ഇന്ത്യൻ ടെലിക്കോം വിപണി ജിയോയുടെ ആധിപത്യത്തിലേക്കോ

ജിയോയുടെ ആധിപത്യം വർധിച്ച് വരുന്ന സാഹചര്യത്തിൽ മറ്റ് സ്വകാര്യ ടെലിക്കോം സേവനദാതാക്കളായ എയർടെൽ, വിഐ എന്നിവ കടുത്ത പ്രതിസന്ധി നേരിടുന്നുണ്ട്. ജിയോ സേവനം ആരംഭിച്ചതോടെ കുറഞ്ഞ നിരക്കിൽ ഡാറ്റ, കോളിങ് ആനുകൂല്യങ്ങൾ നൽകാൻ ആരംഭിച്ചുവെങ്കിലും പിന്നീടിങ്ങോട്ട് ഇരു കമ്പനികൾക്കും വലിയ തകർച്ചയായിരുന്നു. ജിയോ അതിവേഗം നേടിയെടുത്ത ജനപ്രീതിയിൽ ഇരു കമ്പനികൾക്കും വൻതോതിൽ ഉപയോക്താക്കളെ നഷ്ടപ്പെട്ടു.

പൊതുമേഖലാ ടെലിക്കോം കമ്പനിയായ ബിഎസ്എൻഎൽ വിപണി വിഹിതത്തിന്റെ കാര്യത്തിൽ നാലാം സ്ഥാനത്താണ്. രാജ്യത്ത് മുഴുവനായി 4ജി നെറ്റ്വർക്ക് വിന്യസിക്കാൻ സാധിക്കാത്ത ബിഎസ്എൻഎൽ മികച്ച പ്ലാനുകൾ നൽകുന്നുവെങ്കിലും നെറ്റ്വർക്കിന്റെ അപര്യാപ്തത വലിയ വെല്ലുവിളിയാണ്. അടച്ചുപൂട്ടലിന്റെ വക്കിലെത്തിയ ബിഎസ്എൻഎല്ലിനെ പുനരുജ്ജീവിപ്പിക്കാനുള്ള ശ്രമങ്ങൾ ഉണ്ടായിരുന്നുവെങ്കിലും ഇപ്പോഴും 4ജി രാജ്യം മുഴുവൻ എത്തിക്കാൻ കമ്പനിക്ക് സാധിച്ചിട്ടില്ല.

ജിയോയുടെ വളർച്ച ഒരു നിലവിൽ ഉപയോക്താക്കൾക്ക് വലിയ നേട്ടമുണ്ടായിട്ടുണ്ട്. വളരെ കുറഞ്ഞ നിരക്കിൽ കോളിങ്, ഡാറ്റ ആനുകൂല്യങ്ങൾ ലഭിക്കുന്നത് വളരെ നല്ല കാര്യം തന്നെയാണ്. 2ജി, 3ജി രഹിത ഇന്ത്യ എന്ന ആശത്തിലൂന്നിയാണ് ജിയോ 4ജി ഫോണുകൾ പുറത്തിറക്കുന്നത്. ജിയോ ഫോണുകൾ, ജിയോഫൈ ബ്രോഡ്ബാന്റ് സേവനം, ജിയോ ഒടിടി ആപ്പുകൾ എന്നിവയിലൂടെ എല്ലാ മേഖലയിലും ജിയോ സാന്നിധ്യം അറിയിക്കുന്നു. ജിയോയുടെ ടെലിക്കോം വിപണിയിലെ ആധിപത്യം ഭാവിയിൽ എന്തായിമാറുമെന്ന ആശങ്കലും നിലനിൽക്കുന്നുണ്ട്.

ജിയോയുടെ ആധിപത്യം കാരണം മറ്റുള്ള കമ്പനികളെല്ലാം ഇല്ലാതായിപോയി കഴിഞ്ഞാൽ ഉണ്ടായേക്കുന്ന വിപത്തും വലുതാണ്. ഒറ്റ കമ്പനിയുടെ ആധിപത്യത്തിന് കീഴിൽ ഒരു രാജ്യത്തെ ടെലിക്കോം വിപണി വന്നാൽ പിന്നെ ലാഭവും നിരക്കുകളും ഏകാധിപത്യപരമായിരിക്കും. അതുകൊണ്ട് തന്നെ ഒന്നിലധികം ശക്തരായ ടെലിക്കോം കമ്പനികൾ വിപണിയിൽ നിലനിൽക്കേണ്ടത് ഉപയോക്താക്കളുടെ ആവശ്യം കൂടിയാണ്. എയർടെല്ലും വിഐയും ഉപയോക്താക്കളെ നേടാനുള്ള പരിശ്രമങ്ങൾ നിരന്തരം നടത്തുന്നുണ്ട്.

ലോകത്തിലെ തന്നെ ഏറ്റവും കുറഞ്ഞ നിരക്കിൽ ഡാറ്റ, കോളിങ് ആനുകൂല്യങ്ങൾ ലഭിക്കുന്ന രാജ്യങ്ങളിലൊന്നാണ് ഇന്ത്യ. വളരെ കുറഞ്ഞ നിരക്കിൽ ടെലിക്കോം സേവനങ്ങൾ ലഭ്യമായതിൽ ഇന്ത്യയിലെ ഉപയോക്താക്കൾ നന്ദി പറയേണ്ടത് ജിയോയോട് തന്നെയാണ്. എന്നാൽ ജിയോ മാത്രമുള്ള ഒരു കാലമാണ് വരുന്നതെങ്കിൽ ഈ അവസ്ഥയിലായിരിക്കില്ല കാര്യങ്ങൾ എന്ന് വ്യക്തമാണ്. നിലവിലെ വിപണിയുടെ സ്വഭാവത്തെ തന്നെ മാറ്റ മറിക്കാൻ ഏതെങ്കിലും ഒരു കമ്പനിയുടെ മാത്രം ആധിപത്യത്തിന് സാധിക്കും. അതുകൊണ്ട് ആരോഗ്യകരമായ മത്സരമുള്ള ഒന്നിലധികം ശക്തരായ കമ്പനികളാണ് ഇന്ത്യൻ ടെലിക്കോം വിപണിക്ക് ആവശ്യം.