ഈ പുതിയ ബാറ്ററി ടെക്നോളജിയിലൂടെ സ്മാർട്ട്ഫോണുകളിൽ 5 ദിവസം വരെ ചാർജ്ജ് നിൽക്കും

ലിഥിയം അയേൺ ബാറ്ററി സാങ്കേതിക വിദ്യയുടെ ബാറ്ററി ക്ഷമത പോരാ എന്ന് തോന്നുന്ന വിധം നമ്മുടെ സാങ്കേതിക വിദ്യ വികസിക്കുകയാണ്.ഇപ്പോഴിതാ ലിഥിയം സൾഫർ ബാറ്ററി സാങ്കേതിക വിദ്യയിലൂടെ ഈ പ്രശ്നത്തിന് പരിഹാരം കണ്ടെത്തുകയാണ് ഗവേഷകർ എന്നാണ് റിപ്പോർട്ടുകൾ. സ്മാർട്ട്ഫോണുകളിൽ 5 ദിവസം വരെ തുടർച്ചായായി ബാക്ക് അപ്പ് നൽകുന്ന, ഒരു ഇലക്ട്രി്ക് വാഹനത്തിന് ഒറ്റ ചാർജ്ജിൽ 1000 കിലോമീറ്റർ വരെ സഞ്ചരിക്കാൻ സഹായിക്കുന്ന തരം ബാറ്ററികളാണ് ഗവേഷകർ വികസിപ്പിക്കുന്നതെന്നാണ് റിപ്പോർട്ടുകൾ.

മോനാഷ് സർവകലാശാലയിലെ ഗവേഷകരാണ് ലിഥിയം സൾഫർ ബാറ്ററി വികസിപ്പിച്ചെടുത്തത്. നിലവിലുള്ള ലിഥിയം അയോണിനേക്കാൾ മികച്ച പ്രകടനം കാഴ്ചവയ്ക്കാൻ കഴിവുള്ള അൾട്രാ-ഹൈ കപ്പാസിറ്റി ബാറ്ററിയാണിതെന്ന് ഗവേഷകർ അവകാശപ്പെടുന്നു. അടുത്ത തലമുറയിലെ സാങ്കേതിക വിദ്യയ്ക്ക് കരുത്ത് നൽകുന്നത് ഈ ബാറ്ററികളായിരിക്കുമെന്നാണ് റിപ്പോർട്ടുകൾ വ്യക്തമാക്കുന്നത്.

വൈദ്യുത ചാർജിൽ കുറഞ്ഞ ഇന്റർഫിയറൻസ് ആവശ്യമുള്ള ബാറ്ററിയുടെ പ്രവർത്തനം വിപുലീകരിക്കുന്ന കാഥോഡിന്റെ ഘടന ഗവേഷകർ മെച്ചപ്പെടുത്തി. ലിഥിയം അയൺ ബാറ്ററികൾ കണങ്ങളെ ബന്ധിപ്പിക്കുന്നതിന് ഒരു സംവിധാനം ഉപയോഗിക്കുന്നുണ്ട് ഇതിന് ബദലായിഗവേഷകർ ഒരു പുതിയ സംവിധാനം വികസിപ്പിച്ചെടുത്തിട്ടുണ്ട്. ഈ സംവിധാനം ബാറ്ററിക്ക് മികച്ച സ്ഥിരത കൈവരിക്കുന്നതിനായി ഈ കണങ്ങളെ ബന്ധിപ്പിക്കും.

ലിഥിയം സൾഫർ (ലി-എസ്) ബാറ്ററികളിൽ സൾഫർ കാഥോഡുകളും ലിഥിയം അയൺ ബാറ്ററികളിൽ (എൽഐബി) സിലിക്കൺ ആനോഡുകളും ഉപയോഗിക്കുന്നത് തന്നെ വിലകുറഞ്ഞ രീതിയിൽ ലിഥിയം സംഭരിക്കാനുള്ള മികച്ച കഴിവുള്ള ഇലക്ട്രോഡുകളുടെ ഉദാഹരണമാണെന്നും അതുകൊണ്ട് തന്നെ ലിഥിയം അയേൺ ബാറ്ററികളുടെ പുതിയ ബദലായി ലിഥിയം സൾഫർ ബാറ്ററി മാറുമെന്നും ഗവേഷണ പ്രബന്ധത്തിൽ ശാത്രജ്ഞർ വ്യക്തമാക്കി.

പുതുതായി വികസിപ്പിച്ച ഉയർന്ന ശേഷിയുള്ള ലിഥിയം സൾഫർ ബാറ്ററികൾ കുറഞ്ഞ ഉൽപാദനച്ചെലവും മികച്ച പ്രകടനവും സമൃദ്ധമായ മെറ്റീരിയൽ സപ്ലേയും പാരിസ്ഥിതിക പ്രശ്നങ്ങൾ കുറയ്ക്കുന്നതുമാണ് എന്നാണ് ഗവേഷണ പ്രബന്ധം അവകാശപ്പെടുന്നത്. ലോകത്തിലെ ഏറ്റവും മികച്ച ലിഥിയം സൾഫർ ബാറ്ററിയാണിതെന്നും വലിയോ തോതിൽ ഉപയോഗിക്കേണ്ട മേഖലകൾക്ക് വേണ്ടി വികസിപ്പിച്ചതാണ് ഇതെന്നും ഗവേഷകർ അവകാശപ്പെടുന്നു.

സെല്ലുകളുടെ പ്രോട്ടോടൈപ്പ് ഇതിനകം പ്രദർശിപ്പിക്കുകയും വാണിജ്യവൽക്കരണ പ്രക്രിയ നടക്കുകയും ചെയ്യുന്നു. നിലവിൽ വിപണിയിൽ ലഭ്യമായ ബാറ്ററികളേനാല് തവണ പിന്നിലാക്കാൻ പോന്നതാണ് പുതിയ ബാറ്ററി സംവിധാനം എന്നാണ് ഗവേഷകർ അവകാശപ്പെടുന്നത്. എന്തായാലും അടുത്ത തലമുറയിലെ ഈ ബാറ്ററി ചിലപ്പോൾ ടെക്നോളജി രംഗത്തെ മാറ്റി മറിക്കുമെന്ന് ഉറപ്പാണ്.