ഇനി ഏത് കു​ഗ്രാമത്തിലും അതിവേ​ഗ ഇന്റർനെറ്റ്; സ്പേസ് ഫൈബർ സേവനം അവതരിപ്പിച്ച് ജിയോ

രാജ്യത്ത് ആദ്യമായി ഉപഗ്രഹാധിഷ്ഠിത ഗിഗാ ഫൈബര്‍ ഇന്റര്‍നെറ്റ് സേവനം അവതരിപ്പിച്ച് പ്രമുഖ ടെലികോം കമ്പനിയായ റിലയൻസ് ജിയോ. ഡൽഹിയിൽ നടക്കുന്ന ഇന്ത്യ മൊബൈൽ കോൺഗ്രസിൽ വെള്ളിയാഴ്ച പ്രധാനമന്ത്രി നരേന്ദ്ര മോദിക്ക് മുമ്പിലാണ് ജിയോ ഈ സേവനം അവതരിപ്പിച്ചിരിക്കുന്നത്. ജിയോ സ്പേസ് ഫൈബർ എന്നാണ് ഈ സേവനത്തിന് നൽകിയിരിക്കുന്ന പേര്.

എയർ ഫൈബർ സേവനം അവതരിപ്പിച്ച് ആഴ്ചകൾക്ക് ഉള്ളിലാണ് ജിയോ തങ്ങളുടെ പുതിയ സാങ്കേതിക വിദ്യ അവതരിപ്പിച്ചിരിക്കുന്നത്. ബ്രോഡ്‌ബാൻഡ് സേവനം ആയിരിക്കും ഇതിലൂടെ ലഭ്യമാകുക. ഇതുവഴി ​ഗ്രാമങ്ങളിൽ വരെ അതിവേ​ഗ ഇന്റർനെറ്റ് ലഭ്യമാകും എന്നാണ് ജിയോ അവകാശപ്പെടുന്നത്. എലോൺ മസ്‌കിന്റെ സ്റ്റാർലിങ്കിന് സമാനമായ സേവനം ആയിരിക്കും ജിയോ സ്പേസ് ഫൈബറിന്റേത്. പുതിയ സേവനം നിലവിൽ വരുന്നതോടെ രാജ്യത്തിലെ ഡിജിറ്റൽ രം​ഗത്തിന് തന്നെ വലിയ കുതിച്ചു ചാട്ടം ആയിരിക്കും.

വികസനം വലിയ രീതിയിൽ കടന്നു ചെന്നിട്ടില്ലാത്ത കു​ഗ്രാമങ്ങളിൽ വരെ അതിവേ​ഗ ഇന്റർനെറ്റ് വിതരണത്തിന് ഈ സേവനം സഹായിക്കുന്നതായിരിക്കും. നിലവിൽ രാജ്യത്തുടനീളമായി 450 ദശലക്ഷത്തിലധികം ഉപഭോക്താക്കൾ ജിയോയുടെ അതിവേഗ ബ്രോഡ്ബാൻഡ് സേവനം ആസ്വദിക്കുന്നുണ്ട് എന്നാണ് ജിയോ അവകാശപ്പെടുന്നത്. എന്നാൽ ഡിജിറ്റൽ‌ മേഖലയിൽ പല ​ഗ്രാമങ്ങളും ഇപ്പോഴും പിന്നോക്കം നിൽക്കുകയാണ്. സ്പേസ് ഫൈബറിന്റെ കടന്നു വരവ് ഈ കുറവ് നികത്തും എന്നാണ് പ്രതീക്ഷിക്കുന്നത്.

സാറ്റ്ലൈറ്റ് കണക്റ്റിവിറ്റി സേവനദാതാവായ എസ്.ഇ.എസുമായി സഹകരിച്ചായിരിക്കും സ്പേസ് ഫൈബർ സേവനങ്ങൾ ജിയോ വാ​ഗ്ദാനം ചെയ്യുക. ഈ പദ്ധതിയുടെ ഭാ​ഗമായി എസ്ഇഎസിന്റെ ഓ3ബി, ഓ3ബി എംപവർ എന്നീ സാറ്റ്ലൈറ്റുകളിലേക്ക് ജിയോയ്ക്ക് ആക്സസ് ലഭിച്ചിട്ടുമുണ്ട്. മീഡിയം എർത്ത് ഓർബിറ്റ് (എംഇഒ) സാറ്റലൈറ്റ് സാങ്കേതികവിദ്യയാണ് ഇതിനായി ഇവർ ഉപയോ​ഗിച്ചിരിക്കുന്നത്. സാധാരണക്കാർക്ക് താങ്ങാവുന്ന വിലയിൽ ആയിരിക്കും സ്പേസ് ഫൈബർ സേവനം എത്തിക്കുക എന്നും ജിയോ അറിയിച്ചു.

MOST READ: അ‌തിമനോഹരം, ദേ കാണ്! ഡി​സൈൻ അ‌ടിമുടി പുതുക്കി ഐക്യൂ 12; ഹൃദയങ്ങൾ കീഴടക്കി ലീക്ക് ചിത്രങ്ങൾ

ഇതിനോടകം തന്നെ രാജ്യത്തിന്റെ ചില ഭാ​ഗങ്ങളിൽ ജിയോ സ്പേസ് ഫൈബർ സേവനം ആരംഭിച്ചിട്ടുണ്ട്. ഛത്തീസ്ഗഡിലെ കോർബ, ഒഡീഷയിലെ നബരംഗ്പൂർ, ഗുജറാത്തിലെ ഗിർ, അസമിന്റെ ചില ഭാ​ഗങ്ങൾ എന്നിവിടങ്ങളിലാണ് ഈ സേവനം ലഭിക്കുന്നത്. രാജ്യത്തിന്റെ മറ്റ് ഭാ​ഗങ്ങളിലേക്കും ഉടൻ തന്നെ ഈ സേവനം എത്തിക്കുമെന്നും ഇവർ പറയുന്നു. അതേ സമയം കഴിഞ്ഞ വിനായക ചതുർത്ഥി ദിവസമാണ് ജിയോ തങ്ങളുടെ എയർ ഫൈബർ സേവനം രാജ്യത്ത് അവതരിപ്പിച്ചത്.

തിരഞ്ഞെടുത്ത എട്ട് ന​ഗരങ്ങളിലാണ് ജിയോയുടെ എയർ ഫൈബർ സേവനങ്ങൾ ഇപ്പോൾ ലഭിക്കുന്നത്. അഹമ്മദാബാദ്, ബെംഗളൂരു, ചെന്നൈ, ഡൽഹി, ഹൈദരാബാദ്, കൊൽക്കത്ത, മുംബൈ, പൂനെ എന്നിവയാണ് ഈ ന​ഗരങ്ങൾ. 1000 എംബിപിഎസ് സ്പീഡ് വരെ ജിയോ ഇതിലൂടെ വാ​ഗ്ദാനം ചെയ്യുന്നു. നിലവിൽ എയർടെൽ, ജിയോ എന്നീ രണ്ട് കമ്പനികൾ മാത്രമാണ് രാജ്യത്ത് എയർ ഫൈബർ സേവനങ്ങൾ നൽകുന്നത്. വയർലെസ് കണക്ഷൻ ഉപയോഗിച്ച് അതിവേ​ഗ ഇന്റർനെറ്റ് നൽകുന്ന സംവിധാനമാണ് ഇത്.

രണ്ട് വിഭാ​ഗങ്ങളിലായിട്ടാണ് ജിയോ എയർ ഫൈബർ സേവനം ഉപഭോക്താക്കൾക്ക് നൽകുന്നത്. ആദ്യത്തേത് ജിയോ എയർ ഫൈബർ പ്ലാനും രണ്ടാമത്തേത് ജിയോ എയർ‌ ഫൈബർ മാക്സ് പ്ലാനും. 599 രൂപ മുതലാണ് എയർ ഫൈബറിന്റെ പ്ലാനുകൾ ആരംഭിക്കുന്നത്. 899, 1199 എന്നിവയാണ് ഈ വിഭാ​ഗത്തിലെ മറ്റ് പ്ലാനുകൾ. 100 എംബിപിഎസ് വരെ ഇന്റർനെറ്റ് വേഗതയായിരിക്കും ഈ പ്ലാനുകൾ ഉപഭോക്താക്കൾക്ക് വാ​ഗ്ദാനം ചെയ്യുന്നത്. നിരവധി ഒടിടി പ്ലാറ്റ്ഫോമുകളും പ്ലാനിന്റെ ഭാ​ഗമായി ലഭിക്കും.

അതേസമയം ജിയോ എയർ ഫൈബർ മാക്സിന്റെ പ്ലാനുകൾ ആരംഭിക്കുന്നത് 1499 രൂപ മുതലാണ്. 2499 രൂപയുടെ പ്ലാനും 3999 രൂപയുടെ പ്ലാനും ഈ വിഭാ​ഗത്തിൽ ഉണ്ടായരിക്കുന്നതാണ്. 1000 എംബിപിഎസ് സ്പീഡ് ആണ് ജിയോ എയർ ഫൈബർ മാക്സിന്റെ പ്ലാനുകൾ വാ​ഗ്ദാനം ചെയ്യുന്നത്. ഇതിന് പുറമെ 550-ലധികം ഡിജിറ്റൽ ചാനലുകളും വിവിധ ഓടിടി പ്ലാറ്റ്ഫോമുകളും നിങ്ങൾക്ക് ആസ്വദിക്കാൻ സാധിക്കുന്നതാണ്.