ഇന്ത്യക്കാരുടെ ഇടപാടെല്ലാം ഫോണിൽ തന്നെ; യുപിഐ വഴിയുള്ള പണമിടപാടിൽ സർവകാല റെക്കോർഡ്

ഈ വർഷത്തിന്റെ ആദ്യ പാദത്തിൽ ആകെ മൊത്തം 10.25 ട്രില്യൺ രൂപയുടെ ഇടപാടുകളാണ് യുപിഐ വഴി നടന്നിട്ടുള്ളത്. യൂണിഫൈഡ് പേയ്‌മെന്റ് ഇന്റർഫേസ് അഥവാ യുപിഐ ഉപഭോക്താക്കൾക്കിടയിൽ ഏറ്റവും ഇഷ്ടപ്പെട്ട പേയ്‌മെന്റ് രീതിയായി മാറിയിരിക്കുകയാണ് എന്ന് വേൾഡ് ലൈനിൽ നിന്നുള്ള റിപ്പോർട്ടിലൂടെ വ്യക്തമാകുന്നു. ജനുവരി മുതൽ മാർച്ച് വരെയുള്ള മാസങ്ങളിലുള്ള വർഷത്തിലെ ആദ്യ പാദത്തിലെ കണക്കുകളാണ് ഈ റിപ്പോർട്ടിൽ ഉള്ളത്.

ജനുവരി മുതൽ മാർച്ച് വരെയുള്ള മൂന്ന് മാസങ്ങളിലായി ഇന്ത്യയിൽ യുപിഐ ആപ്പുകൾ വഴി 9.36 ബില്യൺ ഇടപാടുകൾ നടന്നിട്ടുണ്ട്. ഈ ഇടപാടുകളിലൂടെ 10.24 ട്രില്യൺ രൂപയാണ് ആളുകൾ കൈമാറ്റം ചെയ്തിട്ടുള്ളത്. ഉപഭോക്താക്കൾ ഏറ്റവും കൂടുതൽ ഉപയോഗിച്ചിരിക്കുന്നത് പി2എം എന്ന് വിളിക്കുന്ന യുപിഐ പേയ്‌മെന്റ് മോഡാണ്. അതായത് വ്യക്തികൾ വ്യാപാരികൾക്ക് പണം നൽകുന്ന രീതിയാണ് ഇത്. മൊത്തം ഇടപാടുകളിൽ 64 ശതമാനവും ഇത്തരം ഇടപാടുകളാണ്. മൊത്തം ഇടപാട് തുകയുടെ 50 ശതമാനവും പി2എം രീതിയിലുള്ളതാണ്.

വോളിയത്തിന്റെ അടിസ്ഥാനത്തിൽ യുപിഐ 14.55 ബില്യൺ ഇടപാടുകൾ നടത്തിയതായും റിപ്പോർട്ടിൽ പറയുന്നു. 2022 ലെ ഒന്നാം പാദത്തിലെ കണക്കുകൾ കഴിഞ്ഞ വർഷത്തേതുമായി താരതമ്യം ചെയ്ത് നോക്കിയാൽ ഇരട്ടിയായതായി കാണാം. ഇടപാടുകളുടെ എണ്ണത്തെ കൂടാതെ തുകയും ഇത്തവണ കൂടിയിട്ടുണ്ട്. 26.19 ട്രില്യൺ രൂപയാണ് ഇത്തവണ അധികമായി വന്നിരിക്കുന്നത്. 2021 ലെ ഒന്നാം പാദത്തിൽ നിന്ന് ഇടപാടുകളുടെ എണ്ണത്തിൽ 99 ശതമാനം വർധനവും മൂല്യത്തിൽ 90 ശതമാനത്തിലധികം വർധനവും ഉണ്ടായിട്ടുണ്ട്.

യുപിഐ അധിഷ്‌ഠിത പേയ്‌മെന്റ് പ്ലാറ്റ്‌ഫോമുകളാണ് ഇന്ത്യക്കാർ പണം ഇടപാടിനായി ഏറ്റവും കൂടുതൽ ആശ്രയിക്കുന്നത് എന്ന് പുതിയ കണക്കുകൾ വ്യക്തമാക്കുന്നു. ഫോൺപേ, ഗൂഗിൾപേ, പേടിഎം, പേയ്മെന്റ്സ് ബാങ്ക് ആപ്പ്, ആമസോൺ പേ, ആക്സിസ് ബാങ്ക് ആപ്പ് എന്നിവയെല്ലാം ഈ യുപിഐ ആപ്പുകളുടെ പട്ടികയിൽ ഉൾപ്പെടുന്നു. യെസ് ബാങ്ക്, ആക്‌സിസ് ബാങ്ക്, സ്റ്റേറ്റ് ബാങ്ക് ഓഫ് ഇന്ത്യ, എച്ച്‌ഡിഎഫ്‌സി ബാങ്ക്, പേടിഎം പേയ്‌മെന്റ് ബാങ്ക് എന്നിവ ഉൾപ്പെടുന്നതാണ് മുൻനിര പിഎസ്‌പി യുപിഐ പ്ലാറ്റ്ഫോമുകൾ.

മുൻനിര യുപിഐ ആപ്പുകളിൽ ഫോൺപേ, ഗൂഗിൾ പേ, പേടിഎം എന്നിവയുടെ ജനപ്രിതി ഏറെ ശ്രദ്ധേയമാണ്. യുപിഐ അടിസ്ഥാനമാക്കിയുള്ള മൊത്തം ഇടപാടുകളിൽ 94.8 ശതമാനവും ഈ പ്ലാറ്റ്ഫോമുകൾ വഴിയാണ് നടക്കുന്നത്. മൊത്തം തുകയുടെ 93 ശതമാനവും ഫോൺപേ, ഗൂഗിൾ പേ, പേടിഎം എന്നിവ വഴി നടക്കുന്നു. യുപിഐ അടിസ്ഥാനമാക്കിയുള്ള ഇടപാടുകൾ ക്രമാനുഗതമായി വർദ്ധിച്ചുകൊണ്ടിരിക്കുകയാണ്. വരും മാസങ്ങളിൽ ഇത്തരം ഇടപാടുകൾ ഇനിയും വർധിക്കും.

ആമസോൺ പേ, വാട്സ്ആപ്പ് പേ എന്നിവ പോലുള്ള പുതിയ യുപിഐ പ്ലാറ്റ്ഫോമുകൾ ക്യാഷ്ബാക്ക് ഓഫറുകൾ അടക്കമുള്ള മികച്ച ഡീലുകൾ ഉപഭോക്താക്കൾക്ക് നൽകുന്നുണ്ട്. അതുകൊണ്ട് തന്നെ ഇനിയും ഇത്തരം പ്ലാറ്റ്ഫോമുകളിൽ ഉപയോക്താക്കൾ വർധിക്കും. ഇടപാടുകൾ നടത്താൻ വളരെ എളുപ്പമാണ് എന്നതും യുപിഐ പേയ്‌മെന്റുകളുടെ വ്യാപകമായ സ്വീകാര്യതയും ഈ ഇടപാടുകൾ വർധിക്കാൻ കാരണമായി. ഷോപ്പിങ് രീതികളിൽ ഉണ്ടായ മാറ്റവും യുപിഐ ആപ്പുകളുടെ സ്വീകാര്യത വർധിപ്പിക്കുന്നു.