ജനുവരിയിൽ നേട്ടം കൊയ്ത് ജിയോ; 65 ലക്ഷം പുതിയ വരിക്കാരെ നേടി

രാജ്യത്തെ പ്രമുഖ ടെലിക്കോം ഓപ്പറേറ്റർമാരായ എയർടെല്ലിന്റെയും വോഡഫോൺ ഐഡിയയുടെയും കണക്കുകൾ പരിശോധിച്ചാൽ, എയർടെൽ 0.85 ദശലക്ഷം ഉപയോക്താക്കളെ പുതുതായി ചേർത്തു. വോഡഫോൺ ഐഡിയയ്ക്ക് 3.62 ദശലക്ഷം ഉപഭോക്താക്കളെ നഷ്ടപ്പെട്ടു. ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) പുറത്തുവിട്ട ഏറ്റവും പുതിയ ഡാറ്റ പ്രകാരം റിലയൻസ് ജിയോയുടെ ജനുവരിയിലെ ഉപയോക്താക്കളുടെ എണ്ണം 376.67 ദശലക്ഷം ആണ്. ഭാരതി എയർടെൽ, വോഡഫോൺ ഐഡിയ എന്നിവയ്ക്ക് യഥാക്രമം 328.15 ദശലക്ഷവും 328.98 ദശലക്ഷവും വരിക്കാരാണ് ഉള്ളത്.

ജിയോയ്ക്ക് നാലാം സാമ്പത്തിക പാദത്തിൽ 388 ദശലക്ഷം വരിക്കാർ

ഇന്ത്യയിലെ ഏറ്റവും വലിയ ടെലികോം ഓപ്പറേറ്ററായ റിലയൻസ് ജിയോയ്ക്ക് ചുരുങ്ങിയ കാലയളവിൽ ധാരാളം വരിക്കാരെ നേടാനായിട്ടുണ്ട്. നാലാം സാമ്പത്തിക പാദത്തിലെത്തുമ്പോൾ 388 ദശലക്ഷം വരിക്കാരാണ് ജിയോക്ക് ഉള്ളത്. ഭാരതി എയർടെല്ലും വോഡഫോൺ ഐഡിയയും ഇതുവരെ നാലാം സാമ്പത്തിക പാദത്തിലെ കണക്കുകൾ വെളിപ്പെടുത്തിയിട്ടില്ല. മൂന്നാം പാദത്തിൽ ഭാരതി എയർടെല്ലിനും വോഡഫോൺ ഐഡിയയ്ക്കും യഥാക്രമം 283.04 ദശലക്ഷവും 304 ദശലക്ഷവും വരിക്കാരാണ് ഉള്ളത്.

ആക്ടീവ് ഉപയോക്താക്കൾ കൂടുതൽ എയർടെല്ലിന്

ടെലികോം ശൃംഖലയിലെ ആക്ടീവ് വരിക്കാരുടെ എണ്ണം നിർണ്ണയിക്കുന്നതിൽ നിർണായക ഘടകങ്ങളിലൊന്നായ വിസിറ്റർ ലൊക്കേഷൻ രജിസ്റ്റർ (വിഎൽആർ) പ്രകാരം ഭാരതി എയർടെലിന് 95.7 ശതമാനം സജീവ ഉപയോക്താക്കളുണ്ടെന്നും വോഡഫോൺ ഐഡിയ, റിലയൻസ് ജിയോ എന്നിവയ്ക്ക് 90.36 ശതമാനവും 82.26 ശതമാനം സജീവ ഉപയോക്താക്കളുമുണ്ടെന്നും ട്രായ് വെളിപ്പെടുത്തി. ജിയോയുടെ ആക്ടീവ് യൂസേഴ്സിന്റെ എണ്ണം കുറവായി തന്നെ തുടരുന്നുവെന്നത് ശ്രദ്ധേയമാണ്.

റിലയൻസ് ജിയോയുടെ വിപണി വിഹിതം 32.56 ശതമാനം ഉയർന്നു

ട്രായ് പുറത്തുവിട്ട ടെൽകോ സബ്സ്ക്രൈബർ ഡാറ്റ പ്രകാരം റിലയൻസ് ജിയോയുടെ വിപണി വിഹിതം 32.14 ശതമാനത്തിൽ നിന്ന് 32.56 ശതമാനമായി ഉയർന്നു. ഭാരതി എയർടെല്ലിന്റെയും വോഡഫോൺ ഐഡിയയുടെയും വിപണി വിഹിതം കഴിഞ്ഞ മാസത്തെ അപേക്ഷിച്ച് കുറഞ്ഞു. ഭാരതി എയർടെല്ലിന്റെ വിപണി വിഹിതം 28.38 ശതമാനമായി കുറഞ്ഞു. കഴിഞ്ഞ മാസം ഇത് 28.43 ശതമാനമായിരുന്നു.

വോഡഫോൺ ഐഡിയയുടെ വിപണി വിഹിതം 28.89 ശതമാനത്തിൽ നിന്ന് 28.45 ശതമാനമായി കുറഞ്ഞു. ഇന്ത്യയിൽ മൊബൈൽ ഉപയോക്താക്കളുടെ എണ്ണം ജനുവരിയിൽ 5 ദശലക്ഷം മുതൽ 1.156 ബില്യൺ വരെയായി ഉയർന്നുവെന്നും ട്രായ് വ്യക്തമാക്കി. ലോക്ക്ഡൗൺ കാലയളവിൽ ഇന്ത്യയിലെ മൊബൈൽ ഉപയോക്താക്കളുടെ എണ്ണം വർദ്ധിക്കാനാണ് സാധ്യത. മാർച്ച് ഏപ്രിൽ മാസങ്ങളിലെ കണക്കുകളിൽ ഇത് വ്യക്തമാകും.