Jio Data Plans: ജിയോ 4 ജി ഡാറ്റ വൗച്ചറുകൾ ഇപ്പോൾ പ്രീപെയ്ഡ് പ്ലാനിന്റെ വാലിഡിറ്റിയോടെ

പ്രീപെയ്ഡ് പ്ലാനുകളിലുടെ ലഭിക്കുന്ന പ്രതിദിന ഡാറ്റ പരിധി ഉപയോഗിച്ച് തീർക്കുന്ന വരിക്കാർക്ക് കൂടുതൽ ഡാറ്റ ലഭ്യമാക്കുക എന്നതാണ് ജിയോ ഡാറ്റ വൌച്ചറുകളുടെ ലക്ഷ്യം. നിലവിൽ ജിയോയ്ക്ക് നാല് 4 ജി ഡാറ്റ വൌച്ചറുകളുണ്ട്. അവ 11 രൂപ, 21 രൂപ, 51 രൂപ, 101 എന്നീ നിരക്കുകളിലുള്ളവയാണ്. ഈ ആഡ്-ഓൺ പായ്ക്കുകൾക്ക് സാധാരണ 28 ദിവസമോ അതിൽ കുറവോ വാലിഡിറ്റിയാണ് ടെലിക്കോം കമ്പനികൾ നൽകാറുള്ളത്. എന്നാൽ റിലയൻസ് ജിയോ ഈ പതിവ് തെറ്റിക്കുകയാണ്.

ഉപയോക്താവിന്റെ നിലവിലുള്ള പ്രീപെയ്ഡ് പ്ലാനിന് സമാനമായ വാലിഡിറ്റിയാണ് ഇപ്പോൾ റിലയൻസ് ജിയോയുടെ 4 ജി ഡാറ്റ വൗച്ചറുകൾ നൽകുന്നത്. മുകളിൽ സൂചിപ്പിച്ച നാല് വൗച്ചറുകൾക്കൊപ്പം ജിയോയ്ക്ക് ഒരു സ്റ്റാൻ‌ഡലോൺ ഡാറ്റ വൗച്ചറുണ്ട്. ഇത് 51 ദിവസത്തെ വാലിഡിറ്റി നൽകുന്ന വൌച്ചറാണ്. 251 രൂപയാണ് ഈ ഡാറ്റ വൌച്ചറിനായി ഉപയോക്താവ് നൽകേണ്ടി വരിക.

റിലയൻസ് ജിയോ 4 ജി ഡാറ്റ വൗച്ചറുകൾ

റിലയൻസ് ജിയോയുടെ ഡാറ്റ വൌച്ചറുകളിൽ ആദ്യത്തേത് 11 രൂപയുടെ വൌച്ചറാണ്. 400 എംബി 4ജി ഡാറ്റ നൽകുന്നൊരു പ്ലാനാണ് ഇത്. രണ്ടാമത്തെ വൌച്ചർ 21 രൂപയുടേതാണ്. 1 ജിബി ഡാറ്റയാണ് ഈ റീചാർജിലൂടെ ഉപയോക്താവിന് ലഭിക്കുക. മൂന്നാമത്തെ പ്ലാൻ 51 രൂപയുടേതാണ്. 3ജിബി ഡാറ്റ നൽകുന്ന വൌച്ചറാണ് ഇത്. അവസാനത്തെ വൌച്ചർ 101 രൂപയ്ക്ക് 6 ജിബി ഡാറ്റ നൽകുന്ന വൌച്ചറാണ്.

ഡാറ്റ വൌച്ചറുകളുടെ വാലിഡിറ്റി പരിശോധിച്ചാൽ ഉപയോക്താവിന്റെ നിലവിലെ കോംബോ പ്രീപെയ്ഡ് പ്ലാൻ അവസാനിക്കും വരെ ഈ വൗച്ചറുകൾക്ക് വാലിഡിറ്റി ഉണ്ട്. ഉപയോക്താവ് 84 ദിവസത്തേക്ക് 1.5 ജിബി ഡാറ്റ ലഭിക്കുന്ന 555 രൂപ റീചാർജ് ചെയ്തിരിക്കുകയാണെങ്കിൽ അതിനൊപ്പം 101 രൂപയുടെ 4 ജി ഡാറ്റാ വൗച്ചർ കൂടി റീചാർജ് ചെയ്താൽ ജിയോ 6 ജിബി അധിക ഡാറ്റ 84 ദിവസത്തേക്കായി നൽകും. ഇത്തരം വാലിഡിറ്റി 11 രൂപ, 21 രൂപ, 51 രൂപ, 101 രൂപ വൗച്ചറുകൾക്ക് മാത്രമേ ബാധകമുള്ളു.

ജിയോ 251 രൂപയുടെ 4 ജി ഡാറ്റ വൗച്ചർ

മുകളിൽ സൂചിപ്പിച്ച നാല് 4 ജി ഡാറ്റാ വൗച്ചറുകൾക്കൊപ്പം റിലയൻസ് ജിയോയിൽ 251 രൂപയുടെ മറ്റൊരു വൗച്ചറും നൽകുന്നുണ്ട്. ഇത് 51 ദിവസത്തെ വാലിഡിറ്റി മാത്രമുള്ള വൌച്ചറാണ്. ഇതിലൂടെ പ്രതിദിനം 2 ജിബി ഡാറ്റയാണ് ഉപയോക്താവിന് ലഭിക്കുക. മറ്റൊരു സ്വകാര്യ ടെലികോം ഓപ്പറേറ്ററും ഇത്തരം ഡാറ്റാ വൗച്ചർ നൽകുന്നില്ല. 97 രൂപ, 198 രൂപ, 318 രൂപ എന്നിങ്ങനെയുള്ള ഡാറ്റാ-ഓൺലി പ്ലാനുകളാണ് ബി‌എസ്‌എൻ‌എല്ലിനുള്ളത്. ഇവ പ്രതിദിനം 1 ജിബിയിൽ തുടങ്ങി 5ജിബി വരെ ഡാറ്റ വാഗ്ദാനം ചെയ്യുന്നു.

റിലയൻസ് ജിയോയിൽ നിന്നുള്ള 11 രൂപ, 21 രൂപ, 51 രൂപ, 101 എന്നീ 4ജി ഡാറ്റാ വൗച്ചറുകൾ ഏതെങ്കിലും അൺലിമിറ്റഡ് കോംബോ പ്ലാനുകൾക്കൊപ്പം മാത്രമേ ഉപയോഗിക്കാനാകൂ, 251 രൂപയുടെ 4 ജി ഡാറ്റാ വൗച്ചർ ഒരു സ്റ്റാൻഡലോൺ പ്ലാനായി ഉപയോഗിക്കാൻ കഴിയും. വോയ്‌സ്, എസ്എംഎസ് സേവനങ്ങൾ ആവശ്യമില്ലാത്ത റിലൻസ് ജിയോ ഉപയോക്താക്കൾക്ക് ഈ പ്ലാൻ ഉപയോഗപ്രദമാകും.

എയർടെൽ ഡാറ്റ വൌച്ചറുകൾ

ഭാരതി എയർടെൽ 48 രൂപ, 98 രൂപ എന്നിങ്ങനെ രണ്ട് 4 ജി ഡാറ്റ വൗച്ചറുകളും അവയിലൂടെ യഥാക്രമം 3 ജിബി, 6 ജിബി ഡാറ്റാ ബെനിഫിറ്റും നൽകുന്നു. ഈ പ്ലാനുകൾക്ക് ഒരു നിശ്ചിത വാലിഡിറ്റി ഉണ്ട്. അത് 28 ദിവസമാണ്. ഈ ഡാറ്റ വൌച്ചറുകൾക്ക് അൺലിമിറ്റഡ് കോംബോ പ്ലാനുമായി യാതൊരു ബന്ധവും ഇല്ല. 28 ദിവസത്തിനുള്ളിൽ 6 ജിബി ഡാറ്റ ആനുകൂല്യം ഉപയോക്താവ് ഉപയോഗിക്കുന്നില്ലെങ്കിൽ അത് നഷ്ടമാകും.