കേരളത്തിൽ ഇനി ജിയോയ്ക്ക് പറപറക്കും വേഗത, 20 മെഗാഹെർട്സ് സ്പെക്ട്രം വിന്യസിച്ചു

മുകളിൽ സൂചിപ്പിച്ച സംസ്ഥാനങ്ങളിലെ സ്പെക്ട്രം ഹോൾഡിംഗ് ഇരട്ടിയാക്കുന്നതിലൂടെ ടെൽകോ ദക്ഷിണേന്ത്യയിൽ വളരെയധികം ശ്രദ്ധ കേന്ദ്രീകരിക്കുന്നുവെന്ന് വ്യക്തമാണ്. ഇപ്പോൾ കേരളത്തിൽ ജിയോ മൊത്തം 20 മെഗാഹെർട്സ് സ്പെക്ട്രം ഒന്നിലധികം ബാൻഡുകളിലായി വിന്യസിച്ചിട്ടുണ്ട്. അടുത്തിടെ നടന്ന ലേലത്തിൽ 850 മെഗാഹെർട്സ് ബാൻഡിൽ 5 മെഗാഹെർട്സ് സ്പെക്ട്രവും 1800 മെഗാഹെർട്സ് ബാൻഡിൽ 5 മെഗാഹെർട്സ് സ്പെക്ട്രവും കേരളത്തിലെ 2300 മെഗാഹെർട്സ് ബാൻഡിൽ 10 മെഗാഹെർട്സ് സ്പെക്ട്രവും റിലയൻസ് ജിയോ സ്വന്തമാക്കിയിരുന്നു.

രാജ്യത്തെ 22 ടെലികോം സർക്കിളുകളിൽ സ്പെക്ട്രം ഉപയോഗിക്കാനുള്ള അവകാശം കൂടുതലായി നേടിയെടുത്തിട്ടുണ്ടെന്ന് ജിയോ വ്യക്തമാക്കിയിരുന്നു. ടെലിക്കോം കമ്പനി സംസ്ഥാനത്തെ നിലവിലുള്ള 12,000+ സൈറ്റുകളിലാണ് സ്പെക്ട്രം വിന്യസിച്ചത്. സ്പെക്ട്രത്തിന്റെ വിന്യാസത്തിന് ശേഷം 850 മെഗാഹെർട്സ്, 1800 മെഗാഹെർട്സ് ബാൻഡുകളിൽ നെറ്റ്‌വർക്ക് നൽകുന്ന ബാൻഡ്‌വിഡ്ത്ത് ഇരട്ടിയായി, 2300 മെഗാഹെർട്സ് ബാൻഡിലെ ബാൻഡ്‌വിഡ്ത്ത് 25% വർദ്ധിച്ചു.

കമ്മ്യൂണിക്കേഷനായി മെച്ചപ്പെട്ട 4ജി നെറ്റ്‌വർക്കുകൾ പ്രയോജനപ്പെടുത്താൻ സംസ്ഥാനത്തെ റിലയൻസ് ജിയോ ഉപയോക്താക്കളെ പുതിയ സ്പെക്ട്രം സഹായിക്കും. ഈ നീക്കം പീക്ക് സമയങ്ങളിൽ ഉണ്ടാകുന്ന നെറ്റ്‌വർക്ക് തിരക്ക് കുറയ്ക്കും. കൂടാതെ മെച്ചപ്പെടുത്തിയ ബാൻഡ്‌വിഡ്ത്തും കണക്റ്റിവിറ്റിയും വീട്ടിൽ നിന്ന് ജോലി ചെയ്യുന്നവരും പഠിക്കുന്നവരുമായ ഉപയോക്താക്കൾക്ക് സഹായകരമാവും. ഇത് കേരളത്തിലെ ഉപയോക്താക്കളെ സംബന്ധിച്ച് ഏറെ ഗുണകരമായ കാര്യമാണ്.

റിലയൻസ് ജിയോയ്ക്ക് സംസ്ഥാനത്ത് 10.3 ദശലക്ഷത്തിലധികം വരിക്കാരുണ്ട്. പുതിയ നീക്കത്തോടെ ഉപയോക്താക്കളുടെ എണ്ണം വർധിക്കുമെന്നാണ് പ്രതീക്ഷിക്കുന്നത്. 2021ൽ കേരളത്തിലെ 4ജി നെറ്റ്‌വർക്കുകൾ 15 ശതമാനം വർദ്ധിപ്പിക്കാൻ ജിയോ ലക്ഷ്യമിടുന്നുണ്ട്. ടെൽകോയുടെ കുറഞ്ഞ താരിഫുകളും മികച്ച കവറേജും കേരളത്തിൽ മാത്രമല്ല രാജ്യത്തുടനീളമുള്ള ഉപയോക്താക്കളെ ആകർഷിക്കുന്നു. വരും ദിവസങ്ങളിൽ ജിയോ മറ്റ് സംസ്ഥാനങ്ങളിൽ കൂടുതൽ സ്പെക്ട്രം വിന്യസിക്കുമെന്നാണ് പ്രതീക്ഷിക്കുന്നത്.

റിലയൻസ് ജിയോ ഇന്ത്യൻ ടെലിക്കോം വിപണിയിൽ മാറ്റങ്ങൾ കൊണ്ടുവന്ന ടെലിക്കോം ഓപ്പറേറ്ററാണ്. ജിയോയുടെ പ്ലാനുകളാണ് ഇന്ത്യയിൽ വളരെ കുറഞ്ഞ നിരക്കിൽ കൂടുതൽ ആനുകൂല്യം നൽകി തുടങ്ങിയത്. ദിവസേന ഒരു ജിബിയോ അതിൽ കൂടുതലോ ഡാറ്റ ലഭിക്കുന്ന നിലയിലേക്കുള്ള പ്ലാനുകൾ കൊണ്ടുവന്നതും ജിയോയാണ്. വളരെ ചുരുങ്ങിയ കാലം കൊണ്ട് ഇന്ത്യൻ ടെലക്കോം വിപണി വിഹിതത്തിൽ ഒന്നാമത് എത്താൻ ജിയോയ്ക്ക് സാധിച്ചിട്ടുണ്ട്. ജിയോയുടെ കേരളത്തിൽ കൂടുതൽ സ്പെക്ട്രം കൊണ്ടുവരാനുള്ള നീക്കം കൂടുതൽ ഉപയോക്താക്കളെ ആകർഷിക്കാൻ സഹായിക്കുമെന്ന കാര്യം ഉറപ്പാണ്.