BSNL offers: കോളിനും എസ്എംഎസിനും ബിഎസ്എൻഎൽ നിങ്ങൾക്ക് പണം തരും; അറിയേണ്ടതെല്ലാം

ഉപയോക്താവ് അയക്കുന്ന ഓരോ എസ്എംഎസിനും ആറ് പൈസ വീതം ക്യാഷ്ബാക്ക് ലഭ്യമാക്കുന്ന പദ്ധതിയാണ് ബിഎസ്എൻഎൽ ഇപ്പോൾ പ്രഖ്യാപിച്ചിരിക്കുന്നത്. നിങ്ങളുടെ ബിഎസ്എൻഎൽ നമ്പരിൽ നിന്നും അയക്കുന്ന ഓരോ എസ്എംഎസുകൾക്കും കമ്പനി 6 പൈസ വീതം നിങ്ങളുടെ ഫോണിലേക്ക് ക്രഡിറ്റ് ചെയ്ത് തരും. ഉപയോക്താക്കളെ ആകർഷിക്കാനും നിലവിലുള്ള വരിക്കാരെ നിലനിർത്തുന്നതിനുമാണ് കമ്പനിയുടെ ഈ നീക്കം.

ക്യാഷ്ബാക്ക് ഓഫർ ലഭിക്കുന്നതെങ്ങനെ

ബി‌എസ്‌എൻ‌എൽ ക്യാഷ്ബാക്ക് ഓഫർ ലഭിക്കുന്നതിനായി, എസ്എംഎസ് കമ്പോസ് ബോക്സിൽ "ACT 6 paisa" എന്ന് ടൈപ്പ് ചെയ്ത് 9478053334 എന്ന നമ്പറിലേക്ക് അയയ്ക്കുക. ഈ സേവനം ആക്റ്റിവേറ്റ് ചെയ്ത് കഴിഞ്ഞാൽ ഓരോ എസ്എംഎസിനും ആറ് പൈസ നിരക്കിൽ ക്യാഷ്ബാക്ക് ലഭിക്കാൻ തുടങ്ങും. ഈ ഓഫർ ലാൻഡ്‌ലൈൻ, ബ്രോഡ്‌ബാൻഡ്, ഫൈബർ എന്നിവയിൽ 2019 ഡിസംബർ 31 വരെ ലഭ്യമാണ്.

ടെലിക്കോം മേഖലയിലെ സാമ്പത്തിക പ്രതിസന്ധിയും മത്സരവും കടുക്കുമ്പോൾ അവയിൽ ശക്തമായി നിലനിൽക്കാനുള്ള ശ്രമങ്ങളുടെ ഭാഗമായാണ് ബി‌എസ്‌എൻ‌എല്ലിൽ‌ ഒരുപാട് മാറ്റങ്ങൾ കൊണ്ടുവരുന്നത്‌. എസ്എംഎസുകൾക്ക് കൂടാതെ കോളുകൾക്കും കമ്പനി ക്യാഷ്ബാക്ക് നൽകുന്നു. ഉപയോക്താക്കൾ വിളിക്കുന്ന ഓരോ അഞ്ച് മിനിറ്റിലും 6 പൈസ വീതം ബിഎസ്എൻഎൽ തിരിച്ച് നൽകുന്നു. ബി‌എസ്‌എൻ‌എല്ലിന്റെ വയർ‌ലൈൻ, ബ്രോഡ്‌ബാൻഡ്, എഫ്‌ടി‌ടി‌എച്ച് ഉപഭോക്താക്കൾ‌ക്ക് ഓഫർ ബാധകമാണ്. ഈ പൈസ വരിക്കാരന് ക്യാഷ്ബാക്ക് ആയി ക്രെഡിറ്റ് ചെയ്ത് ലഭിക്കും.

ബി‌എസ്‌എൻ‌എൽ അതിന്‍റെ ഏറ്റവും പുതിയ നീക്കമായി എം‌ടി‌എൻ‌എൽ ഉപയോക്താക്കൾക്ക് സൗജന്യ കോളുകൾ പ്രഖ്യാപിച്ചു. എം‌ടി‌എൻ‌എൽ നമ്പറിലേക്ക് സൗജന്യ കോൾ സൗകര്യമുള്ള മൂന്ന് പ്ലാനുകളാണ് ബി‌എസ്‌എൻ‌എല്ലിനുള്ളത്. 429 രൂപ, 485 രൂപ, 666 രൂപ നിരക്കിലാണ് ഈ പ്ലാനുകൾ.

429 രൂപ പ്ലാൻ എം‌ടി‌എൻ‌എൽ ഉൾപ്പെടെ എല്ലാ നെറ്റ്‌വർക്കുകളിലും സൗജന്യ കോൾ വോയിസ് കോളിംഗ് ആനുകൂല്യങ്ങളും 81 ദിവസത്തേക്ക് പ്രതിദിനം 1 ജിബി ഡാറ്റയും വാഗ്ദാനം ചെയ്യുന്നു. 485 രൂപ പ്ലാൻ 90 ദിവസത്തേക്ക് സൗജന്യ കോളുകളും 1.5 ജിബി ഡാറ്റയും നൽകുന്നു. 666 രൂപ പ്ലാനിൽ 485 രൂപ പ്ലാനിന് തുല്യമായി സൗജന്യ കോളിംഗും അതേ ഡാറ്റാ ആനുകൂല്യങ്ങളും വാഗ്ദാനം ചെയ്യുന്നുണ്ടെങ്കിലും വാലിഡിറ്റി 122 ദിവസം ലഭിക്കും.

പ്രതിസന്ധികളിൽ തളരാതെ ബിഎസ്എൻഎൽ

കടുത്ത സാമ്പത്തിക പ്രതിസന്ധിയിൽ നിന്ന് കരകയറുന്നതിനായി പുതിയ പ്ലാനുകൾ അവതരിപ്പിക്കുമ്പോഴൊപ്പം തന്നെ പൊതുമേഖലാ സ്ഥാപനമായ ബിസ്എൻഎൽ 4ജി സേവനം ആരംഭിക്കാനുള്ള തയ്യാറെടുപ്പിലുമാണ്. ഇതിനായി സർക്കാർ അനുമതി ലഭ്യമായി കഴിഞ്ഞു. രാജ്യത്തെ മുൻ നിര സ്വകാര്യ ടെലിക്കോം ഓപ്പറേറ്റർമാരോട് മത്സരിക്കാൻ പാകത്തിലുള്ള നെറ്റ്വർക്കും സേവനങ്ങളും സൃഷ്ടിച്ചെടുക്കാനുള്ള ബിഎസ്എൻഎല്ലിന്‍റെ ശ്രമങ്ങൾ തുടരുകയാണ്. ഇത്തരം പ്രവർത്തനങ്ങളിലൂടെ പഴയ പ്രതാപ കാലത്തിലേക്ക് കമ്പനി തിരികെ വരുമെന്നാണ് പ്രതീക്ഷിക്കുന്നത്.