ലോക്കഡൌണിലും റെഡ്സോണിൽ അല്ലാത്തവർക്ക് സ്മാർട്ട്ഫോൺ അടക്കമുള്ളവ ഓൺലൈനായി വാങ്ങാം

എം‌എച്ച്‌എ മാർ‌ഗ്ഗനിർ‌ദ്ദേശങ്ങൾ‌ അനുസരിച്ച്, ഇ-കൊമേഴ്‌സ് പ്ലാറ്റ്‌ഫോമുകൾ വഴി മൊബൈൽ ഫോൺ അടക്കമുള്ള അവശ്യ സാധനങ്ങളുടെ പട്ടികയിൽ ഉൾപ്പെട്ടിട്ടില്ലാത്ത വസ്തുക്കളുടെ വിൽ‌പന കൊറോണ കേസുകൾ‌ നിലവിലില്ലാത്തതോ കുറവോ ആയ പ്രദേശങ്ങളിൽ‌ മാത്രമേ അനുവദിക്കൂ. ഓറഞ്ച്, ഗ്രീൻ എന്നിങ്ങനെ പട്ടികപ്പെടുത്തിയ ജില്ലകളിൽ ഇനിമുതൽ ഓൺലൈനായി സാധനങ്ങൾ വാങ്ങാൻ സാധിക്കും. റെഡ്സോണുകളിൽ ഇത്തരം സേവനങ്ങളൊന്നും അനുവദിക്കില്ലെന്നും സർക്കാർ അറിയിച്ചിട്ടുണ്ട്.

തപാൽ, കൊറിയർ സേവനങ്ങൾ ആരംഭിക്കും

അവശ്യ സാധനങ്ങളല്ലാത്തവ വിതരണം ചെയ്യുന്നത് അനുവദിക്കുന്നതോടെ പുതിയ സ്മാർട്ട്ഫോണോ ലാപ്ടോപ്പോ വാങ്ങാൻ ആഗ്രഹിക്കുന്നവർക്ക് ഓൺലൈനായി അവ ബുക്ക് ചെയ്യാവുന്നതാണ്. ഏപ്രിലിൽ സർക്കാർ ഇ-കൊമേഴ്‌സ് പ്ലാറ്റ്‌ഫോമുകൾ വഴി അവശ്യവസ്തുക്കൾ വിതരണം ചെയ്യാൻ അനുവദിച്ചിരുന്നുവെങ്കിലും അവശ്യമല്ലാത്ത വസ്തുക്കൾ വിതരണം ചെയ്യുന്നത് നിരോധിച്ചിരുന്നു. അതുകൊണ്ട് ആമസോണും ഫ്ലിപ്കാർട്ടും സ്മാർട്ട്‌ഫോൺ, ലാപ്‌ടോപ്പുകൾ എന്നിവയുടെ വിൽപ്പന നിർത്തി വച്ചിരിക്കുകയാണ്.

തിരഞ്ഞെടുത്ത പ്രദേശങ്ങളിൽ നിയന്ത്രണങ്ങളിൽ അയവ് വരുത്തുന്നതോടെ സ്മാർട്ട്‌ഫോൺ‌ കമ്പനികൾ‌ പുതിയ ഫോണുകൾ‌ പുറത്തിറക്കാൻ ആരംഭിക്കും. വൺപ്ലസ് ഏതാനും ആഴ്ചകൾക്ക് മുമ്പ് ഇന്ത്യൻ വിപണിയിൽ വൺപ്ലസ് 8 സീരീസ് ഫോണുകൾ പ്രഖ്യാപിച്ചിരുന്നു. ഈ ഫോണിന്റെ വിലയും കമ്പനി പ്രഖ്യാപിച്ചു. എന്നാൽ ലോക്ക്ഡൗൺ കാരണം വിൽപ്പന നിർത്തിവച്ചിരിക്കുകയാണ്. ആപ്പിളും 42,990 രൂപ മുതൽ വില വരുന്ന ഐഫോൺ എസ്ഇ ഇന്ത്യൻ വിപണിയിൽ പ്രഖ്യാപിച്ചിട്ടുണ്ട്.

നിലവിൽ കേന്ദ്രപട്ടികയില്‍ കോട്ടയവും കണ്ണൂരും റെഡ്സോണിലാണ്. നേരത്തെ റെഡ്സോണിൽ ആയിരുന്ന കോഴിക്കോടും മലപ്പുറവും കാസർഗോഡും ഇടുക്കിയും ഓറഞ്ചിലേക്ക് മാറിയിട്ടുണ്ട്. ഇതോടെ പത്ത് ജില്ലകൾ ഓറഞ്ച് സോണിലായി. നേരത്തെ ഓറഞ്ച് സോണിലായിരുന്ന എറണാകുളവും വയനാടും ഇപ്പോൾ ഗ്രീൻ സോണിലേക്ക് മാറിയിട്ടുണ്ട്. നിലവിലെ പട്ടികപ്പെടുത്തൽ അനുസരിച്ച് കോട്ടയവും കണ്ണൂരും ഒഴികെയുള്ള കേരളത്തിലെ മറ്റ് ജില്ലകളിലെല്ലാം അവശ്യ സാധനങ്ങളുടെ പട്ടികയിൽ ഉൾപ്പെടുത്താത്ത സാധനങ്ങളും ഓൺലൈനായി വാങ്ങാൻ സാധിക്കും.

ഇ-കൊമേഴ്സ് പ്ലാറ്റ്ഫോമുകൾക്ക് അവശ്യ സാധനങ്ങളുടെ പട്ടികയിൽ ഉൾപ്പെടാത്ത സാധനങ്ങളും ഓറഞ്ച്, ഗ്രീൻ സോണുകളിൽ വിൽപ്പന നടത്താൻ അനുമതി നൽകിയിട്ടുണ്ടെങ്കിലും ആമസോണിന്റെ വെബ്സൈറ്റിലെ സ്മാർട്ട്ഫോൺ വിഭാഗത്തിൽ പുതിയ സ്മാർട്ട്ഫോണുകളെല്ലാം അൺഅവൈലബിൾ എന്ന് തന്നെയാണ് കാണിക്കുന്നത്. എപ്പോൾ മുതലാണ് ഈ സൈറ്റുകൾ പൂർവ്വ സ്ഥിതിയിലേക്ക് മാറ്റുന്നത് എന്നകാര്യം വ്യക്തമല്ല.