Hashtag: ഹാഷ്ടാഗുകൾ ഉണ്ടായതെങ്ങനെ

തുടക്കം റോമിൽ നിന്ന്

പണ്ട് റോമിലെ ആളുകൾ തൂക്കത്തിന്‍റെ അളവായി കണക്കാക്കിയ ലിബ്രാ പൗണ്ടോ എന്ന വാക്കിൽ നിന്നാണ് ഹാഷ് ടാഗുകളുടെ ചരിത്രം ആരംഭിക്കുന്നത്. ലിബ്രാ പൗണ്ടോ എന്ന വാക്കിനെ കുറിക്കാനായി lb എന്ന രണ്ടക്ഷരങ്ങളാണ് അവർ ഉപയോഗിച്ചിരുന്നത്. ഇംഗ്ലീഷുകാർ ഈ ചുരുക്കെഴുത്ത് ഉപയോഗിക്കാൻ തുടങ്ങിയതോടെ lb എന്നതിന് മുകളിൽ ഒരു വര കൂടി ഉപയോഗിച്ചു തുടങ്ങി. ഇതിൽ നിന്നാണ് ഹാഷ്ടാഗിന്‍റെ രൂപം ഉണ്ടായത്.

1960കളിൽ ടെലിഫോൺ സാങ്കേതിക വിദ്യയിൽ

ഹാഷ് ടാഗിന്‍റെ സാങ്കേതിക രംഗത്തേക്കുള്ള കടന്നുവരവ് 1960ന്‍റെ തുടക്കത്തിലാണ്. ടെലിഫോൺ ഓപ്പറേറ്റിങ് സിസ്റ്റത്തിലാണ് ഹാഷ്ടാഗ് സാങ്കേതികവിദ്യാ തലത്തിൽ ആദ്യം ഉപയോഗിച്ചത്. ബെൽ എഞ്ചിനീയർമാരാണ് ഇത് അവതരിപ്പിച്ചത്. ഒക്ടോത്രോപ്പ് എന്നാണ് അന്ന് ഹാഷ്ടാഗിനെ എഞ്ചിനീയർമാർ വിളിച്ചിരുന്നത്. ഇന്ന് ഉപയോഗിക്കുന്ന ഹാഷ് ടാഗിലേക്കുള്ള സുപ്രധാനമായൊരു ചുവടുവെപ്പായിരുന്നു അത്.

കൂടുതൽ വായിക്കുക: 1938 മുതൽ 2011 വരെയുള്ള മൊബൈൽ ഫോണുകളുടെ പരിണാമ ചരിത്രം; ചിത്രങ്ങൾ സഹിതം

പ്രോഗ്രാം കോഡിങ്ങിൽ

1980കളോടെ പ്രോഗ്രാമർമാർ കോഡിങ്ങിനായി ഹാഷ് ടാഗ് ഉപയോഗിച്ച് തുടങ്ങി. കമ്പ്യൂട്ടർ ലാഗ്വേജിന്‍റെ ഭാഗമായി ഹാഷ് ടാഗ് മാറിയതും അന്ന് തൊട്ടാണ്. ബെൽ എഞ്ചിനീയകമാർ ടെലിഫോണിൽ ഉപയോഗിച്ച് കണ്ടതിൽ നിന്നാണ് കോഡിങ്ങിലേക്ക് ഈ ചിന്ഹം പ്രോഗ്രാമർമാർ കൊണ്ടുവന്നത്.

ഹാഷ് ടാഗ് ചാറ്റ് റൂമുകളിലേക്ക്

എഞ്ചിനീയർമാരും പ്രോഗ്രമാർമാരും ഉപയോഗിക്കാൻ തുടങ്ങിയിട്ടും ഹാഷ് ടാഗ് കൊണ്ട് സാധാരണക്കാർക്ക് ഉപയോഗം ഒന്നും ഉണ്ടായിരുന്നില്ല. ടെലിഫോണുകളിലെ ആരും ഉപയോഗിക്കാത്ത ബട്ടനായി തന്നെ അത് തുടർന്നു. 21 നൂറ്റാണ്ടിന്‍റെ ആരംഭം ഹാഷ് ടാഗുകളുടെ ചരിത്രത്തിലും സുപ്രധാനമായ കാലമായിരുന്നു. ചാറ്റ് റൂമുകൾ പ്രചാരത്തിൽ വന്നതോടുകൂടി ടോപ്പിക്കുകൾ കാറ്റഗറി തിരിക്കാനായി ഹാഷ് ടാഗുകൾ ഉപയോഗിച്ച് തുടങ്ങി. അത് സുപ്രധാനമായൊരു വഴിത്തിരിവായി മാറുകയും ചെയ്തു.

ക്രിസ് മെസിന

ഹാഷ് ടാഗുകളുട സോഷ്യൽ മീഡിയയിലേക്കുള്ള കടന്നു വരവിന് പ്രധാന കാരണക്കാരൻ ക്രിസ് മെസിനയാണ്. ഹാഷ് ടാഗ് കണ്ടുപിടച്ച ആളെന്ന നിലയിൽ ഇന്ന് അറിയപ്പെടുന്ന ക്രിസ് ഒരു പ്രൊഡക്ട് ഡിസൈനറാണ്. ചാറ്റ് റൂമിൽ നിന്ന് തന്നെയാണ് ക്രിസിന് ഹാഷ് ടാഗെന്ന ആശയം ലഭിച്ചത്. ക്രിസിന് ലഭിച്ച ആശയം ട്വിറ്ററിനെ അറിയിച്ചെങ്കിലും അവരത് തള്ളിക്കളഞ്ഞു.

കൂടുതൽ വായിക്കുക: ഫേസ്ബുക്കിൻറെ പുതിയ ലോഗോ അർത്ഥമാക്കുന്നതെന്ത്? അറിയേണ്ടതെല്ലാം

ഹാഷ് ടാഗ് ട്വിറ്ററിലേക്ക്

2007 ഒക്ടോബറിൽ ക്രിസിന്‍റെ സുഹൃത്ത് സാന്‍റിയാഗോയിലുണ്ടായ കാട്ടുതീയെ പറ്റി ഒരു ട്വീറ്റ് പോസ്റ്റ് ചെയ്തത് മറ്റൊരു വഴിത്തിരിവായിരുന്നു. ട്വീറ്റ് കണ്ട ക്രിസ് ട്വീറ്റിനൊപ്പം ഹാഷ്ടാഗ് ചേർത്ത് #sandiegofire എന്ന് എഴുതാൻ ആവശ്യപ്പെട്ടു. അതോടുകൂടി ഹാഷ് ടാഗ് സോഷ്യൽ മീഡിയയിലെ ഒഴിച്ചുകൂടാനാവാത്ത കാര്യമായി മാറി. 2009 ജൂലെയിൽ ട്വിറ്റർ ഔദ്യോഗികമായി തന്നെ ഹാഷ് ടാഗ് സംവിധാനം പേജിൽ ഉൾപ്പെടുത്തി.

സോഷ്യൽ മീഡിയയിൽ സജീവമായി

ഹാഷ് ടാഗിന്‍റെ സ്വാധീനം സാന്‍റിയാഗോ കാട്ടിലുണ്ടായ തീ പോലെ പടർന്നു. 2012 സെപ്റ്റംബറിൽ ഗൂഗിളും ഹാഷ് ടാഗ് സംവിധാനം ഉൾപ്പെടുത്തി. അധികം വൈകാതെ 2013 ജൂണിൽ ഫേസ്ബുക്കും ഹാഷ് ടാഗ് തങ്ങളുടെ പ്ലാറ്റ്ഫോമിൽ ഉൾപ്പെടുത്തി. പിന്നീടിങ്ങോട് ഇന്‍റർനെറ്റിന്‍റെ അനന്ത സാധ്യതകളിൽ ഒഴിച്ചു കൂടാനാവാത്ത ഒന്നായി ഹാഷ് ടാഗുകൾ മാറി. മീ ടു അടക്കം ലോകം പ്രതികരിച്ചതും പരിതപിച്ചതും പ്രതിഷേധിച്ചതുമായി എത്രയോ ഹാഷ് ടാഗുകൾ സോഷ്യൽ മീഡിയയിൽ വന്നു കഴിഞ്ഞു. ഹാഷ് ടാഗുകളുടെ ചരിത്രം അവസാനിക്കുന്നില്ല. അത് തുടർന്നുകൊണ്ടേയിരിക്കുന്നു.