1 ജിബിപിഎസ് വേഗത നൽകുന്ന ഇന്ത്യയിലെ മികച്ച ബ്രോഡ്ബാന്റ് പ്ലാനുകൾ

ജോലിയുടെ ആവശ്യങ്ങൾക്കും മറ്റുമായി അതിവേഗ ബ്രോഡ്ബാന്റ് സ്പീഡ് വേണമെങ്കിൽ ഇത്തരം പ്ലാനുകൾ തിരഞ്ഞെടുക്കാവുന്നതാണ്. 1 ജിബിപിഎസ് വരെ വേഗത നൽകുന്ന പ്ലാനുകൾ ഇന്ത്യയിലെ പ്രധാന ബ്രോഡ്ബാന്റ് സേവന ദാതാക്കൾ നൽകുന്നുണ്ട്. ഒന്നിലധികം ഡിവൈസുകൾ തടസ്സങ്ങളില്ലാതെ ഒരേസമയം കണക്റ്റ് ചെയ്യാനുമെല്ലാം ഈ പ്ലാനുകൾ ഏറെ ഗുണകരമാണ്. വേഗതയുള്ള ഇന്റർനെറ്റിനൊപ്പം മറ്റ് നിരവധി ആനുകൂല്യങ്ങളും ഈ പ്ലാനുകളിലൂടെ ലഭിക്കുന്നു. ഇന്ത്യയിലെ പ്രധാന ഇന്റർനെറ്റ് സേവന ദാതാക്കൾ നൽകുന്ന 1 ജിബിപിഎസ് വേഗതയുള്ള പ്ലാനുകൾ നോക്കാം.

എയർടെല്ലിന്റെ ഇൻഫിനിറ്റി പ്ലാൻ

എയർടെൽ എക്സ്ട്രീം ഫൈബർ ഇൻഫിനിറ്റി പ്ലാൻ എന്നറിയപ്പെടുന്ന 1 ജിബിപിഎസ് അൺലിമിറ്റഡ് ഡാറ്റ പ്ലാൻ നൽകുന്നുണ്ട്. എയർടെൽ എക്‌സ്ട്രീം ഫൈബർ കണക്ഷനിലൂടെ ലഭിക്കുന്ന ഈ പ്ലാനിനായി ഒരു മാസത്തേക്ക് 3,999 രൂപയാണ് നൽകേണ്ടി വരുന്നത്. ഈ പ്ലാൻ 1 ജിബിപിഎസ് ഹൈ-സ്പീഡ് ഇന്റർനെറ്റ് ആണ് നൽകുന്നത്. എല്ലാ അൺലിമിറ്റഡ് പ്ലാനുകൾക്കും എയർടെൽ നൽകുന്ന എഫ്യുപി ഡാറ്റ 3500 ജിബി അഥവാ 3.5 ടിബി ആണ്. ഈ ലിമിറ്റ് തന്നെയാണ് ഇൻഫിനിറ്റി പ്ലാനിനും ഉള്ളത്. ജിഎസ്ടി ഒഴികെയുള്ളതാണ് 3999 രൂപ എന്ന വില.

3,999 രൂപ വിലയുള്ള എയർടെൽ എക്ട്രീം ഇൻഫിനിറ്റി പ്ലാനിലൂടെ വിങ്ക് മ്യൂസിക്കിലേക്കുള്ള ആക്‌സസിനൊപ്പം ഇന്ത്യയിലെ പ്രധാന ഒടിടി പ്ലാറ്റ്‌ഫോമുകളായ നെറ്റ്ഫ്ലിക്സ്, ആമസോൺ പ്രൈം വീഡിയോ, ഡിസ്നി + ഹോട്ട്‌സ്റ്റാർ എന്നിവയിലേക്കുള്ള സബ്‌സ്‌ക്രിപ്ഷനും ഈ പ്ലാൻ നൽകുന്നു. എയർടെല്ലിന്റെ എഫ്‌ടിടിഎച്ച് സാങ്കേതികവിദ്യ ഒരേസമയം 60 ഡിവൈസുകളെ വരെ കണക്‌റ്റ് ചെയ്യാനും അതിവേഗ ഡൗൺലോഡുകൾ നൽകാനും സാധിക്കുന്നതാണ്. അതുകൊണ്ട് തന്നെ ഓഫീസിലും മറ്റും ഉപയോഗിക്കാൻ സാധിക്കുന്ന പ്ലാനാണ് ഇത്.

ജിയോയുടെ രണ്ട് പ്ലാനുകൾ

1 ജിബിപിഎസ് പ്ലാനുകളുടെ വിഭാഗത്തിൽ ജിയോ ഫൈബർ വ്യത്യസ്ത ഡാറ്റാ ലിമിറ്റുകളുള്ള രണ്ട് പ്ലാനുകൾ നൽകുന്നുണ്ട്. ഇതിൽ ആദ്യത്തെ പ്ലാൻ പ്രതിമാസം 3,999 രൂപ വിലയുള്ളതാണ്. 30 ദിവസത്തേക്ക് 3.3 ടിബി അഥവാ 3300ജിബി എഫ്യുപി ഡാറ്റാ ലിമിറ്റുമായിട്ടാണ് ഈ 1 ജിബിപിഎസ് ഇന്റർനെറ്റ് വേഗതയും നൽകുന്നു. ജിയോ ഫൈബറിന്റെ രണ്ടാമത്തെ 1 ജിബിപിഎസ് പ്ലാൻ 30 ദിവസത്തെ വാലിഡിറ്റി കാലയളവിലേക്കായി 8,499 രൂപയാണ് ഈടാക്കുന്നത്. ഈ പ്ലാനിലൂടെ മൊത്തം 6600ജിബി ഡാറ്റയും ലഭിക്കും. ഈ രണ്ട് പ്ലാനുകളും അൺലിമിറ്റഡ് കോളിങ് ആനുകൂല്യങ്ങളും 1 ജിബിപിഎസ് അപ്‌ലോഡ് ഡൗൺലോഡ് വേഗതയും നൽകുന്നു.

ജിയോഫൈബറിന്റെ രണ്ട് 1 ജിബിപിഎശ് പ്ലാനുകളും ഉപയോക്താക്കൾക്ക് നെറ്റ്ഫ്ലിക്സ്, ആമസോൺ പ്രൈം വീഡിയോ, ഡിസ്നി+ ഹോട്ട്സ്റ്റാർ എന്നിവയിലേക്കും മറ്റ് പതിമൂന്ന് ഒടിടി പ്ലാറ്റ്ഫോമുകളിലേക്കും ആക്സസ് നൽകുന്നു. ഈ പ്ലാനിനൊപ്പം വരുന്ന ആമസോൺ പ്രൈം വീഡിയോയ്ക്ക് ഒരു വർഷത്തെ കാലാവധിയുണ്ട്. ഈ പ്ലാനുകളുടെ വിലകൾ ജിഎസ്ടി ഒഴികെയുള്ളതാണ്. റിലയൻസ് ജിയോയുടെ ഔദ്യോഗിക വെബ്സൈറ്റിൽ നിന്ന് ഉപയോക്താക്കൾക്ക് ഈ പ്ലാനുകൾ ആക്സസ് ചെയ്യാൻ കഴിയും.

ടാറ്റ പ്ലേ ഫൈബർ പ്ലാനുകൾ

ടാറ്റ സ്കൈ അടുത്തിടെ അതിന്റെ മോണിക്കർ ടാറ്റ പ്ലേ ഫൈബർ എന്നാക്കി മാറ്റി. എങ്കിലും ബ്രോഡ്ബാന്റ് പ്ലാനുകൾ അതേപടി തുടർന്നു. ടാറ്റ പ്ലേ ഫൈബറിൽ നിന്നുള്ള ഹൈ-എൻഡ് അൺലിമിറ്റഡ് 1 ജിബിപിഎസ് പ്ലാനിന് 3,600 രൂപയാണ് വില. വ്യത്യസ്ത വാലിഡിറ്റി കാലയളവുകളിൽ കമ്പനി 1 ജിബിപിഎസ് പ്ലാൻ വാഗ്ദാനം നൽകുന്നു. മൂന്ന് മാസത്തേക്കായി ഈ പ്ലാൻ 10,800 രൂപയ്ക്ക് ലഭിക്കും. ആറ് മാസത്തെ വാലിഡിറ്റി കാലയളവിലേക്കുള്ള പ്ലാനിന് 19,800 രൂപയാണ് വില. ആറ് മാസത്തെ പ്ലാൻ തിരഞ്ഞെടുക്കുന്നവർക്ക് 1,800 രൂപ ലാഭിക്കാം. ഒരു വർഷത്തേക്ക് പ്ലാനിന് 36,000 രൂപയാണ് വില. ഇതിലൂടെ 7,200 രൂപ ലാഭിക്കാം. ഈ ബ്രോഡ്‌ബാൻഡ് പ്ലാൻ 3300 ജിബി ഡാറ്റയാണ് നൽകുന്നത്. ഈ ഡാറ്റ അവസാനിച്ചാൽ വേഗത 3 എംബിപിഎസ് ആയി കുറയുന്നു.

എസിടി ഫൈബറിന്റെ പ്ലാനുകൾ

ബെംഗളൂരു ആസ്ഥാനമായുള്ള ഇന്റർനെറ്റ് സേവന ദാതാവായ എസിടി ഫൈബറിന് 'എസിടി ഗിഗ' പായ്ക്ക് എന്ന പേരിൽ 1000 എംബിപിഎശ് അൺലിമിറ്റഡ് ഡാറ്റ പ്ലാൻ ഉണ്ട്. അത്യാധുനിക ഫൈബർ സാങ്കേതികവിദ്യ ഉപയോഗിച്ചുള്ള ഈ കണക്ഷൻ മികച്ച അപ്‌ലോഡ്, ഡൗൺലോഡ് വേഗതയും നൽകുന്നു. 5,999 രൂപ പ്രതിമാസ നിരക്കിലാണ് എസിടിയുടെ ഈ പ്ലാൻ നൽകുന്നത്. ഈ പ്ലാനിന് യാതൊരു വിധ ഡാറ്റ നിയന്ത്രണവും ഇല്ല എന്നതാണ് ശ്രദ്ധേയം. ഈ പ്ലാനിലൂടെ ഉപയോക്താക്കൾക്ക് അൺലിമിറ്റഡ് ഡാറ്റ ആസ്വദിക്കാനാകും. ഈ 1 ജിബിപിഎസ് പ്ലാൻ സീ5, സോണിലിവ്, എസിടി ടിവി 4കെ എന്നിവയിലേക്കും മറ്റും സൗജന്യ ട്രയൽ ഉൾപ്പെടെ ഒന്നിലധികം ഒടിടി പ്ലാറ്റ്‌ഫോമുകളിലേക്കുള്ള ആക്‌സസ് നൽകുന്നു. കേരളത്തിൽ എസിടി സജീവമായിട്ടില്ല എങ്കിലും ബെംഗളൂരിവിലുള്ള ആളുകൾക്ക് ഈ കണക്ഷൻ എളുപ്പം നേടാം.