ഇന്ത്യയിൽ 5ജി നെറ്റ്വർക്ക് ലഭിക്കാൻ ഇനിയും വൈകുമോ? 5ജിയെ കുറിച്ച് അറിയേണ്ടതെല്ലാം

5ജി നെറ്റ്വർക്ക് ആരംഭിക്കുന്നത് വൈകുന്നതിനുള്ള പ്രധാന കാരണം 5ജി സ്പെക്ട്രം ലേലം വൈകി എന്നതാണ്. രണ്ടാമത്തെ കാര്യം നടന്നുകൊണ്ടിരിക്കുന്ന ടെസ്റ്റിങ് ആണ്. നിലവിൽ നടക്കുന്ന പരീക്ഷണം പൂർത്തിയായാൽ മാത്രമേ സ്വാഭാവികമായും നെറ്റ്‌വർക്കുകൾ നവീകരിക്കാൻ സാധിക്കുകയുള്ളു. ഇതിന് കൂടുതൽ സമയവും ആവശ്യമാണ്. 5ജി നെറ്റ്വർക്ക് വികസിപ്പിക്കാൻ ആവശ്യമായ പ്രൊഡക്ടുകൾ നിർമ്മിക്കുന്ന കമ്പനികളുമായി ചേർന്ന് പ്രവർത്തിക്കുന്നതായി ജിയോ, എയർടെൽ തുടങ്ങിയ കമ്പനികൾ ഇതിനകം തന്നെ അറിയിച്ചിട്ടുണ്ട്.

5ജി നെറ്റ്‌വർക്കുകൾക്ക് 4ജി പ്രവർത്തിക്കുന്നതിൽ നിന്നും വ്യത്യസ്തമായ സ്‌പെക്ട്രം ബാൻഡുകൾ ആവശ്യമാണ്. ടെലികോം കമ്പനികളെല്ലാം തന്നെ സബ്-ജിഗാഹെർട്സ്, മിഡ്, എംഎം വേവ് ബാൻഡുകൾ സ്വന്തമാക്കാൻ പരിശ്രമിക്കുന്നുണ്ട്. 5ജി സ്പെക്ട്രം ലേലം വൈകുന്നതിനുള്ള പ്രധാന കാരണം 3.3 ജിഗാഹെർട്സ് - 3.4 ജിഗാഹെർട്സ് ബാൻഡിൽ 100 ​​മെഗാഹെർട്സ് എയർവേവ് ഉള്ള ഇന്ത്യൻ നാവികസേന 5ജിക്കായി അത് ഒഴിഞ്ഞു നൽകാൻ തയ്യാറല്ല എന്നതാണ് എന്ന് ടെലിക്കോം ടോക്ക് റിപ്പോർട്ട് ചെയ്യുന്നു.

ലേലം വൈകിയാൽ 5ജി നെറ്റ്‌വർക്കുകൾ ഇന്ത്യയിൽ ആരംഭിക്കുന്നത് വൈകും. സ്പെക്ട്രത്തിന് നിർണയിച്ചിരിക്കുന്ന വിലയും പ്രധാന വെല്ലുവിളിയാണ്. നെറ്റ്‌വർക്ക് റോൾ ഔട്ട് വേഗത്തിൽ ആക്കാനായി സബ് ജിഗാഹെർട്സ് ബാൻഡിലെ (700 മെഗാഹെർട്സ്) സ്പെക്ട്രത്തിന്റെ വില സർക്കാർ കുറയ്ക്കണമെന്ന് ടെലിക്കോം കമ്പനികൾ ആവശ്യപ്പെട്ടിരുന്നു. മറ്റൊരു രാജ്യത്തിലും ഇല്ലാത്ത വിധത്തിലാണ് സ്പെക്ട്രത്തിന്റെ വില എന്നാണ് കമ്പനികൾ ഉന്നയിക്കുന്ന പ്രധാന വിമർശനം.

5ജി സ്പെക്ട്രം ലേലം, ടെസ്റ്റിങ് എന്നിവയടക്കമുള്ള കാര്യങ്ങൾ പരിഗണിച്ചാൽ അടുത്ത വർഷം ആദ്യം പോലും ഇന്ത്യയിൽ 5ജി നെറ്റ്വർക്ക് ആരംഭി ഇന്ത്യയിലെ ടെലിക്കോം കമ്പനികൾക്ക് സാധിക്കില്ല. നിലവിലെ സാഹചര്യത്തിൽ പോലും 5ജി നെറ്റ്‌വർക്കുകൾ നൽകാൻ ടെലിക്കോം കമ്പനികൾക്ക് സാധിക്കും. 4ജി കോർ ഉപയോഗിച്ച് മെട്രോ നഗരങ്ങളിൽ 5ജി സോഫ്റ്റ് ലോഞ്ച് ചെയ്യാനാണ് സാധിക്കുക. പക്ഷേ ഇതിന് നെറ്റ്വർക്ക് ശേഷി പരിമിതമായതിനാൽ 4ജി ഉപയോക്താക്കൾക്ക് വലിയ പ്രശ്നങ്ങൾ നേരിടേണ്ടി വരും.

നിലവിലെ അവസ്ഥയിൽ അടുത്ത വർഷത്തിന്റെ രണ്ടാം പാദത്തിലോ അതിനുശേഷമോ ഇന്ത്യയിൽ 5ജി നെറ്റ്വർക്ക് ലോഞ്ച് ചെയ്യുമെന്ന് പ്രതീക്ഷിക്കാം. എയർടെൽ, ജിയോ എന്നിവ രാജ്യത്ത് 5ജി പരീക്ഷണങ്ങൾ നടത്തിയിരുന്നു. എയർടെല്ലിന് 1ജിബിപിഎസ് വേഗതവരെ ഈ പരീക്ഷണത്തിൽ നിന്നും ലഭിച്ചിട്ടുണ്ട്. 5ജി നെറ്റ്വർക്ക് ഇന്ത്യയിൽ എല്ലായിടത്തും എത്തിയാൽ സിനിമകൾ പോലും സെക്കന്റുകൾ കൊണ്ട് ഡൌൺലോഡ് ചെയ്യാൻ സാധിക്കും. ഇന്ത്യയിലെ 5ജി റോൾഔട്ടുമായി ബന്ധപ്പെട്ട കൂടുതൽ കാര്യങ്ങൾ വരും മാസങ്ങളിൽ വ്യക്തമാകുമെന്നാണ് പ്രതീക്ഷിക്കുന്നത്.