സൈനികരെ അദൃശ്യരാക്കാൻ പുതിയ വസ്ത്രം കണ്ടുപിടിച്ച് ഇസ്രയേൽ കമ്പനി

സൈനികരെ ശത്രുക്കൾ കണ്ടെത്താതിയിരിക്കാനായി ലോഹങ്ങൾ, മൈക്രോ ഫൈബറുകൾ, പോളിമറുകൾ എന്നിവ സംയോജിപ്പിക്കുന്ന തെർമൽ വിഷ്വൽ കൺസീൽമെന്റ് വസ്തുക്കളാണ് കിറ്റ് 300 എന്ന് പേരിട്ടിരിക്കുന്ന പുതിയ വസ്ത്രം നിർമ്മാക്കാൻ ഉപയോഗിച്ചിരിക്കുന്നത്. ഭാരം കുറഞ്ഞ സ്ട്രെച്ചറായി ഡബിൾ അപ്പ് ചെയ്യാൻ കഴിയുന്ന ഈ മെറ്റീരിയൽ ധരിച്ചാൽ മനുഷ്യന്റെ കണ്ണിനോ തെർമൽ ഇമേജിംഗ് ഉപകരണങ്ങൾക്കോ ധരിച്ചയാളെ കണ്ടെത്താൻ ബുദ്ധിമുട്ടാണെന്ന് പോളാരിസ് സൊല്യൂഷൻസ് വെബ്‌സൈറ്റിൽ വ്യക്തമാക്കുന്നു.

സൈനികർക്ക് ഈ വസ്ത്രം ധരിക്കുകയുോ വസ്ത്രങ്ങൾ ചേർത്ത് ഒരു കൂടാരം ഉണ്ടാക്കുകയോ ചെയ്യാം. ഇത് മരുഭൂമിയിലോ പാറപ്പുറത്തോ ഉള്ള പ്രകൃതിക്ക് അനുസരിച്ച് അതുപോലെയായി മാറുന്നു. ദൂരെ നിന്ന് ബൈനോക്കുലറിലൂടെ സൈനികരെ നോക്കുന്ന ആളുകൾക്ക് അവരെ കാണാൻ കഴിയില്ല എന്ന് MoD യുടെ ഗവേഷണ വികസന യൂണിറ്റിന്റെ ഡിറ്റക്ടറുകളുടെയും ഇമേജിംഗ് ടെക്‌നോളജി ബ്രാഞ്ചിന്റെയും തലവനുമായ ഗാൽ ഹരാരി പറഞ്ഞതായി ജാനിസ്.കോം എന്ന വെബ്സൈറ്റ് റിപ്പോർട്ട് ചെയ്തു.

സൈനികർക്ക് അദൃശ്യരാവാനുള്ള ഈ ഷീറ്റിന് 500 ഗ്രാം ഭാരം വരും. കോം‌പാക്റ്റ് ബണ്ടിലിലേക്ക് മടക്കി വയ്ക്കാൻ സാധിക്കുന്ന ഷീറ്റാണ് ഇതെന്നാണ് റിപ്പോർട്ടുകൾ. ഇസ്രായേൽ ഡിഫൻസ് ഫോഴ്‌സ് (ഐ.ഡി.എഫ്) പതിയ ഷീറ്റ് പരീക്ഷിച്ചു. പരീക്ഷണത്തിന് ശേഷം ഇത് സൈന്യത്തിന്റെ ഭാഗമാക്കി ചേർത്തിട്ടുണ്ടെന്നാണ് സൂചനകൾ. പോളാരിസ് സൊല്യൂഷൻസ് സഹസ്ഥാപകൻ അസഫ് പിക്കിയോട്ടോയുടെ വ്യക്തിപരമായ അനുഭവമാണ് ഇത്തരമൊരു സാങ്കേതികവിദ്യ വികസിപ്പിക്കാനുള്ള ആശയം വന്നത് എന്നാണ് റിപ്പോർട്ട്.

2006ലെ ലെബനൻ യുദ്ധസമയത്ത് സ്പെഷ്യൽ ഐഡിഎഫ് യൂണിറ്റിൽ സേവനമനുഷ്ഠിക്കുമ്പോൾ ശത്രുക്കളുടെ തെർമൽ ഇമേജിംഗ് ഡിവൈസുകളിൽ നിന്ന് സൈനികർക്ക് ഒളിച്ചിരിക്കാൻ സാധിച്ചിട്ടില്ല. ഇത് വലിയൊരു പോരായ്മയായിരുന്നു. ഇക്കാര്യം ശ്രദ്ധിച്ചത് കൊണ്ടാണ് പിക്കിയോട്ടോ അദൃശ്യമാകാനുള്ള വസ്ത്രത്തെ കുറിച്ച് ആലോചിച്ചത് എന്ന് മീഡിയ ലൈൻ റിപ്പോർട്ട് ചെയ്തു. ശത്രുവിനേക്കാൾ നമ്മൾ എപ്പോവും മികച്ചവരായിരിക്കണമെന്നും അതിജീവനത്തിനായുള്ള കാര്യങ്ങളിൽ വലിയ പാളിച്ചകൾ ഉണ്ടാകുന്നുണ്ട് എന്നും പിക്കിയോട്ടോ മാധ്യമങ്ങളോട് പറഞ്ഞു.

കാനഡയിലെയും അമേരിക്കയിലെയും പ്രത്യേക സേന യൂണിറ്റുകളുമായി ചേർന്നുകൊണ്ട് വടക്കേ അമേരിക്കയിലേക്ക് പുതിയ സാങ്കേതികവിദ്യ എത്തിക്കുന്നതിന് പോളാരിസ് സൊല്യൂഷൻസ് പ്രവർത്തിക്കുന്നുണ്ടെന്ന് മീഡിയ ലൈൻ റിപ്പോർട്ടിൽ പറയുന്നു. നമ്മൾ സിനിമകളിൽ മാത്രം കണ്ട അദൃശ്യമാകുന്ന വസ്ത്രം എന്ന ആശയം സൈനികർക്ക് വേണ്ടി വികസിപ്പിക്കുന്നു എന്ന വാർത്ത സാങ്കേതികവിദ്യ എത്തി നിൽക്കുന്ന പുരോഗതിയെ ആണ് ചൂണ്ടികാട്ടുന്നത്.