Xiaomi, Realme Clash Of Words: ഷവോമിയും റിയൽമിയും തമ്മിൽ വാക്പോര് ശക്തമാകുന്നു

യഥാർത്ഥ മാർക്കറ്റ് ലീഡറായ ഒരു നൂതന ബ്രാന്റ് ഇങ്ങനെ പെരുമാറില്ല, എതിരാളിയുടെ വളർച്ചയിൽ നിങ്ങൾ എത്രമാത്രം സുരക്ഷിതരല്ലെന്ന് വന്നാലും അടിസ്ഥാപരമായ അന്തസും ധാർമികതയും കാത്തുസൂക്ഷിക്കണം എന്നാണ് റിയൽമി സിഇഒ മാധവ ഷെത്ത് ട്വീറ്റ് ചെയ്തത്. ഈ മാസം ആദ്യമാണ് ഇരുകമ്പനികളും തമ്മിലുള്ള ഈ വാക്പോരിന് തുടക്കമായത്. തമാശ, ഒരു കോപ്പിക്യാറ്റ് ബ്രാന്റ് ഞങ്ങളെ കളിയാക്കുന്ന രീതിയിൽ അനുകരിക്കുന്നു, അത് കഴിഞ്ഞ് ഈ ബ്രാന്റ് പരസ്യങ്ങളിലൂടെ ഷവോമിയെ കളിയാക്കുന്നു എന്നായിരുന്നു ഷവോമി സിഇഒയുടെ ട്വീറ്റ്.

ഷവോമി സിഇഒയുടെ പ്രസ്താവനയിൽ റിയൽമി സിഇഒ കടുത്ത അതൃപ്തി പ്രകടിപ്പിച്ചിരുന്നു. കോർപ്പറേറ്റ് ധാർമ്മികത കുറയ്ക്കുന്നതും എതിരാളികളായ ബ്രാന്റുകളെ കുറിച്ച് ഇത്തരം അഭിപ്രായങ്ങൾ പറയുന്നതും ശരിയല്ലെന്നും ഇത് വ്യവസായത്തെ മുഴുവനായി ബാധിക്കുമെന്നും റിയൽമി സിഇഒ മാധവ ഷെത്ത് ഒരു വാർത്താ എജൻസിയോട് പറഞ്ഞു. ഇരു ബ്രാന്റുകളും ഇന്ത്യൻ വിപണിയിൽ കടുത്ത മത്സരം നടക്കുന്ന സന്ദർഭത്തിലാണ് ഇത്തരമൊരു പ്രസ്താവന വരുന്നത് എന്ന കാര്യം ശ്രദ്ധേയമാണ്.

ബ്രാൻഡുകൾ അവരുടെ കോർപ്പറേറ്റ് ധാർമ്മികത കുറയ്ക്കുന്ന രീതിയിൽ പെരുമാറുന്നതും സോഷ്യൽ മീഡിയയിൽ ചെളിവാരിയെറിയുന്നതും ശരിയല്ല. കാരണം ഇത് മൊത്തത്തിലുള്ള വ്യവസായത്തെ ദോഷകരമായി ബാധിക്കുന്നു. തങ്ങളുടെ ഉപയോക്താക്കൾക്ക് മികച്ച അനുഭവങ്ങൾ നൽകാനാണ് റിയൽമി പ്രവത്തിക്കുന്നത് അത് തുടരുകയും ചെയ്യും എന്ന് ഷെത്ത് പറഞ്ഞതായി ഐ‌എ‌എൻ‌എസ് വ്യക്തമാക്കി.

ഷവോമിയുടെ റെഡ്മി നോട്ട് 7 പ്രോയിൽ ഉപയോഗിക്കുന്ന പ്രോസസറനെക്കാൾ പഴയ പ്രോസസറാണ് ചില പുതിയ ഫോണുകളിൽ ഉൾപ്പെടുത്തുന്നതെന്ന് റിയൽമി 3 പ്രോയെ ലക്ഷ്യമാക്കി കഴിഞ്ഞ വർഷം മെയ് മാസത്തിൽ ഷവോമി സിഇഒ ട്വിറ്റ് ചെയ്തിരുന്നു. ഇതിന് മറുപടിയുമായി റിയൽമി സിഇഒ രംഗത്തെത്തിയിരുന്നു. രാജ്യത്തെ വിപണിയിൽ റിയൽമി നേടുന്ന വിജയത്തെ കുറിച്ചോർക്കുമ്പോൾ ഷവോമിക്ക് സുരക്ഷിതത്വം നഷ്ടപ്പെടുന്നു, ആരോ ഭയപ്പെടുന്നു എന്നായിരുന്നു ഷെത്തിന്റെ മറുപടി പോസ്റ്റ്. 2019ൽ ഷവോമിക്ക് 28 ശതമാനം വിപണി വിഹിതമാണ് ഉള്ളത്. ഒരു വർഷത്തിനുള്ളിൽ 10 ശതമാനം വിപണി വിഹിതവുമായി റിയൽമി 255 ശതമാനം വളർച്ച നേടിയിരുന്നു.

റിയൽമിയെ 2020ലെ ഏറ്റവും മികച്ച ബ്രാന്റാക്കി മാറ്റാനാണ് തങ്ങൾ പരിശ്രമിക്കുന്നത്. ബാക്കിയെല്ലാം മറ്റുള്ളവരുടെ ചോയിസാണ്. ഞങ്ങളത് കാര്യമാക്കുന്നില്ല എന്ന് ഷെത്ത് ട്വീറ്റ് ചെയ്തു. അടുത്തിടെ ഷവോമി സിഇഒ മനു കുമാർ ജെയിൽ ഷവോമി സ്മാർട്ട്ഫോണിൽ ഒരു സ്ക്രാച്ച് ടെസ്റ്റ് നടത്തുന്ന വീഡിയോ പോസ്റ്റ് ചെയ്തിരുന്നു. ഫോണിന്റെ ഡ്യൂറബിലിറ്റി കാണിക്കാൻ താരതമ്യത്തിന് അദ്ദേഹം ഉപയോഗിച്ചത് റിയൽമി സ്മാർട്ട്ഫോണായിരുന്നു.