വോഡഫോൺ ഐഡിയ ഉപയോക്താക്കൾക്ക് റീചാർജ് ചെയ്ത തുകയുടെ 6 ശതമാനം തിരികെ ലഭിക്കും

ഓൺലൈൻ റീചാർജ് ചെയ്യാൻ സാധിക്കാത്ത ഉപയോക്താക്കൾക്ക് റീചാർജ് ചെയ്ത് നൽകുന്ന ആളുകൾക്ക് വോഡാഫോൺ ഐഡിയ റീചാർജ് തുകയുടെ ആറ് ശതമാനം കമ്മീഷനായി നൽകും. ‘റീചാർജ്ഫോർഗുഡ്' എന്ന പേരിലാണ് കമ്പനി പുതിയ പ്രോഗ്രാം ആരംഭിച്ചിരിക്കുന്നത്. 2020 ഏപ്രിൽ 14 വരെ രാജ്യം മുഴുവൻ ലോക്ക്ഡൌൺ ആയതിനാൽ, ഓൺലൈൻ റീചാർജ് സൗകര്യമില്ലാത്ത നിരവധി വരിക്കാർ റീചാർജ് ചെയ്യാൻ പ്രയാസമനുഭവിക്കുന്നത് കണക്കിലെടുത്താണ് ഇത്തരമൊരു നടപടിയെന്ന് കമ്പനി അറിയിച്ചു.

വോഡഫോൺ ഐഡിയയുടെ റീചാർജ് ഫോർ ഗുഡ്

ലോക്ക്ഡൌൺ സമയത്ത് വരിക്കാരെ പരസ്പരം ബന്ധിപ്പിക്കുകയെന്ന ലക്ഷ്യവും കൂടി വോഡഫോൺ ഐഡിയയുടെ റീചാർജ് ഫോർ ഗുഡ് പ്രോഗ്രാമിനുണ്ട്. ഉപയോക്താക്കൾക്ക് വോഡഫോൺ ഐഡിയ നൽകുന്ന ക്യാഷ്ബാക്ക് ലഭിക്കണമെങ്കിൽ മൈ വോഡഫോൺ ആപ്പിലോ മൈ ഐഡിയ ആപ്പിലോ തങ്ങളുടെ വോഡാഫോൺ/ ഐഡിയ നമ്പർ ഉപയോഗിച്ച് ലോഗിൻ ചെയ്ത് മറ്റൊരു വോഡഫോൺ ഐഡിയ പ്രീപെയ്ഡ് ഉപഭോക്താവിന് റീചാർജ് ചെയ്ത് കൊടുക്കണം.

മേൽപ്പറഞ്ഞ ആപ്പുകളിലൂടെ മറ്റൊരു ഉപയോക്താവിന് റീചാർജ് ചെയ്തുകഴിഞ്ഞാൽ റീചാർജ് ചെയ്ത വരിക്കാർക്ക് 6% വരെ ക്യാഷ്ബാക്ക് ലഭിക്കും. ഉപയോക്താക്കൾ നേടിയ ക്യാഷ്ബാക്ക് കൂപ്പൺ പണമാക്കി മാറ്റി അക്കൌണ്ടിലേക്ക് തിരികെ ലഭിക്കുകയില്ല. പകരം തങ്ങളുചെ സ്വന്തം നമ്പർ റീചാർജ് ചെയ്യാൻ ഈ ക്യാഷ്ബാക്ക് കൂപ്പണുകൾ ഉപയോഗിക്കാം.

റീചാർജ് ഫോൺ ഗുഡ് ഓഫർ

വോഡാഫോൺ ഐഡിയ ഷഡൌൺ കാലയളവിൽ ഉപയോക്താക്കൾക്കായി നിരവധി ആനുകൂല്യങ്ങൾ നൽകുന്നുണ്ട്. കമ്പനി 2020 ഏപ്രിൽ 14 വരെ റീട്ടെയിൽ സ്റ്റോറുകൾ അടച്ചിട്ടിരിക്കുന്നതിനാൽ ഉപയോക്താക്കൾക്ക് റീചാർജ് ചെയ്യാൻ ബുദ്ധിമുട്ടുകൾ ഉണ്ടാവുന്നുണ്ടെന്ന് വോഡഫോൺ ഐഡിയയുടെ മാർക്കറ്റിംഗ് ഡയറക്ടർ അവ്‌നീഷ് ഖോസ്ല പറഞ്ഞു.

റീചാർജ് ഫോർ ഗുഡ് ഏറ്റെടുക്കുന്നതിലൂടെ റീചാർജ് ചെയ്യാൻ ബുദ്ധിമുട്ട് അനുഭവിക്കുന്നവർക്ക് സഹായമാവാനും അതുവഴി പണം നേടാനും സാധിക്കുമെന്നാണ് കമ്പനി അറിയിക്കുന്നത്. ഏപ്രിൽ 30 വരെ മാത്രമേ ഈ ഓഫർ ലഭിക്കുകയുള്ളു. മൈ വോഡാഫോൺ, മൈ ഐഡിയ ആപ്പുകൾ വഴിയുള്ള റീചാർജുകൾക്ക് മത്രമേ ഈ ഓഫർ ലഭിക്കുകയുള്ളു. തേർഡ് പാർട്ടി ആപ്പുകൾ ഉപയോഗിച്ച് റീചാർജ്ചെയ്താൽ ഈ ഓഫർ ലഭിക്കില്ല.