സാധാരണക്കാർക്കായുള്ള എസ്24 അൾട്ര റെഡി; 120x സൂപ്പർ സൂം ക്യാമറയുമായി റിയൽമി 12 പ്രോ സീരീസ് ഇന്ത്യയിലെത്തുന്നു

ചൈനീസ് സ്മാർട്ട് ഫോൺ നിർമ്മാതാക്കളായ റിയൽമിയുടെ ഏറ്റവും പുതിയ ഫോണാണ് റിയൽമി 12 പ്രോ സീരീസ്. നിലവിൽ ചൈനീസ് വിപണിയിൽ ലഭ്യമായ ഈ ഫോൺ ജനുവരി 29ന് ഇന്ത്യയിൽ അവതരിപ്പിക്കും എന്നാണ് റിയൽമി അറിയിച്ചിരിക്കുന്നത്. റിയൽമി 12 പ്രോ, റിയൽമി 12 പ്രോ പ്ലസ് എന്നിങ്ങനെ രണ്ട് ഫോണുകളാണ് ഈ സീരീസിൽ ഉണ്ടാകുക.

ക്യാമറ ഫീച്ചറുകൾ ഹൈലേറ്റ് ചെയ്തുകൊണ്ടാണ് പുതിയ ഫോണിനെ ഇന്ത്യയിൽ അവതരിപ്പിക്കാൻ റിയൽമി തയ്യാറെടുക്കുന്നത്. ഫോണിന്റെ ചില ഫീച്ചറുകൾ ഇതിനോടകം തന്നെ കമ്പനി സ്ഥിരീകരിച്ചിട്ടുണ്ട്. 64 എംപി OmniVision OV64B പെരിസ്കോപ്പ് ലെൻസ് ആയിരിക്കും ഈ ഫോണിന്റെ പ്രധാന ആകർഷണം. ഇതിന് പുറമെ ഒപ്റ്റിക്കൽ ഇമേജ് സ്റ്റെബിലൈസേഷനോടുകൂടിയ സോണി IMX890 സെൻസറും ഈ ഫോണുകളിൽ ഇടം പിടിയ്ക്കാൻ സാധ്യതയുണ്ട്.

MOST READ: 5ജിയിലും ഇന്റർനെറ്റ് വേ​ഗത കുറവാണോ? വിഷമിക്കേണ്ട വളരെ എളുപ്പത്തിൽ വേ​ഗത ഇരട്ടിയാക്കാം

Qualcomm Snapdragon 6 Gen 1 SoC ആയിരിക്കും റെഡ്മി 12 പ്രോയ്ക്ക് കരുത്ത് നൽകുക. പ്രോ പ്ലസിന് ആകട്ടെ Snapdragon 7s Gen 2 ചിപ്സെറ്റാണ് റിയൽമി നൽകിയിരിക്കുന്നത്. ഇതിനോടകം തന്നെ ഫോണിന്റെ ചില ടീസറുകൾ റിയൽമി എക്സ് (ട്വിറ്റർ) വഴി പുറത്ത് വിട്ടിട്ടുണ്ട്. 12 പ്രോ പ്ലസിൽ നൽകിയിരിക്കുന്ന പെരിസ്കോപ്പ് ലെൻസിന് 120x വരെ സൂപ്പർ സൂം വാ​ഗ്ദാനം ചെയ്യാൻ സാധിക്കും എന്നാണ് റിയൽമി അവകാശപ്പെടുന്നത്.

മറ്റ് ഫോണുകളിൽ പ്രത്യക്ഷപ്പെടുന്ന ലെൻസുകളെക്കേൾ 27.62 ശതമാനം വലുപ്പത്തിലാണ് റിയൽമി ഈ ലെൻസ് നിർമ്മിച്ചിരിക്കുന്നതെന്നും ഇവർ പറയുന്നു. റിയൽമി 12 പ്രോയിൽ 50 എംപിയുടെ സോണി ഐഎംഎക്സ് 890 ലെൻസ് മെയിൻ സെൻസറായി വരും എന്നാണ് പ്രതീക്ഷിക്കുന്നത്. റിയൽമി 11 പ്രോ സീരീസിന്റെ പിൻ​ഗാമികൾ ആയിട്ടാണ് പുതിയ ഫോണുകളെ റിയൽമി അവതരിപ്പിക്കുന്നത്. റിയൽമിയുടെ മികച്ച ഫീച്ചറുകളുള്ള ഫോണുകളിൽ ഒന്നായിരുന്നു 11 പ്രോ.

MOST READ: ഒരു തവണ ചാർജ് ചെയ്താൽ പിന്നെ 50 വർഷത്തേക്ക് ചാർജ് ചെയ്യേണ്ട; പുതിയ സ്മാർട്ട് ഫോൺ ബാറ്ററിയുമായി ചൈന

റിയൽമി 11 പ്രോ പ്ലസിൽ 200 എംപിയുടെ പ്രൈമറി ക്യാമറയാണ് കമ്പനി നൽകിയത്. ആയതിനാൽ തന്നെ റിയൽമി 12 പ്രോ പ്ലസിനും ഈ ക്യാമറ തന്നെ കമ്പനി നൽകും എന്നാണ് പ്രതീക്ഷിക്കുന്നത്. അതേസമയം ബ്ലൂ, ക്രീം എന്നീ നിറങ്ങളിൽ ആയിരിക്കും ഈ ഫോണുകൾ റിയൽമി ഇന്ത്യയിൽ അവതരിപ്പിക്കുക. പ്രോ പ്ലസിന്റെ മറ്റ് സവിശേഷതകൾ പരിശോധിക്കുമ്പോൾ 12 ജിബി വരെ ഈ ഫോണിന് റാം ഉണ്ടാകും എന്നാണ് പ്രതീക്ഷിക്കുന്നത്.

ആൻഡ്രോയിഡ് 14 ഓപ്പറേറ്റിംഗ് സിസ്റ്റത്തിൽ ആയിരിക്കും ഈ ഫോൺ പ്രവർത്തിക്കുക. രണ്ട് ഫോണുകൾക്കും 67W വയർഡ് ഫാസ്റ്റ് ചാർജിംഗ് പിന്തുണയുള്ള 5,000 mAh ബാറ്ററികൾ ആയിരിക്കും റിയൽമി നൽകുക. 6.7 ഇഞ്ച് കർവ്ഡ് എഡ്ജ് ഫുൾ എച്ച്ഡി പ്ലസ് അമോലെഡ് ഡിസ്പ്ലേ ആയിരിക്കും ഈ ഫോണുകൾക്ക് ഉണ്ടാകാൻ സാധ്യത. 120Hz റിഫ്രഷ് റേറ്റും ഈ ഡിസ്പ്ലേയ്ക്ക് ഉണ്ടായിരിക്കുന്നതാണ്.

അതേ സമയം റിയൽമി 12 പ്രോ, റിയൽമി 12 പ്രോ പ്ലസ് എന്നീ ഫോണുകൾക്ക് പുറമെ റിയൽമി 12 പ്രോ മാക്സ് എന്ന ഒരു ഫോൺ കൂടി ഈ സീരീസിൽ ഉണ്ടായിരിക്കും എന്ന് ചില റിപ്പോർട്ടുകൾ സൂചിപ്പിക്കുന്നുണ്ട്. എന്നാൽ ഇക്കാര്യം കമ്പനി ഇതുവരെ സ്ഥിരീകരിച്ചിട്ടില്ല. ജനുവരി 29ന് ഈ ഫോണുകൾ റിയൽമി ഇന്ത്യയിൽ അവതരിപ്പിക്കും എന്നാണ് അറിയിച്ചിരിക്കുന്നത്. ഉച്ചയ്ക്ക് 12 മണിക്കായിരിക്കും ഫോണുകൾ അവതരിപ്പിക്കുക.

ശേഷം പ്രമുഖ ഇ കൊമേഴ്സ് വെബ്സൈറ്റായ ഫ്ലിപ്പ്കാർട്ടിൽ നിന്ന് ആയിരിക്കും ഈ ഫോൺ വാങ്ങാൻ സാധിക്കുന്നത്. ഫോണിന്റെ മറ്റ് ഫീച്ചറുകൾ എന്തെല്ലാമായിരിക്കും എന്ന് കമ്പനി അറിയിച്ചിട്ടില്ല. ഫോണിന്റെ വിലയെക്കുറിച്ചുള്ള വിവരങ്ങളും പുറത്ത് വന്നിട്ടില്ല. എന്നിരുന്നാലും പ്രോ പ്ലസ് മോഡലിന് 50,000 രൂപയോളം അടുത്ത വിലയാണ് പ്രതീക്ഷിക്കുന്നത്. അൽപ ദിവസങ്ങൾ കൂടി കാത്തിരുന്നാൽ ഈ വിവരങ്ങളെല്ലാം ഔദ്യോ​ഗികമായി തന്നെ അറിയാൻ സാധിക്കുന്നതാണ്.