1,24,999 രൂപയുടെ ​ഗാലക്സി എസ്23 അൾട്ര 74,999 രൂപയ്ക്ക് ഫ്ലിപ്പ്കാർട്ടിൽ; ബുക്ക് ചെയ്തവർക്ക് പുതിയ അറിയിപ്പ്

സാംസങ് ആരാധകരുടെ ഏറ്റവും പ്രിയപ്പെട്ട ഫോണുകളിൽ ഒന്നാണ് സാംസങ് ​ഗാലക്സി എസ് 23 അൾട്ര. ക്യാമറ ഫീച്ചറുകളിൽ ഏറെ വിപ്ലവം സൃഷ്ടിച്ച ഈ ഫോൺ ആപ്പിളിന്റെ ഐഫോണുകൾക്ക് ഉൾപ്പെടെ വൻ വെല്ലുവിളി ഉയർത്തിയ ഫോൺ ആണ്. ഫോണിന്റെ സൂമിങ് കപ്പാസിറ്റി തന്നെയാണ് എടുത്ത് പറയേണ്ട സവിശേഷത.

എത്ര ദൂരെയുള്ള വസ്തുക്കളും മികച്ച ക്ലാരിറ്റിയിൽ സൂം ചെയ്ത് എടുക്കാൻ ​ഗാലക്സി എസ്23 അൾട്ര ഉപയോക്താക്കളെ സഹായിക്കുന്നു. എന്നാൽ ഒരു ലക്ഷം രൂപയിലും അധികമാണ് ഈ ഫോണിന്റെ വില. കൃത്യമായി പറഞ്ഞാൽ ഫോണിന്റെ 256 ജിബി സ്റ്റോറേജ് വേരിയന്റ് 1,24,999 രൂപയ്ക്കാണ് ഇന്ത്യയിൽ ലോഞ്ച് ചെയ്തത്. എന്നാൽ ഈ ഫോൺ ഇപ്പോൾ 74,999 രൂപയ്ക്ക് ഫ്ലിപ്പ്കാർട്ടിൽ നിന്ന് ലഭിക്കും എന്ന തരത്തിലുള്ള വാർത്തകളാണ് പുറത്ത് വരുന്നത്.

MOST READ: ലോകത്ത് ഇതാദ്യം; വിൻഡോസിലും ആൻഡ്രോയിഡിലും പ്രവർത്തിക്കും, അതിശയിപ്പിക്കുന്ന ലാപ്ടോപ് അവതരിപ്പിച്ച് ലെനോവ

99,999 രൂപയ്ക്കാണ് ഈ ഫോൺ ഫ്ലിപ്പ്കാർട്ടിൽ ലിസ്റ്റ് ചെയ്തത്. തുടർന്ന് ബാങ്ക് ഓഫറുകളും എക്സ്ചേഞ്ച് ഓഫറുകളും എല്ലാം കൂട്ടി ഉപയോക്താക്കൾ‌ക്ക് ഈ ഫോൺ 74,999 രൂപയ്ക്ക് സ്വന്തമാക്കാനുള്ള അവസരം ഫ്ലിപ്കാർട്ട് ഒരുക്കിയിരുന്നു. ഇതേ തുടർന്ന് നിരവധി ഉപയോക്താക്കളാണ് ഈ ഫോൺ ബുക്ക് ചെയ്തത്. എന്നാൽ പുറത്തു വരുന്ന റിപ്പോർട്ടുകൾ പ്രകാരം ഈ വില നൽകിയത് ഫ്ലിപ്പ്കാർട്ടിന് സംഭവിച്ച അബദ്ധം ആണെന്നാണ് സൂചന.

സംഭവം ശ്രദ്ധയിൽപെട്ട ഉടനെ ഈ ഓഫർ ഫ്ലിപ്പ്കാർട്ട് പിൻവലിക്കുകയും ചെയ്തു. ​ഗാലക്സി എസ് 23 അൾട്രയുടെ പിൻ​ഗാമിയായി ​ഗാലക്സി എസ് 24 അൾട്ര ഈ മാസം പുറത്തിറങ്ങും എന്നിരിക്കെ പഴയ ഫോണിന് വില കുറയുന്നത് സ്വാഭാവികം ആണെന്ന് ധരിച്ചാണ് നിരവധി ഉപയോക്താക്കൾ ഈ ഓഫറിന്റെ അടിസ്ഥാനത്തിൽ ഫ്ലിപ്പ്കാർട്ടിൽ നിന്ന് ​ഗാലക്സി എസ് 23 അൾട്ര ബുക്ക് ചെയ്തത്.

MOST READ: ഇതൊക്കെയാണ് സ്മാർട്ട് വാച്ച്, ഒറ്റ ഫുൾ ചാർജിൽ 80 ദിവസം ബാറ്ററിലൈഫ്; പ്രമോട്ട് എക്സ് വാച്ച്-ആർ19 ഇന്ത്യയിൽ

ഇത് രണ്ടാം തവയാണ് ഇത്തരത്തിൽ ഫ്ലിപ്പ്കാർട്ടിന് അബദ്ധം പറ്റുന്നത്. നിലവിൽ ഈ ഫോണുകൾ ബുക്ക് ചെയ്ത് പേയ്മെന്റ് നൽകിയ ഉപയോക്താക്കളുടെ പണം റീഫണ്ട് ചെയ്യാനാണ് ഫ്ലിപ്പ്കാർട്ട് ആലോചിക്കുന്നത്. അതേ സമയം റിപ്പബ്ലിക്ക് ദിന പ്രത്യേക ഓഫർ വിൽപനയുടെ ഭാ​ഗമായി ഫ്ലിപ്പ്കാർട്ടും ആമസോണും സ്മാർട്ട് ഫോണുകൾക്കും മറ്റ് ഇലക്ട്രോണിക് ​ഗാഡ്ജറ്റുകൾക്കും മികച്ച ഓഫറുകളാണ് ഇപ്പോൾ പ്രഖ്യാപിച്ചിരിക്കുന്നത്. ഫ്ലിപ്പ്കാർട്ടിൽ ജനുവരി 14ന് ആണ് ഈ ഓഫർ വിൽപന ആരംഭിക്കുന്നത്.

ആമസോണിൽ ആകട്ടെ ജനുവരി 13ന് തന്നെ ഈ ഓഫർ വിൽപന ആരംഭിക്കും എന്നാണ് പ്ലാറ്റ്ഫോം അറിയിച്ചിരിക്കുന്നത്. ആമസോൺ പ്രൈം, ഫ്ലിപ്പ്കാർട്ട് പ്ലസ് ഉപയോക്താക്കൾക്ക് ഒരു ദിവസം മുമ്പ് തന്നെ ഈ ഓഫർ വിൽപനയിൽ പങ്കെടുക്കാവുന്നതാണ്. സ്മാർട്ട് ഫോണുകൾക്കും ​ഗാഡ്ജറ്റുകൾക്കും പുറമെ മറ്റ് ​ഗൃഹോപകരണങ്ങൾക്ക് അടക്കം ഈ വിൽപനയിൽ ഓഫർ ഉണ്ടായിരിക്കുന്നതാണ്. സ്മാർട്ട് ഫോണുകൾക്ക് 40 ശതമാനം വരെ ഡിസ്കൗണ്ട് ആണ് ഈ ഓഫർ വിൽപനയിൽ പ്രതീക്ഷിക്കുന്നത്.

അതിനിടെ സാംസങ് ​ഗാലക്സി എസ് 23 സീരീസ് ഫോണുകളുടെ പിൻ​ഗാമിയായ എസ് 24 സീരീസ് ഫോണുകളെ സാംസങ് ഈ ജനുവരി 17ന് ആവതരിപ്പിക്കും. കാലിഫോർണിയയിൽ വെച്ച് നടക്കുന്ന ഇവന്റിൽ ആയിരിക്കും ഈ ഫോണുകളെ സാംസങ് അവതരിപ്പിക്കുക. ​ഗാലക്സി എസ് 24, എസ് 24 പ്ലസ്, എസ് 24 അൾട്ര എന്നീ ഫോണുകൾ ആയിരിക്കും ഈ സീരീസിൽ ഉണ്ടായിരിക്കുക. പഴയ സീരീസിൽ നിന്ന് നിരവധി അപ്ഡേറ്റുകൾ പുതിയ ഫോണുകൾക്ക് ഉണ്ടായിരിക്കും.

സാംസങ്ങിന്റെ ആദ്യത്തെ എഐ ഫോണുകൾ ആയിരിക്കും ​ഗാലക്സി എസ് 24 സീരീസ് ഫോണുകൾ എന്നും വാർത്തകൾ ഉണ്ട്. നിരവധി ഓപ്ഷനുകളിൽ എഐ ഫീച്ചറുകളുടെ പിന്തുണ നൽകാൻ സാധ്യതയുണ്ട്. പുറത്ത് വരുനന് റിപ്പോർട്ടുകൾ പ്രകാരം ​ഗൂ​ഗിളിന്റെ പിക്സൽ 8-ഇൽ ഉണ്ടായിരുന്നതിന് സമാനമായ ഒരു മാജിക് ടൂൾ ഈ ഫോണിൽ ഉണ്ടാകാൻ സാധ്യതയുണ്ട്. വീഡിയോ എടുക്കുന്ന സമയത്ത് തന്നെ ആവിശ്യമില്ലാത്ത വസ്തുക്കൾ ഫ്രെയ്മിൽ നിന്ന് മായ്ച്ചുകളായാൻ ഈ ടൂൾ സഹായിക്കും.