കഷണ്ടിമാറ്റാൻ ഇലക്ട്രിക്ക് തൊപ്പി, പുതിയ കണ്ടുപിടുത്തവുമായി ശാസ്ത്രജ്ഞർ

 

ശരീരത്തിലെ ദൈനംദിന പ്രവർത്തനങ്ങളിൽ നിന്നും ഊർജ്ജം സംഭരിച്ച് പ്രവർത്തിക്കുന്ന ടെക്നോളജിയാണ് ഇപ്പോൾ വികസിപ്പിച്ചിരിക്കുന്നത്. ശരീരത്തിൽ മൃദുവായ ലോ ഫ്രീക്വൻസി ഇലക്ട്രിക്ക് പൾസുകൾ പ്രവർത്തിപ്പിച്ചാണ് ഈ ഉപകരണം തലയിലെ മുടിയുടെ ഉത്പാദനം വീണ്ടും ഉണ്ടാക്കുന്നത്. ഇത് മുടിവളരാനുള്ള ശാസ്ത്രീയമായ മാർഗ്ഗമായിരിക്കുമെന്ന് അമേരിക്കയിലെ വിസ്കോൻസിൻ- മാഡിസൺ സർവ്വകലാശാലയിലെ പ്രെഫസർ സുഡാങ് വാങ് അഭിപ്രായപ്പെട്ടു.

മൃദുവായ ചർമ്മത്തിൽ രോമകൂപങ്ങൾ വളരാൻ ഈ ഡിവൈസ് കാരണമാവില്ല. പകരം പ്രവർത്തനം നിന്നുപോയ മുടി ഉത്പാദിപ്പിക്കുന്ന ഘടനകളെ പ്രവർത്തിപ്പിക്കാനാണ് ഈ സാങ്കേതിക വിദ്യ സഹായിക്കുന്നത്. ഇതിലൂടെ കൊഴിഞ്ഞുപോയ മുടിയുടെ ഭാഗങ്ങളിലെ മുടി ഉത്പാദിപ്പിക്കുന്ന ഘടനകളെ വീണ്ടും പ്രവർത്തിപ്പിച്ച് അവിടങ്ങളിൽ പിന്നെയും മുടി വളർച്ച ഉണ്ടാക്കുന്നു. മുടികൊഴിച്ചിലിൻറെ ആരംഭഘട്ടങ്ങളിലായിരിക്കും ഈ ഉപകരണം മുടിവളരാൻ സഹായിക്കുന്നത്.

പൂർണമായും കഷണ്ടിയായി വർഷങ്ങൾ കഴിഞ്ഞാൽ ഈ സാങ്കേതിക വിദ്യയിലൂടെയുള്ള മുടിവളർച്ച സാധ്യമല്ല. നിശ്ചിത കാലത്തേക്ക് മാത്രം പ്രവർത്തന ക്ഷമമല്ലാതെ കിടക്കുന്ന മുടി വളരാനുള്ള സെല്ലുകളെ പ്രവർത്തിപ്പിക്കാനുള്ള ശേഷിമാത്രമേ ഇപ്പോൾ വികസിപ്പിച്ച ഈ സാങ്കേതിക വിദ്യയ്ക്ക് ഉള്ളു. ശാസ്ത്രജ്ഞർ വികസിപ്പിക്കുന്ന ഈ തൊപ്പി പ്രവർത്തിക്കാൻ ബാറ്ററിയുടെ സഹായമോ മറ്റ് ഇലക്ട്രോണിക്ക് ഉപകരണങ്ങളോ ആവശ്യമില്ല.

 

ധരിക്കുന്ന ആളുടെ ശരീരത്തിൻറെ ചലനങ്ങളിൽ നിന്ന് ആവശ്യമായ ഊർജ്ജം നേടിയെടുത്താണ് ഈ ഉപകരണം പ്രവർത്തിക്കുന്നത്. ഇതിനായി ഹാറ്റിൽ ഒരു നാനോ ജനറേറ്റർ എന്ന് വിളിക്കന്ന ചെറിയ ഉപകരണങ്ങൾ ഘടിപ്പിക്കുന്നു. ഇത് ശരീരത്തിൽ നിന്നും എടുക്കുന്ന എനർജി ഉപയോഗിച്ച് തലയിലെ ചർമ്മത്തിൽ ലോ ഫ്രീക്വൻസി പൾസുകൾ ഉണ്ടാക്കുന്നു. ഈ മൃദുവായ പൾസുകൾ തലയിലെ രോമങ്ങളുണ്ടാക്കുന്ന ഘടനകളെ ഉണർത്തുന്നു.

തൊപ്പിയിലൂടെ ഉണ്ടാകുന്ന ഇലക്ട്രിക്ക് തരംഗങ്ങൾ മനുഷ്യ ശരീരത്തിലെ പല ഭാഗങ്ങളെയും സഹായിക്കും. തരംഗങ്ങൾ വളരെ മൃദുവായതിനാൽ ശരീരത്തെ ദോഷകരമായി ബാധിക്കുകയുമില്ല. ഈ ഹാറ്റ് ധരിച്ച് പുറത്തിറങ്ങാൻ യാതൊരുവിധ പ്രശ്നങ്ങളും ഉണ്ടാവില്ല കാരണം സാധാരണ ഇന്ന് യുവാക്കളും മറ്റും ഉപയോഗിക്കാറുള്ള ബേസ്ബോൾ ക്യാപിൻറെയുംമറ്റും അകത്ത് കൊള്ളാൻ പാകത്തിലാണ് ഈ ഉപകരണം നിർമ്മിച്ചിരിക്കുന്നത്. എന്തായാലും പരീക്ഷണങ്ങൾക്കൊടുവിൽ ഈ ഉപകരണം വിപണിയിലെത്തുമ്പോൾ പലർക്കും അതൊരു ആശ്വാസമാകുമെന്ന് ഉറപ്പാണ്.