ഫെബ്രുവരിൽ ഇന്ത്യയിലെത്തുന്നത് നാലോളം പുതിയ ഫോണുകൾ; എല്ലാം ഒന്നിനൊന്ന് മെച്ചം, കൂട്ടത്തിൽ കേമൻ ഇവൻ

സ്മാർട്ട് ഫോൺ വിപണിയെ സംബന്ധിച്ച് മികച്ച ഒരു തുടക്കമാണ് ഈ വർഷത്തിന്റെ ആരംഭത്തിൽ തന്നെ ലഭിച്ചത്. സാംസ​ങ് ​ഗാലക്സി എസ് 24 സീരീസ്, വിവോ എക്സ്100 സീരീസ് തുടങ്ങി മികച്ച നിരവധി ഫോണുകൾ ജനുവരി മാസം പുറത്തിറങ്ങി. ഈ ഫെബ്രുവരിയിലും കുറച്ചു ഫോണുകൾ‌ പുറത്തിറങ്ങാനുണ്ട് ഏതെല്ലാമാണ് ഈ ഫോണുകൾ എന്ന് പരിശോധിക്കാം.

ഈ മാസം പുറത്തിറങ്ങുന്നതിൽ ഏറ്റവും ശ്രദ്ധയാകർഷിച്ച ഫോണുകളിൽ ഒന്നാണ് ഐക്യൂവിന്റെ നിയോ 9 പ്രോ. ഫെബ്രുവരി 22ന് ഈ ഫോൺ ഇന്ത്യയിൽ അവതരിപ്പിക്കും എന്നാണ് ഐക്യൂ അറിയിച്ചിരിക്കുന്നത്. കഴിഞ്ഞ വർഷം ഡിസംബർ മാസത്തിൽ ഈ ഫോൺ ഐക്യൂ ചൈനയിൽ അവതരിപ്പിച്ചിരുന്നു. ഇതിന് പിന്നാലെയാണ് ഇന്ത്യയിലും ഈ ഫോൺ എത്തുന്നത്. Snapdragon 8 Gen 2 SoC ചിപ്സെറ്റ് ഈ ഫോണിൽ ഉണ്ടാകും എന്നാണ് കമ്പനി നൽകുന്ന സൂചന.

MOST READ: ഈ മാസത്തോടെ പേടിഎം അടച്ചുപൂട്ടിയേക്കും; നിയന്ത്രണങ്ങൾ കടുപ്പിച്ച് ആർബിഐ

ആൻഡ്രോയിഡ് 14-ൽ പ്രവർത്തിക്കുന്ന ഐക്യൂ നിയോ 9 പ്രോയിൽ 50 എംപിയുടെ പ്രൈമറി സെൻസർ ഉണ്ടായേക്കുമെന്നും സുചനകൾ ഉണ്ട്. 144Hz AMOLED ഡിസ്‌പ്ലേ, 120W ഫാസ്റ്റ് ചാർജിങ് പിന്തുണയുള്ള 5,160 mAh എന്നിവയാണ് ഈ ഫോണിന്റെ മറ്റ് സവിശേഷതകൾ. ഈ ഫെബ്രുവരി മാസം തന്നെ പുറത്തിറങ്ങുന്ന മറ്റൊരു ഫോൺ ആണ് ഹോണർ എക്സ് 9 ബി. ഫെബ്രുവരി 15ന് ആയിരിക്കും ഈ ഫോൺ ഇന്ത്യയിലെത്തുക.

HTECH സിഇഒ മാധവ് ഷേത്ത് ആണ് ഈ വാർത്ത പുറത്ത് വിട്ടത്. പ്രമുഖ ഇ കൊമേഴ്സ് വെബ്സൈറ്റായ ആമസോൺ വഴി ആയിരിക്കും ഹോണർ എക്സ് 9 ബി ഇന്ത്യയിൽ വിൽപനയ്ക്ക് എത്തുന്നത്. Snapdragon 6 Gen 1 ചിപ്‌സെറ്റ്, 120Hz പുതുക്കൽ നിരക്കുള്ള 1.5K AMOLED ഡിസ്‌പ്ലേ, 35W ഫാസ്റ്റ് ചാർജിങ് പിന്തുണയുള്ള 5,300mAh ബാറ്ററി, 108 എംപി പ്രൈമറി ക്യാമറ എന്നിവയെല്ലാം ഈ ഫോണിൽ നിന്ന് പ്രതീക്ഷിക്കാവുന്നതാണ്.

MOST READ: ജിയോയ്ക്കും എയർടെലിനും വെല്ലുവിളിയായി വിഐ; 5ജി സേവനം ഉടനെത്തുന്നു

25,000 രൂപയുടെ സെ​ഗ്മെന്റിൽ ആയിരിക്കും ഹോണർ തങ്ങളുടെ പുതിയ ഫോണിനെ ഇന്ത്യയിൽ എത്തിക്കുന്നത്. നത്തിങ്ങിന്റെ 2എ എന്ന ഫോൺ ആണ് ഈ ഫെബ്രുവരി മാസത്തിൽ പുറത്തിറങ്ങാൻ സാധ്യതയുള്ള മറ്റൊരു ഫോൺ. തിയതി കൃത്യമായി അറിയിച്ചിട്ടില്ലെങ്കിലും ഈ മാസം തന്നെ ഫോൺ ഇന്ത്യൻ വിപണിയിൽ എത്തും എന്നാണ് ലഭിക്കുന്ന സൂചന. MediaTek Dimensity 7200 SoC ചിപ്പ്സെറ്റ് ആയിരിക്കും ഈ ഫോണിന് നത്തിങ് നൽകുക.

50 എംപി സാംസങ് ISOCELL S5KGN9 പ്രൈമറി സെൻസറും 50 എംപി ISOCELL JN1 അൾട്രാവൈഡ് ഷൂട്ടറും നത്തിങ് ഫോൺ 2എയിൽ ഇടം പിടിച്ചേക്കാം. അതേ സമയം അ​ഗോളതലത്തിൽ ഈ മാസം പുറത്തിറങ്ങുന്ന ഫോണുകളുടെ പട്ടിക പരിശോധിക്കുമ്പോൾ ഇതിൽ ഇടം പിടിച്ചിരിക്കുന്ന ഒരു ഫോൺ ആണ് വിവോയുടെ വി 30 സീരീസ്. വി 30, വി 30 പ്രോ എന്നിങ്ങനെ രണ്ട് ഫോണുകൾ ആയിരിക്കും ഈ സീരീസിൽ ഉണ്ടായിരിക്കുക.

കഴിഞ്ഞ ഡിസംബറിൽ ഈ ഫോണുകൾ വിവോ ചൈനയിൽ അവതരിപ്പിച്ചിരുന്നു. റിയൽമിയുടെ ജിടി 5 പ്രോയാണ് ഈ മാസം ആ​ഗോളതലത്തിൽ പുറത്തിറങ്ങുന്ന മറ്റൊരു ഫോൺ. Snapdragon 8 Gen 3 SoC ചിപ്പ്സെറ്റ് ആണ് ഈ ഫോണിന് അവകാശപ്പെടാനുള്ളത്. ഇതിന് പുറമെ 144Hz LTPO OLED ഡിസ്‌പ്ലേ, 5,400 mAh ബാറ്ററി, 50 എംപി ട്രിപ്പിൾ ക്യാമറ സജ്ജീകരണം എന്നിവയും ഈ ഫോണിന്റെ പ്രത്യേകതകൾ ആയിരിക്കും

ഷവോമിയുടെ 14 അൾട്രയും ഈ മാസം തന്നെ ആ​ഗോളതലത്തിൽ പുറത്തിറങ്ങും എന്നാണ് പ്രതീക്ഷിക്കുന്നത്. Snapdragon 8 Gen 3 SoC തന്നെയായിരിക്കും ഈ ഫോണിനും കരുത്ത് നൽകുക. കഴിഞ്ഞ മാസം ആയിരുന്നു 14 സീരീസ് ഫോണുകൾ ഷവോമി പുറത്തിറക്കിയത്. നിലവിൽ ഷവോമി 14 അൾട്രയുടെ ഫീച്ചറുകൾ ഒന്നും പുറത്ത് വന്നിട്ടില്ല. ഹോണറിന്റെ മാജിക് 6 സീരീസ് ഫോണുകളും ഈ മാസം തന്നെ പുറത്തിറങ്ങും എന്നും സൂചനയുണ്ട്.

ഹോണർ മാജിക് 6, മാജിക് 6 പ്രോ എന്നിങ്ങനെ രണ്ട് ഫോണുകൾ ആയിരിക്കും ഈ സീരീസിൽ ഹോണർ അവതരിപ്പിക്കുന്നത്. ജനുവരിയിൽ ഈ ഫോണുകൾ ഹോണർ ചൈനയിൽ അവതരിപ്പിച്ചിരുന്നു. ഇതിന് പിന്നാലെയാണ് ആ​ഗോള ലോഞ്ചിന് തയ്യാറെടുക്കുന്നത്. ഹോണർ മാജിക് വി 2 എന്ന ഒരു ഫോണും ഇതിനൊപ്പം ഹോണർ അവതരിപ്പിക്കും എന്നും സൂചനയുണ്ട്. നിലവിൽ ഇത്രയും ഫോണുകൾ ആണ് ഈ ഫെബ്രുവരി മാസത്തിൽ പുറത്തിറങ്ങുന്നത്.