിൽ ഇടയ്ക്കിടയ്ക്ക് അക്കൗണ്ടിൽ ലോ​ഗ് ഇൻ ചെയ്യണമെന്നും ഈ അക്കൗണ്ട് ഉപയോ​ഗിച്ച് എന്തെങ്കിലും പ്രവർത്തികൾ ചെയ്യണമെന്നും ​ഗൂ​ഗിൾ നിർദേശിക്കുന്നു. അക്കൗണ്ടിൽ നിന്ന് സന്ദേശം അയച്ചാൽ മാത്രമല്ല ഈ അക്കൗണ്ട് അക്ടീവ് ആകു ഇതിന് വേറെയും ധാരാളം വഴികൾ ഉണ്ട്.

MOST READ: എപ്പോഴും കുറ്റം പറച്ചിൽ, തരം കിട്ടുമ്പോൾ കോപ്പിയടി; ഐഫോൺ 15നെ കോപ്പിയടിച്ച് എസ് 24 അൾട്രയുടെ നിർമ്മാണം

നേരത്തെ സൂചിപ്പിച്ചത് പോലെ നിങ്ങളുടെ ജിമെയിൽ ഉപയോ​ഗിച്ച് പ്രവർത്തിക്കുന്ന ​ഗൂ​ഗിൾ ഡ്രൈവുകൾ, ഡോക്സ്, ഗൂ​ഗിൾ ഫോട്ടോസ് എന്നിവ ഇടയ്ക്കിടെ ഉപയോ​ഗിക്കുക. ഈ അക്കൗണ്ടിൽ നിന്ന് ലോ​ഗ് ഇൻ ചെയ്ത് യൂട്യൂബ് വീഡിയോകൾ കാണുക. ഇത്തരം വീഡിയോകൾക്ക് ഇതേ അക്കൗണ്ടിൽ നിന്ന് ലൈക്ക് ചെയ്യുക, കമന്റ് ചെയ്യുക തുടങ്ങിയ കാര്യങ്ങൾ ചെയ്താലും അക്കൗണ്ട് ആക്ടീവ് ആണെന്ന നിർദേശം ആയിരിക്കും ​ഗൂ​ഗിളിന് ലഭിക്കുക.

ആയതിനാൽ ഇക്കാര്യങ്ങൾ ചെയ്താൽ നിങ്ങളുടെ അക്കൗണ്ട് നഷ്ടപ്പെടാതെ ഇരിക്കുന്നതായിരിക്കും. ഇനി വളരെ കാലമായി നിങ്ങൾ ഉപയോ​ഗിക്കാത്ത അക്കൗണ്ട് ആണെന്നിരിക്കട്ടെ മേൽപ്പറഞ്ഞ കാര്യങ്ങൾ ഇതേ അക്കൗണ്ടിലൂടെ ചെയ്താലും ഈ അക്കൗണ്ട് ആക്ടീവ് ആകുന്നതായിരിക്കും. നിങ്ങൾ പാസ്വേർഡ് മറന്നുകൊണ്ട് ഉപയോ​ഗിക്കാതെ ഇരിക്കുന്ന അക്കൗണ്ടുകൾക്ക് വളരെ എളുപ്പത്തിൽ തന്നെ പുതിയ പാസ്വേർഡ് നൽകി വീണ്ടും ഉപയോ​ഗിക്കാവുന്നതാണ്.

അതേ സമയം വളരെക്കാലമായി ഉപയോ​ഗിക്കാത്ത ജിമെയിൽ അക്കൗണ്ടുകൾ സ്കാമർമാരും സൈബർ കുറ്റവാളികളും വലിയ രീതിയൽ ദുരുപയോ​ഗം ചെയ്യുന്നുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. പല തരത്തിലുള്ള തട്ടിപ്പുകൾ ഇത്തരം അക്കൗണ്ടുകൾ വഴി ഇവർ ആസുത്രണം ചെയ്യാറുണ്ട്. ഇത്തരം തട്ടിപ്പുകൾ പരമാവധി കുറയ്ക്കാനായി ഈ നടപടി ഉപകരിക്കും എന്നാണ് ​ഗൂ​ഗിൾ പ്രതീക്ഷിക്കുന്നത്. മാത്രമല്ല നിങ്ങളുടെ ജിമെയിൽ അക്കൗണ്ടുകൾ ശക്തമായ പാസ്വേർഡുകൾ നൽകി സുരക്ഷിതമാക്കണമെന്നും ​ഗൂ​ഗിൾ നിർദേശിക്കുന്നു.

കഴിവതും എല്ലാ ജിമെയിൽ അക്കൗണ്ടുകളും 2 ഘട്ട വേരിഫിക്കേഷൻ നടത്തി ശക്തമാക്കണമെന്നാണ് ​ഗൂ​ഗിൾ നിർദേശിക്കുന്നത്. ഇങ്ങനെ ചെയ്താൽ ഓൺലൈൻ തട്ടിപ്പുകാരിൽ നിന്ന് ഒരു പരുധിവരെ രക്ഷപെടാൻ സാധിക്കുന്നതാണ്. മാത്രമല്ല അജ്ഞാതമായി വരുന്ന മെയിലുകൾ എസ്എംഎസുകൾ സോഷ്യൽ മീഡിയാ സന്ദേശങ്ങൾ എന്നിവയോട് പ്രതികരിക്കരുതെന്നും ഈ സന്ദേശങ്ങളിൽ നൽകിയിരിക്കുന്ന ലിങ്കുകളിൽ ക്ലിക്ക് ചെയ്യരുതെന്നും വി​ദ​ഗ്ദർ നിർദേശിക്കുന്നു. മാൽവെയർ പോലുള്ള ക്ഷുദ്ര വൈറസുകളുള്ള വെബ്സൈറ്റുകളിലേക്കായിരിക്കും ഈ ലിങ്കുകൾ നിങ്ങളെ കൊണ്ടുപോകുക.