ലോക്ക്ഡൌണിനിടെ ഡ്രോൺ വഴി പാൻമസാല വിൽപ്പന; രണ്ട് പേർ അറസ്റ്റിൽ

മാറ്റാൻ പറ്റാത്ത ശീലമായി പാൻമസാല ഉപയോഗം മാറിയ ആളുകളാണ് ഇന്ത്യയിലെ വിലയൊരു വിഭാഗം. അത്തരക്കാരെ ഈ ലോക്ക്ഡൌൺ ആകെ വലച്ചിരിക്കുന്നു. മദ്യപാനികൾക്കും ലോക്ക്ഡൌൺ വലിയ ബുദ്ധിമുട്ട് ഉണ്ടാക്കുന്നുണ്ട്. മദ്യപാനികൾ മദ്യം കിട്ടാതെ ആത്മഹത്യ ചെയ്ത വാർത്തകൾ നമ്മൾ കഴിഞ്ഞ ദിവസങ്ങളിൽ കണ്ടതാണ്.

കഴിഞ്ഞ ദിവസം പൊലീസ് ഒരു പാൻമസാല വിൽപ്പനക്കാരെ അറസ്റ്റ് ചെയ്തു. പാൻമസാല വിൽപ്പന കുറ്റകരമല്ലാത്ത ഗുജറാത്തിലാണ് പാൻമസാല വിറ്റത്തിന് ഒരാളെ അറസ്റ്റ് ചെയ്തത്. ലോക്ക്ഡൌൺ കാലത്ത് കട തുടക്കാൻ പാടില്ലാത്തതിനാൽ ആളുകൾ പാൻ മസാല കിട്ടാതെ വലഞ്ഞിരിക്കുകയായിരുന്നു. അപ്പോഴാണ് ഇവർ ഡ്രോൺ വഴി പാൻ മസാല എത്തിച്ച് നൽകിയത്.

ഗുജറാത്തിലെ മോർബി പ്രദേശത്ത് നിന്ന് വീടുകളിൽ പാൻ മസാല എത്തിക്കാൻ ഡ്രോൺ ഉപയോഗിച്ചയാളുകളാണ് അറസ്റ്റിലായത്. പൊലീസ് നേരിട്ട് പിടികൂടിയതല്ല ഇയാളെ. മറിച്ച് പാൻമസാല ഡ്രോൺ വഴി എത്തിച്ച് നൽകുന്ന വീഡിയോ ടിക്ടോക്കിൽ അപ്ലോഡ് ചെയ്തതിൽ നിന്നാണ് പൊലീസ് ഇയാളെ പിടികൂടിയത്. ഡ്രോൺ പാൻമസാല വിതരണം ചെയ്യുന്നതിന്റെ വീഡിയോ എടുത്ത് ഒരാൾ ടിക്ടോക്കിൽ പോസ്റ്റ് ചെയ്ത് പൊലീസിന്റെ ശ്രദ്ധ ക്ഷണിച്ചതോടെയാണ് ഡ്രോൺ വഴി പാൻമസാല വിറ്റ വിരുതൻ അറസ്റ്റിലായത്.

ഡ്രോൺ വഴി ആളുകളുടെ വീടുകളിൽ പാൻ മസാല എത്തിച്ചതിന് രണ്ട് പേരെ അറസ്റ്റ് ചെയ്തതായി ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു. മദ്യവും സിഗരറ്റും കരിഞ്ചന്തയിൽ വിറ്റ് ആളുകൾ ഈ അവസരത്തിൽ പണം സമ്പാദിക്കാൻ ശ്രമിക്കുകയാണെന്നും റിപ്പോർട്ടിൽ പറയുന്നു. ഡ്രോൺ പോലുള്ള നൂതന സാങ്കേതിക വിദ്യ ഉപയോഗിച്ച് പാൻമസാല വിൽപ്പന നടത്തുന്നത് ഏറെ അതിശയിപ്പിക്കുന്ന വാർത്തയാണെന്നാണ് പല സോഷ്യൽമീഡിയ ഉപയോക്താക്കളുടെയും പ്രതികരണം.

ഗുജറാത്തിൽ ആളുകൾ ഡ്രോൺ വഴി പാൻമസാല വിൽക്കുമ്പോൾ കേരളത്തിലെ ഡ്രോൺ ഓപ്പറേറ്റർമാർ പൊലീസിനെ സഹായിക്കാനാണ് തങ്ങളുടെ ഡ്രോൺ ഉപയോഗിക്കുന്ന്. ലോക്ക്ഡൌൺ ലംഘിച്ച് പുറത്തിറങ്ങി കൂട്ടം കൂടിയിരിക്കുന്ന ആളുകളെ കണ്ടെത്തനാണ് കേരളാ പൊലീസ് ഡ്രോണുകൾ ഉപയോഗിക്കുന്നത്. കേരളപൊലീസിന്റെ ഡ്രോൺ ക്യാമറയിൽ അകപ്പെട്ട ആളുകളുടെ രസകരമായ വീഡിയോകൾ പൊലീസ് തന്നെ പുറത്ത് വിട്ടിരുന്നു.

പല ആളുകളും ഡ്രോൺ കണ്ടതോടെ ഉടുത്തിരുന്ന മുണ്ട് അഴിച്ച് തലയിൽ ഇട്ട് ഓടുന്ന വീഡിയോ അടക്കം സോഷ്യൽ മീഡിയയിൽ വൈറലായിരിക്കുകയാണ്. പൊലീസിനൊപ്പം ചേർന്ന് പ്രവർത്തിക്കാൻ ഡ്രോൺ ഓപ്പറേറ്റർമാർ എത്തിയത് ഏറെ പ്രശംസിക്കപ്പെട്ട വാർത്തയാണ്. കൊറോണ പ്രതിരോധത്തിൽ ലോകത്തിന് തന്നെ മാതൃകയാകുന്ന പ്രവർത്തനമാണ് കേരളത്തിൽ നടക്കുന്നത്.