സ്മാർട്ട് ടിവി വിപണിയിലേക്ക് ഓപ്പോ; ഓപ്പോ ടിവി ഈ വർഷം തന്നെ പുറത്തിറക്കും

സ്മാർട്ട്‌ഫോണുകൾക്ക് പുറമെ അടുത്തിടെ എൻ‌കോ ഫ്രീ ടി‌ഡബ്ല്യുഎസ് ഇയർബഡ്സ്, ഓപ്പോ വാച്ച് എന്നിവ പുറത്തിറക്കി തങ്ങളുടെ ഡിവൈസുകളുടെ പോർട്ട്ഫോളിയോ വികസിപ്പിക്കുകയാണ് ഓപ്പോ. 2020ന്റെ രണ്ടാം പകുതിയിൽ പുതിയ ടിവി ലൈനപ്പ് ആരംഭിക്കുമെന്ന് കമ്പനി സ്ഥിരീകരിച്ചതായി ഓപ്പോയുടെ വൈസ് പ്രസിഡന്റും എമർജിംഗ് മൊബൈൽ ടെർമിനൽ ബിസിനസ് പ്രസിഡന്റുമായ ലിയു ബോ പറഞ്ഞു.

മൾട്ടി ടെർമിനൽ സ്മാർട്ട് ലൈഫ് സൃഷ്ടിക്കുക എന്നതാണ് ഓപ്പോയുടെ ഇൻറർനെറ്റ് ഓഫ് തിംഗ്സ് (ഐഒടി) കാഴ്ചപ്പാടെന്ന് ബോ പറഞ്ഞു. ഈ ആവശ്യത്തിനായി വ്യക്തിഗത, കുടുംബം, യാത്ര, ഓഫീസ് എന്നിങ്ങനെ നാല് പ്രധാന സാഹചര്യങ്ങളിൽ ഓപ്പോ ശ്രദ്ധ കേന്ദ്രീകരിക്കും. കണക്റ്റുചെയ്‌ത ഡിവൈസുകൾക്ക് കീഴിലുള്ള പ്രൊഡക്ടുകളുടെ പൂർണ്ണമായ കാറ്റലോഗ് നൽകാനാണ് ഓപ്പോ ആഗ്രഹിക്കുന്നതെന്നും അദ്ദേഹം കൂട്ടിച്ചേർത്തു.

ഓപ്പോയുടെ പുതിയ കാഴ്ച്ചപാടിന്റെ ആദ്യ ചുവടുവയ്പ്പുകളിലൊന്നാണ് സ്മാർട്ട് ടിവി എന്ന് സീനിയർ എക്സിക്യൂട്ടീവ് പറഞ്ഞു. എന്തായാലും വരാനിരിക്കുന്ന ടിവിയെക്കുറിച്ച് വ്യക്തമായ വിശദാംശങ്ങളൊന്നും ഇതുവരെ പുറത്ത് വിട്ടിട്ടില്ല. ഇതുവരെ ലീക്ക് റിപ്പോർട്ടുകളൊന്നും പുറത്തുവന്നിട്ടുമില്ല. കമ്പനി ഉടൻ തന്നെ ടിവി പുറത്തിറക്കുമെന്നതിനാൽ അധികം വൈകാതെ വിശദാംശങ്ങൾ ലഭ്യമാകുമെന്ന് പ്രതീക്ഷിക്കുന്നു.

ഇന്ത്യയിലെ സ്മാർട്ട് ടിവി മാർക്കറ്റ്

നിരവധി സ്മാർട്ട്ഫോൺ ബ്രാൻഡുകൾ സ്മാർട്ട് ടിവികൾ, സ്മാർട്ട് വാച്ചുകൾ, ഫിറ്റ്നസ് ബാൻഡുകൾ, ഇയർബഡുകൾ എന്നിവയടക്കമുള്ള ഡിവൈസുകൾ പുറത്തിറക്കികൊണ്ട് അവരുടെ പ്രൊഡക്ട് പോർട്ട്ഫോളിയോ വിപുലീകരിച്ചിട്ടുണ്ട്. ഹുവാവേ, ഷവോമി, സാംസങ്, വൺപ്ലസ്, മോട്ടറോള തുടങ്ങിയ കമ്പനികൾ തങ്ങളുടെ സ്മാർട്ട് ടിവി സീരീസ് ഇന്ത്യയിൽ ഇതിനകം തന്നെ ആരംഭിച്ചു.

സ്മാർട്ട് ടിവി പുറത്തിറക്കുന്ന സ്മാർട്ട്ഫോൺ കമ്പനികളുടെ പട്ടികയിലേക്ക് ഇപ്പോൾ കയറാനൊരുങ്ങുന്ന രണ്ട് കമ്പനികൾ റിയൽ‌മി, ഓപ്പോ എന്നിവയാണ്. മൊബൈൽ വേൾഡ് കോൺഗ്രസിൽ വച്ച് റിയൽമി തങ്ങളുടെ ആദ്യത്തെ സ്മാർട്ട് ടിവി പുറത്തിറക്കേണ്ടതായിരുന്നു. കോൺഗ്രസ് റദ്ദാക്കിയതോടെ ലോഞ്ചും ക്യാൻസൽ ചെയ്തു. റിയൽ‌മി എക്സ് 50 പ്രോ 5 ജി ലോഞ്ച് ചെയ്യാൻ ഉദ്ദേശിക്കുന്നതുപോലെ ക്ലോസ് ഇവന്റിൽ സ്മാർട്ട് ടിവി ലൈനപ്പ് അവതരിപ്പിക്കുമെന്ന് കമ്പനി അറിയിച്ചിട്ടുണ്ട്.