മോട്ടറോള വൺ ഫ്യൂഷൻ സ്മാർട്ട്ഫോൺ പുറത്തിറങ്ങി: വിലയും സവിശേഷതകളും

മോട്ടറോള വൺ ഫ്യൂഷൻ സ്മാർട്ട്ഫോണിലൂടെ മിഡ് റേഞ്ച് വില വിഭാഗത്തിലുള്ള തങ്ങളുടെ സ്മാർട്ട്ഫോൺ നിര ശക്തിപ്പെടുത്താനാണ് കമ്പനി ലക്ഷ്യമിടുന്നത്. കൊറോണ വൈറസ് കാരണം ചൈനീസ് സ്മാർട്ട്‌ഫോൺ നിർമ്മാതാക്കൾ പ്രതിസന്ധി നേരിടുമ്പോൾ മോട്ടറോള തങ്ങളുടെ വിപണി വിഹിതം കഴിവതും വർധിപ്പിക്കാനുള്ള പരിശ്രമത്തിലാണ്.

മോട്ടറോള വൺ ഫ്യൂഷൻ: വില, സവിശേഷതകൾ

മോട്ടറോള വൺ ഫ്യൂഷന് ചിലിയിൽ CLP199,990 (ഏകദേശം 18,650 രൂപ) ആണ് വില. ലാറ്റിനമേരിക്കയിൽ ഇതിനകം സ്മാർട്ട്‌ഫോൺ വിൽപ്പനയ്‌ക്കെത്തിച്ചിട്ടുണ്ട്. എമറാൾഡ് ഗ്രീൻ, സാപ്പയർ ബ്ലൂ നിറങ്ങളിലാണ് ഈ ഡിവൈസ് ലഭ്യമാവുക. അടുത്ത മാസം മുതൽ സൗദി അറേബ്യ, യുണൈറ്റഡ് അറബ് എമിറേറ്റ്സ് എന്നിവിടങ്ങളിലും ഈ ഡിവൈസ് ലഭ്യമാകുമെന്ന് കമ്പനി അറിയിച്ചു.

മോട്ടറോള വൺ ഫ്യൂഷൻ ഇന്ത്യയിലേക്ക് കൊണ്ടുവരാൻ കമ്പനി പദ്ധതിയിടുന്നുണ്ടോ എന്ന് വ്യക്തമല്ല. വൺ ഫ്യൂഷന്+ സ്മാർട്ട്ഫോണിന് ഇന്ത്യയിൽ ഇതുവരെ നല്ല പ്രതികരണമാണ് ലഭിച്ചത്. മോട്ടറോള വൺ ഫ്യൂഷനിൽ 6.5 ഇഞ്ച് എച്ച്ഡി + ഡിസ്‌പ്ലേയും അതിലൊരു വാട്ടർ ഡ്രോപ്പ് നോച്ചും നൽകിയിട്ടുണ്ട്. ഈ നോച്ചിൽ 8 മെഗാപിക്സൽ സെൽഫി ക്യാമറയാണ് നൽകിയിട്ടുള്ളത്.

ക്വാൽകോം സ്‌നാപ്ഡ്രാഗൺ 710 SoCയുടെ കരുത്തിലാണ് ഈ ഡിവൈസ് പ്രവർത്തിക്കുന്നത്. 4 ജിബി റാമും 64 ജിബി സ്റ്റോറേജുമുള്ള ഡിവൈസിൽ സ്റ്റോറേജ് എക്സ്പാൻഡ് ചെയ്യാനുള്ള സംവിധാനവും ഉണ്ട്. പിന്നിൽ, 48 മെഗാപിക്സലിന്റെ പ്രധാന ക്യാമറ ഉൾപ്പെടെ ഒരു ക്വാഡ് റിയർ ക്യാമറ സെറ്റപ്പും നൽകിയിട്ടുണ്ട്. 8 മെഗാപിക്സൽ അൾട്രാവൈഡ്, 5 മെഗാപിക്സൽ മാക്രോ, 2 മെഗാപിക്സൽ ഡെപ്ത് സെൻസർ എന്നിവയാണ് ഈ ക്യാമറ സെറ്റപ്പിൽ ഉൾപ്പെടുത്തിയിരിക്കുന്ന ക്യാമറകൾ.

മോട്ടറോള വൺ ഫ്യൂഷൻ സ്മാർട്ട്ഫോണിന്റെ മറ്റൊരു സവിശേഷത അതിനറെ പിന്നിൽ നൽകിയിട്ടുള്ള ഫിംഗർപ്രിന്റ് സെൻസറാണ്. ഒരു വശത്ത് ഒരു ഡെഡിക്കേറ്റഡ് ഗൂഗിൾ അസിസ്റ്റന്റ് ബട്ടണും ഉണ്ട്. ഡിവൈസിൽ 5,000 എംഎഎച്ച് ബാറ്ററിയാണ് നൽകിയിട്ടുള്ളത്. പ്രൊഡക്ട് ലിസ്റ്റിംഗിൽ ഫാസ്റ്റ് ചാർജിനുള്ള സപ്പോർട്ടിനെ പറ്റി പരാമർശമില്ല. ആൻഡ്രോയിഡ് 10 ഔട്ട് ഓഫ് ദി ബോക്‌സിലാണ് ഈ ഡിവൈസ് പ്രവർത്തിക്കുന്നത്.