വിഐ 399 രൂപയുടെ ഡിജിറ്റൽ എക്സ്ക്ലൂസീവ് പ്ലാൻ അവതരിപ്പിച്ചു

97 രൂപ, 197 രൂപ, 297 രൂപ, 497 രൂപ, 647 രൂപ എന്നീ നിരക്കുകളിലാണ് വിഐ എഫ്‌ആർ‌സി പ്ലാനുകൾ നൽകുന്നത്. പുതിയ 399 റീചാർജ് പ്ലാൻ 56 ദിവസം വാലിഡിറ്റിയും ദിവസവും 1.5 ജിബി ഡാറ്റയും നൽകുന്ന പ്ലാനാണ്. കമ്പനിയുടെ ഓഫ്‌ലൈൻ സ്റ്റോറിലൂടെ പുതിയ വിഐ സിം കാർഡ് വാങ്ങുന്ന ഉപയോക്താക്കൾക്ക് 399 രൂപ റീചാർജ് പ്ലാൻ ലഭിക്കില്ല. പകരം മുകളിൽ കൊടുത്തിരിക്കുന്ന പ്ലാനുകളിൽ ഏതെങ്കിലും തിരഞ്ഞെടുക്കേണ്ടി വരും.

വിഐയുടെ പുതിയ എം‌എൻ‌പി / റെഗുലർ ഉപയോക്താക്കൾക്ക് 399 രൂപ പ്ലാൻ ലഭിക്കും. പുതിയ ഉപഭോക്താക്കളെ നെറ്റ്വർക്കിലേക്ക് ആകർഷിക്കാനും നിലവിലുള്ള ഉപഭോക്താക്കളെ നിലനിർത്തുന്നതിനും വിഐ നടത്തുന്ന പരിശ്രമങ്ങളുടെ ഭാഗമായിട്ടാണ് പുതിയ പ്ലാൻ അവതരിപ്പിച്ചിരിക്കുന്നത്. വിഐയുടെ 399 രൂപ പ്രീപെയ്ഡ് റീചാർജ് പ്ലാൻ നിലവിലുള്ള ഉപയോക്താക്കൾക്ക് ഇതിനകം ലഭ്യമാണ്. ഈ പ്ലാൻ മുകളിൽ സൂചിപ്പിച്ചത് പോലെ 1.5ജിബി ഡാറ്റയും അൺലിമിറ്റഡ് വോയ്‌സ് കോളിങും 100 എസ്എംഎസുകളും 56 ദിവസത്തേക്ക് നൽകുന്നു.

ഇന്ത്യൻ ടെലിക്കോം മേഖലയിൽ വിപണി വിഹിതത്തിന്റെ അടിസ്ഥാനത്തിൽ ഒന്നും രണ്ടും സ്ഥാനത്തുള്ള എയർടെൽ, വിഐ എന്നിവ 97 രൂപ, 197 രൂപ, 297 രൂപ, 497 രൂപ, 647 രൂപ എന്നിങ്ങനെ അഞ്ച് എഫ്‌ആർ‌സികളാണ് നൽകുന്നത്. കമ്പനിയുടെ വെബ്‌സൈറ്റിൽ നിന്ന് പുതിയ വിഐ കണക്ഷൻ ബുക്ക് ചെയ്യുന്ന ഉപയോക്താക്കൾക്ക് 399 രൂപ റീചാർജ് പ്ലാൻ ലഭിക്കും. അതുകൊണ്ടാണ് ഈ പ്ലാനിനെ വിഐ ‘ഡിജിറ്റൽ എക്‌സ്‌ക്ലൂസീവ്' എന്ന് വിളിക്കുന്നത്.

399 രൂപ പ്ലാനിനുപുറമെ ഓൺലൈനിൽ പുതിയ കണക്ഷൻ ബുക്ക് ചെയ്യുന്ന ഉപയോക്താക്കൾക്കായി 297 രൂപ റീചാർജ് പ്ലാനും വിഐ നൽകുന്നുണ്ട്. 297 രൂപ പാക്കിൽ ദിവസവും 1.5 ജിബി ഡാറ്റ, അൺലിമിറ്റഡ് വോയ്‌സ് കോളിംഗ്, 100 എസ്എംഎസ് എന്നിവ 28 ദിവസത്തെ വാലിഡിറ്റിയോടെ നൽകുന്നു. വിഐ ഇപ്പോൾ ഇന്ത്യയിലുടനീളം കൂടുതൽ സ്ഥലങ്ങളിലേക്ക് പുതിയ സിം കാർഡുകൾ എത്തിക്കുന്നുണ്ട്. നേരത്തെ, തെലങ്കാന സംസ്ഥാനത്ത് വിഐ സിം കാർഡ് ഡെലിവറി സേവനം ലഭ്യമായിരുന്നില്ല, എന്നാൽ ഇപ്പോൾ ഇതും ആരംഭിച്ചിട്ടുണ്ട്.

കഴിഞ്ഞ മൂന്ന് വർഷത്തിനിടെ മൊത്തം 3,13,447 ഉപഭോക്താക്കളാണ് വിഐയിൽ താൽപര്യം പ്രകടിപ്പിച്ചതെന്നും വിഐ പറയുന്നു. എന്നാൽ ഇത് ഓൺലൈനിൽ ബുക്ക് ചെയ്ത കണക്ഷനുകളുടെ കൃത്യമായ എണ്ണം വിഐ വെളിപ്പെടുത്തിയിട്ടില്ല. താൽപ്പര്യമുള്ള ഉപയോക്താക്കൾക്ക് പുതിയ കണക്ഷൻ ബുക്ക് ചെയ്യുന്നതിന് വോഡഫോൺ ഐഡിയയുടെ വെബ്‌സൈറ്റിൽ സംവിധാനം ഒരുക്കിയിട്ടുണ്ട്. കണക്ഷൻ ബുക്ക് ചെയ്യുമ്പോൾ എം‌എൻ‌പി ഉപഭോക്താക്കൾ‌ അവരുടെ നിലവിലുള്ള മൊബൈൽ‌ നമ്പർ‌ നൽ‌കണം.