199 രൂപയ്ക്ക് 1ടിബി ഡാറ്റയുമായി ജിയോഫൈബർ

നേരത്തെ പ്രഖ്യാപിച്ച 699 രൂപ മുതലുള്ള ജിയോ ഫൈബർ പ്ലാനിന് പുറമേ മൈഗ്രേറ്റ് ചെയ്യുന്ന ഉപയോക്താക്കളെ ആകർഷിക്കാനായി ചെറിയ പ്ലാനുകളും കമ്പനി അവതരിപ്പിച്ചു. 199 രൂപ, 351 രൂപ പ്ലാനുകളാണ് കമ്പനി കഴിഞ്ഞ ദിവസം അവതരിപ്പിച്ചത്. 199 രൂപ ഒരു ടോപ്പ്-അപ്പ് വൗച്ചറാണ്, ബാധകമായ എസ്ടിവികളുമായി സംയോജിച്ച് മാത്രം ലഭ്യമാകുന്ന പ്ലാനാണ് 351 രൂപയുടെ പ്ലാൻ.

199 രൂപ ടോപ്പ്-അപ്പ് വൗച്ചർ ഏഴ് ദിവസത്തേക്ക് വെറും 100 ജിബി ഡാറ്റയാണ് നൽകിയിരുന്നത് എന്നാലിപ്പോൾ കമ്പനി ഈ പ്ലാനിൽ മാറ്റം വരുത്തി. 199 രൂപ റീചാർജ് ചെയ്താൽ ഇപ്പോൾ റിലയൻസ് ജിയോ 1 ടിബി ഡാറ്റയാണ് നൽകുന്നത്. ഏഴ് ദിവസമാണ് ഇതിന്റെ കാലാവധി. എഫ്യുപി ലിമിറ്റ് കുറവായതിനാൽ 699 രൂപ, 849 രൂപ തുടങ്ങിയ ബേസിക്ക് പ്ലാനുകളിലുള്ള ജിയോ ഫൈബർ ഉപയോക്താക്കൾക്ക് ഈ മാറ്റം വലിയ ആശ്വാസമായിരിക്കും.

എല്ലാ പ്ലാനുകളിലെയും എഫ്‌യുപി പരിധി ജിയോ ഫൈബറിന്റെ ഉപയോക്താക്കൾക്കിടയിൽ ചെറിയ അസ്വാരസ്യം ഉണ്ടാക്കിയിട്ടുണ്ട്. ഭാരതി എയർടെൽ ഹൈദരാബാദ് നഗരത്തിൽ 799 രൂപ ബ്രോഡ്ബാൻഡിനൊപ്പം അൺലിമിറ്റഡ് ഡാറ്റ നൽകുന്നുണ്ട് അതേ സമയം ജിയോ 699 രൂപ ബേസിക്ക് പ്ലാനിൽ 150 ജിബി ഡാറ്റ മാത്രമാണ് വാഗ്ദാനം ചെയ്യുന്നത്. കൂടാതെ 299 രൂപയുടെ അൺലിമിറ്റഡ് ഡാറ്റാ ആഡ്-ഓൺ പായ്ക്കും എയർടെൽ അവതരിപ്പിച്ചിരുന്നു. ഇത് ഉപയോക്താക്കൾക്ക് എല്ലാ മാസവും 3.3 ടിബി ഡാറ്റ നൽകുന്നു. ഈ പ്ലാൻ ബേസ് പ്ലാനിന് മുകളിലുള്ള പ്ലാനുകൾക്കൊപ്പം ആക്ടിവേറ്റ് ചെയ്യാവുന്ന പ്ലാനാണ്. നേരത്തെ 7 ദിവസത്തെ വാലിഡിറ്റിയിൽ 100 ജിബി ഡാറ്റ മാത്രം നൽകിയ ജിയയോടു പ്ലാൻ പരിഷ്കരിച്ച് 1 ടിബി ഡാറ്റ നൽകുന്നതും ഈ പശ്ചാത്തലത്തിലാണ്.

199 രൂപ വൗച്ചർ ഒരു സ്റ്റാൻഡ് എലേൺ പ്ലാനല്ല

199 രൂപ ടോപ്പ്-അപ്പ് വൗച്ചർ ഒരു സ്റ്റാൻ‌ഡ് എലോൺ പ്ലാനല്ല. ഇതൊരു ടോപ്പ് അപ്പ് വൌച്ചറാണ്. അതായത് ജിയോയുടെ 699 രൂപ മുതൽ തുടങ്ങുന്ന പ്ലാനുകളുടെ കൂടെ ചേർക്കാവുന്ന പ്ലാനാണ് ഇത്. ഉദാഹരണത്തിന് 699 രൂപ പ്ലാനിലൂടെ ലഭിക്കുന്ന 150 ജിബി ലിമിറ്റ് കഴിഞ്ഞാൽ നിങ്ങൾക്ക് ഡാറ്റ ആവശ്യമാണെങ്കിൽ 199 രൂപ വൌച്ചർ റീച്ചാർജ് ചെയ്യാം. ഇത് 7 ദിവസത്തേക്ക് 1 ടിബി ഡാറ്റ കൂടി നൽകും. ടോപ്പ് അപ്പ് റിച്ചാർജിന് 199 രൂപയാണ് വിലയെങ്കിലും അധിക ജിഎസ്ടിയും ഉണ്ടാകാൻ സാധ്യതയുണ്ട്.

ഉപയോക്താവിന്റെ ബേസ് പ്ലാൻ അവസാനിക്കുന്നതോടെ 199 രൂപ പ്ലാനിന്റെ കാലാവധിയും അവസാനിക്കും എന്ന് പ്രത്യേകം ശ്രദ്ധിക്കേണ്ടതുണ്ട്. 199 രൂപ പ്ലാൻ 7 ദിവസത്തെ കാലാവധിയാണ് നൽകുന്നത്. ഈ 7 ദിവസം 1 ടിബി ഡാറ്റ ലഭ്യമാക്കും. എന്നാൽ ഉപയോക്താവിന്റെ ബേസ് പ്ലാൻ ഇതിനിടയിൽ അവസാനിച്ചാൽ ഈ പ്ലാനും അതോടെ അവസാനിക്കും. ഉദാഹരണത്തിന് ഉപയോക്താവ് ഡിസംബർ 25 ന് 199 രൂപ റിച്ചാർജ് ചെയ്തുവെന്നിരിക്കട്ടെ, അദ്ദേഹത്തിന്റെ ബേസ് പ്ലാൻ ഡിസംബർ 30ന് അവസാനിച്ചാൽ 199 രൂപ പ്ലാനും അസാധുവായി പോകും.